ផ្លូវបេតុងថ្មីប្រវែង៤០០ម៉ែត្រ នឹងបញ្ចប់ការ​សាង​សង់​នាពេលខាងមុខ ដើម្បីផ្តល់ភាពងាយស្រួលដល់ពលរដ្ឋក្នុងឃុំមេម៉ង់ ស្រុកកែវសីមា

ហេដ្ឋារចនាសម្ព័ន្ធគឺជាសរសៃឈាមសេដ្ឋកិច្ចដែលមិនអាចខ្វះបានក្នុងខេត្តមណ្ឌលគិរី ហើយបានលេចរូបរាងឡើងជាបន្តបន្ទាប់ដើម្បីបង្កើនភាពងាយស្រួលក្នុងការធ្វើចរាចរដល់ប្រជាពលរដ្ឋក្នុងមូលដ្ឋាន ក៏ដូចជាអ្នកធ្វើដំណើរផ្សេងៗទៀត។

ជាក់ស្ដែងផ្លូវបេតុងអាមេដែលមានប្រវែង៤០០ម៉ែត្រ ទទឹង៦ម៉ែត្រ និងកម្រាស់០.១៥ម៉ែត្រ បានស្ថាបនារួចរាល់ នឹងអាចអនុញ្ញាតឲ្យចរាចរបាននៅពេលឆាប់ៗខាងមុខនេះ ដែលស្ថិតក្នុងភូមិទួល ឃុំមេម៉ង់ ស្រុកកែវសីមា ខេត្តមណ្ឌលគិរី។

លោក ចាន់ សាមេន មេឃុំរដ្ឋបាលមេម៉ង់ បានប្រាប់ «កម្ពុជាថ្មី» ឲ្យដឹងថា នៅមិនយូរទៀតទេ ផ្លូវប្រវែង៤០០ម៉ែត្រ និងស្ពានឈើក្បាលបេតុងចំនួន១ នឹងអាចអនុញ្ញាតឲ្យប្រជាពលរដ្ឋទូទៅធ្វើចរាចរណ៍បានដោយសេរីដើម្បីបង្កើនសុវត្ថិភាពងាយស្រួលធ្វើដំណើរបន្ទាប់ពីក្រុមហ៊ុនស្ថាបនារួចរាល់នៅពេលឆាប់ៗខាងមុខនេះ ដែលជាគម្រោង ថវិកាអភិវឌ្ឍន៍ឃុំក្នុងឆ្នាំ២០២៤។

លោកបន្តថា នាពេលកន្លងទៅកាលពីថ្ងៃទី១៦ ខែកញ្ញ ឆ្នាំ២០២៤ រដ្ឋបាលឃុំបានធ្វើការដេញថ្លៃគម្រោងឆ្នាំ២០២៤ ស្ពានឈើក្បាលបេតុងចំនួន១ និងផ្លូវបេតុងអាមេដែលមានប្រវែង៤០០ម៉ែត្រ ទទឹង០៦ម៉ែត្រ និងកម្រាស់០.១៥ម៉ែត្រ តភ្ជាប់ពីផ្លូវបេតុងរបស់ឃុំដែលមានស្រាប់។ ហើយក្នុងការដេញថ្លៃនោះ រដ្ឋបាលឃុំបានសម្រេចឲ្យទៅក្រុមហ៊ុន «អេចប៊ី អេសឌី ខនស្រ្តាក់សិន» ដែលបានដេញថ្លៃទាបជាងគេត្រឹម ៣៥៨.៨៤០.០០០រៀល។

លោកមេឃុំរូបនេះបានបញ្ជាក់ថា ក្រោយពីក្រុមហ៊ុនគោរពទៅតាមកិច្ចសន្យានាពេលកន្លងមក និងចាប់ផ្តើមសាងសង់ហើយឃើញថា​ ជាក់ស្តែងសម្រេចបាន ៣០%ហើយ និងនៅសល់៧០%ទៀតនឹងបញ្ចប់ការសាងសង់នៅពេលឆាប់ៗខាងមុខ នឹងអាចឲ្យប្រជាពលរដ្ឋគ្រប់រូបចរាចរណ៍បានដោយសុវត្ថិភាព៕

អត្ថបទ៖ រៀម សុខហេង