ត្រាំ៖ បើមិនទទួលអំណោយយន្តហោះប្រណីតតម្លៃ ៤០០លានពីកាតា មានតែមនុស្សឆ្កួត!

ក្រោយផ្ទុះការរិះគន់យ៉ាងចាស់ដៃពីសំណាក់អ្នកប្រជាធិបតេយ្យចំពោះលោក ដូណាល់ ត្រាំ ដែលទទួលអំណោយជាយន្តហោះប្រណីត​តម្លៃ​ ៤០០​លាន​ដុល្លារពីសែរាជវង្សកាតានោះ ស្រាប់តែប្រធានាធិបតីអាមេរិករូបនេះនិយាយក្តែងៗថា បើមិនព្រមទទួលយកអំណោយដ៏សប្បុរសនេះ មានតែមនុស្សឆ្កួត!

កាលពីថ្ងៃអាទិត្យទី១១ខែឧសភាឆ្នាំ២០២៥ មានសេចក្តីរាយការណ៍ថា រដ្ឋាភិបាល​ទីក្រុងវ៉ាស៊ីន កំពុងរៀបចំទទួលយកយន្តហោះ Boeing 747-8 ដ៏​ប្រណីត​មួយ​គ្រឿង​​ដែលគេឲ្យឈ្មោះថា «រាជវាំង​លើ​អាកាស (Flying Palace)» ពីសែ​រាជវង្សកាតា ក្នុង​​បំណង​យក​ទៅ​បម្រើការ​បណ្តោះអាសន្នជា​យន្តហោះ​​ដឹក​ប្រធានាធិបតី Air Force One។

រឿងនេះបានបញ្ឆេះ​ឲ្យ​មាន​​ការរិះគន់​ជាច្រើន ជាពិសេសពីសំណាក់សមាជិកសភាគណបក្ស​ប្រជាធិបតេយ្យ រួមទាំងមេដឹកនាំសំឡេងភាគតិចព្រឹទ្ធសភា លោក Chuck Schumer និងអ្នកតំណាង Adam Schiff ផងដែរ ដែលអំពាវនាវ​ឲ្យ​មានការស៊ើបអង្កេតលើការបំពានដែលអាចកើតមាន​ចំពោះ​រដ្ឋធម្មនុញ្ញ​ ដែលហាមឃាត់​​មន្ត្រីអាមេរិក​ពីការ​ទទួលយក​អំណោយ​ពី​រដ្ឋាភិបាល​បរទេស​ដោយគ្មានការយល់ព្រមពីសភា។

ទោះបីជាយ៉ាងណាក៏ដោយ ឆ្លើយតបសំណួរអ្នកកាសែតនៅសេតវិមានជុំវិញបញ្ហានេះកាលពីថ្ងៃទី១២ខែឧសភា លោក ត្រាំ និយាយយ៉ាងច្បាស់ថា «មានតែមនុស្សឆ្កួតទេដែលមិនព្រមទទួលយកអំណោយនេះ។ វាជាកាយវិការនៃសុច្ឆន្ទៈ ខ្ញុំមិនបដិសេធការផ្តល់ជូនបែបនេះទេ។ បើឆ្លើយថាទេ នោះខ្ញុំជាមនុស្សល្ងង់បាត់ហើយ តែយើងក៏មិនចង់ទទួលយកយន្តហោះថ្លៃៗបែបនេះដោយទទេៗដែរ»។

យោងតាមលោកត្រាំ, យន្តហោះនេះនឹងត្រូវបរិច្ចាគទៅបណ្ណាល័យប្រធានាធិបតីរបស់គាត់នាពេលអនាគត សម្រាប់ដាក់តាំងបង្ហាញក្រោយចាកចេញពីសេតវិមាន ដែលស្រដៀងទៅនឹងបណ្ណាល័យរបស់អតីតប្រធានាធិបតី Ronald Reagan ដែលរក្សាទុកយន្តហោះ Air Force One ស៊េរីចាស់ដែរ។

សូម​ជម្រាបជាថ្មី លោកត្រាំ ខកចិត្តយ៉ាងខ្លាំងចំពោះការពន្យារពេលក្នុងការផ្តល់យន្តហោះ 747-8 ចំនួនពីរ​គ្រឿង ដើម្បីបម្រើ​ការ​ជាយន្តហោះ Air Force One ថ្មី។

ក្នុងអំឡុងអាណត្តិដំបូងរបស់ខ្លួន លោក ត្រាំ បានឈានដល់កិច្ចព្រមព្រៀងជាមួយក្រុមហ៊ុន Boeing ដើម្បីចែកចាយ​យន្តហោះនៅឆ្នាំ​២០២៤។ យ៉ាង​ណា​មិញ មន្ត្រីកងទ័ពអាកាសអាមេរិក បានប្រាប់សភាកាលពីសប្តាហ៍មុនថា ក្រុមហ៊ុន Boeing បានស្នើ​​សុំ​ពន្យារ​ពេល​រហូត​ដល់​​ឆ្នាំ​២០២៧​ឯណោះ​៕

អត្ថបទ៖ សុខ សុវណ្ណ

ចុចអាន៖ រដ្ឋបាលលោក ត្រាំ ត្រៀមទទួលយកយន្តហោះប្រណិត​តម្លៃ​ ៤០០​លាន​ដុល្លារ​ជា​អំណោយ​ពីកាតា