ស្លាប់​១៩នាក់ និង​ឆ្លងជាង​ ៧ម៉ឺន​​នាក់​នៅ​ថៃ ព្រោះ​រលកថ្មី​នៃ​ជំងឺ​កូវីដ​១៩

ករណីឆ្លងកូវីដ​១៩ បានកើនឡើង​គួរ​ឲ្យ​កត់​សម្គាល់​នៅក្នុងប្រទេសថៃ ដោយមានអ្នកឆ្លងសរុបចំនួន ៧១ ០៦៧ នាក់ និងមានអ្នកស្លាប់ចំនួន ១៩​នាក់ចន្លោះថ្ងៃទី​១​ខែមករា ដល់ថ្ងៃទី​១៤​ខែឧសភា។ នេះបើយោងតាម​របាយការណ៍​មជ្ឈមណ្ឌលព័ត៌មាន កូវីដ​១៩​របស់រដ្ឋាភិបាលថៃ។

យោងតាមការចេញផ្សាយរបស់សារព័ត៌មាន ​The Nation ករណីឆ្លងកូវីដ​១៩នៅក្នុងប្រទេសថៃនៅតែបន្តកើនឡើង ជា​ពិសេស​បន្ទាប់ពី​ចប់​​​បុណ្យសង្ក្រាន្ត​ ដោយ​ក្នុងអំឡុងពេលនោះ ចំនួនករណីឆ្លងបានកើនឡើងជាលំដាប់ ភាគ​ច្រើន​ជា​ប្រភេទ Omicron XEC ថ្មីដែលឆ្លងលឿនជាងមុន។

ទិន្នន័យពីនាយកដ្ឋានវិទ្យាសាស្ត្រវេជ្ជសាស្ត្រ បាន​បង្ហាញ​ថា វត្តមាននៃ​កូវីដ​ប្រភេទ Omicron XEC កើន​ឡើង​ខ្លាំង​​នៅ​ថៃ​ក្នុង​អំឡុង​​ខែមករា និងខែ​កុម្ភៈ។ អាជ្ញាធរ​អំពាវនាវ​ឲ្យ​ប្រជាពលរដ្ឋ​បន្ត​ប្រុង​ប្រយ័ត្ន តាមដាន​រោគសញ្ញា លាងដៃ​ឱ្យបាន​ញឹកញាប់ និង​ពាក់​ម៉ាស់​នៅ​កន្លែង​មាន​មនុស្ស​កកកុញ​។

ប្រភេទ​កូវីដ Omicron XEC ទើប​លេចចេញ​រូបរាង​ថ្មី ហើយ​ត្រូវបានកំណត់អត្តសញ្ញាណដំបូងក្នុងប្រទេសអាល្លឺម៉ង់ក្នុងខែមិថុនា​ឆ្នាំ២០២៤។ វាគឺជាកូនកាត់នៃប្រភេទរងពីរ​គឺ KS.1.1 (FLiRT) និង KP.3.3 (FLuQE)។ XEC ឆ្លងលឿនជាងមុន ហើយឥឡូវនេះវាត្រូវបានគេរកឃើញនៅក្នុងប្រទេសយ៉ាងហោចណាស់ ១៥ នៅទូទាំងទ្វីបអឺរ៉ុប អាមេរិកខាងជើង និងអាស៊ី។

ទិន្នន័យពីសហរដ្ឋអាមេរិក ចក្រភពអង់គ្លេស និងចិនបង្ហាញថា XEC រីករាលដាល​ពី ៨៤​ទៅ​១១០% លឿនជាងប្រភេទ Omicronផ្សេងទៀត និង​មាន​ចំនួន​ប្រមាណ ១០-២០% នៃការឆ្លងថ្មីនៅក្នុងតំបន់មួយចំនួន៕

អត្ថបទ៖ ប៊ុន សុភាព