ថៃ កំពុងផ្ទុះកូវីដខ្លាំងណាស់! សប្តាហ៍មុន ឆ្លងជាង ៣ម៉ឺននាក់ ភាគច្រើននៅបាងកក

ស្ថានការណ៍ឆ្លងរាលដាលជំងឺកូវីដ១៩រលកថ្មី កំពុងវាយលុកខ្លាំងណាស់នៅប្រទេសថៃ ដោយរយៈពេលត្រឹមមួយសប្តាហ៍ប៉ុណ្ណោះ ពោលគឺគិតចាប់ពីថ្ងៃទី១១ដល់១៧ខែឧសភា មានមនុស្សឆ្លងរហូតដល់ទៅ ៣៣ ០៣០ករណី ខណៈគ្រាន់តែរាជធានីបាងកក មានអ្នកឆ្លងដល់ទៅ ៦ ២៩០ករណីទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះក៏មានរបាយការណ៍អំពីមនុស្សស្លាប់២នាក់ផងដែរ ប៉ុន្តែគេជឿថា កាលពីសប្តាហ៍មុន មនុស្សស្លាប់ដោយសារជំងឺកូវីដ១៩អាចមានដល់ទៅជាង១០នាក់ឯណោះ គ្រាន់តែមិនទាន់បញ្ជាក់ជាផ្លូវការ។

តាមការចុះផ្សាយរបស់ Bangkok Post នៅថ្ងៃអង្គារទី២០ខែឧសភាឆ្នាំ២០២៥ ដោយដកស្រង់ប្រភពពីនាយកដ្ឋានគ្រប់គ្រងជំងឺឆ្លង, បន្ទាប់ពីបាងកក ខេត្តដែលមានការឆ្លងកូវីដច្រើនជាងគេគឺ Chon Buri (២ ៥៧៣ករណី), Rayong (១ ៦៨០ករណី), Nonthaburi (១ ៤៨២ករណី) និង Samut Prakan (១ ៤៤២ករណី)។

ករណីឆ្លងថ្មីនេះគឺកើនលើសទ្វេដង បើធៀបនឹងមនុស្សឆ្លងនៅសប្តាហ៍មុននោះទៀត (៥-១១ខែឧសភា) ដែលថៃបានកត់ត្រាអ្នកឆ្លងកូវីដជាង ១៦ ០០០ករណី។

ពាក់ព័ន្ធបញ្ហានេះ អ្នកជំនាញថៃព្រមានថា ប្រសិនបើនិន្នាការបច្ចុប្បន្ននៅតែបន្ត នោះបានន័យថា តួលេខមនុស្សឆ្លងជំងឺកូវីដ១៩ នឹងហក់ឡើងទ្វេដង នាពេលខាងមុខទៀត។

សូមជម្រាបថា បើយោងតាមតួលេខផ្លូវការពីមជ្ឈមណ្ឌលព័ត៌មានកូវីដ​១៩​របស់រដ្ឋាភិបាលថៃ, ករណីឆ្លងជំងឺនេះ បានកើនឡើង​គួរ​ឲ្យ​កត់​សម្គាល់ ដោយមានមនុស្សឆ្លងសរុប ៧១ ០៦៧ នាក់ និងស្លាប់ ១៩​នាក់ចន្លោះថ្ងៃទី​១​ខែមករា ដល់ថ្ងៃទី​១៤​ខែឧសភា ដ្បិតតួលេខក្រៅផ្លូវការ កើនខ្ពស់ហួសនេះក៏ដោយ។

ករណីឆ្លងកូវីដ​១៩នៅប្រទេសថៃផ្ទុះខ្លាំង ជា​ពិសេស​បន្ទាប់ពី​ចប់ពិធី​​​បុណ្យសង្ក្រាន្ត​ ដោយ​ក្នុងអំឡុងពេលនោះ ចំនួនករណីឆ្លងបានកើនឡើងជាលំដាប់ ភាគ​ច្រើន​ជា​ប្រភេទ Omicron XEC ថ្មីដែលឆ្លងលឿនជាងមុន៕

អត្ថបទ៖ សុខ សុវណ្ណ

ចុចអាន៖ ស្លាប់​១៩នាក់ និង​ឆ្លងជាង​ ៧ម៉ឺន​​នាក់​នៅ​ថៃ ព្រោះ​រលកថ្មី​នៃ​ជំងឺ​កូវីដ​១៩