យន្តហោះប្រណីតដែលសែរាជវង្សកាតា ប្រទានឲ្យលោក ត្រាំ បានដល់ដៃ អាមេរិក ហើយ

ដ្បិតមានការរិះគន់ដូចទឹកបាក់ទំនប់ក៏ដោយ ទីបំផុតសហរដ្ឋអាមេរិក ទទួលបានយន្តហោះប្រណីត Boeing 747 ដែលជាព្រះរាជអំណោយប្រទានដោយសែរាជវង្សកាតា ជូនលោកដូណាល់ ត្រាំ ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ AFP, អ្នកនាំពាក្យមន្ទីរបញ្ចកោណលោក Sean Parnell បានចេញសេចក្តីថ្លែងការណ៍កាលពីថ្ងៃពុធទី២១ខែឧសភាឆ្នាំ២០២៥ថា «រដ្ឋមន្ត្រីការពារជាតិ បានទទួលយកយន្តហោះ Boeing 747 ពីប្រទេសកាតា ស្របតាមច្បាប់ និងបទប្បញ្ញត្តិរបស់សហព័ន្ធទាំងអស់។ យ៉ាងណា យន្តហោះនេះនឹងត្រូវកែកុននិងធ្វើទំនើបកម្មបន្ថែមទៀតសិន មុនពេលយកទៅប្រើជាផ្នែកមួយនៃយន្តហោះ Air Force One ដែលជាមធ្យោបាយដឹកជញ្ជូនតាមផ្លូវអាកាសផ្លូវការរបស់លោកប្រធានាធិបតី»។

Boeing 747 ត្រូវការពេលច្រើនឆ្នាំទៀត ដើម្បីបំពាក់ជាមួយប្រព័ន្ធសុវត្ថិភាពបន្ថែមសម្រាប់ដឹកប្រធានាធិបតី រួមទាំងសមត្ថភាពក្នុងការទប់ទល់នឹងរលកសញ្ញាអេឡិចត្រូម៉ាញ៉េទិច ពីការផ្ទុះនុយក្លេអ៊ែរ និងការចាក់សាំងនៅលើអាកាសផងដែរ។

រឿងរ៉ាវពាក់ព័ន្ធយន្តហោះនេះ បានទាក់ទាញការរិះគន់យ៉ាងចាស់ដៃពីសំណាក់អ្នកប្រជាធិបតេយ្យ ក្នុងនោះរួមមានទាំងមេដឹកនាំសំឡេងភាគតិចព្រឹទ្ធសភា លោក Chuck Schumer និងអ្នកតំណាង Adam Schiff ផងដែរ ដែលអំពាវនាវ​ឲ្យ​មានការស៊ើបអង្កេតលើការបំពាន​រដ្ឋធម្មនុញ្ញ​ ដែលហាមឃាត់​​មន្ត្រីអាមេរិក​ពីការ​ទទួលយក​អំណោយ​ពី​រដ្ឋាភិបាល​បរទេស​ដោយគ្មានការយល់ព្រមពីសភា។

ទោះបីជាយ៉ាងណាក៏ដោយ លោកត្រាំ បានចេញមុខនិយាយការពារខ្លួន ដោយប្រកាសក្តែងៗថា បើមិនព្រមទទួលយកព្រះរាជអំណោយដ៏សប្បុរសនេះ មានតែមនុស្សឆ្កួត! លោកប្រាប់ទៅអ្នកកាសែតនៅសេតវិមានកាលពីថ្ងៃទី១២ខែឧសភាថា «មានតែមនុស្សឆ្កួតប៉ុណ្ណោះដែលមិនព្រមទទួលយកព្រះរាជអំណោយនេះ។ វាជាកាយវិការនៃសុច្ឆន្ទៈ ខ្ញុំមិនបដិសេធការផ្តល់ជូនបែបនេះទេ។ បើឆ្លើយថាទេ នោះខ្ញុំជាមនុស្សល្ងង់បាត់ហើយ តែយើងក៏មិនចង់ទទួលយកយន្តហោះថ្លៃៗបែបនេះដោយទទេៗដែរ»។

សូមជម្រាបជាថ្មី យន្តហោះតម្លៃប្រហែល ៤០០លានដុល្លារមួយគ្រឿងនេះ នឹងត្រូវបរិច្ចាគទៅបណ្ណាល័យប្រធានាធិបតីរបស់លោកត្រាំនាពេលអនាគត សម្រាប់ដាក់តាំងបង្ហាញក្រោយចាកចេញពីសេតវិមាន ដែលស្រដៀងទៅនឹងបណ្ណាល័យរបស់អតីតប្រធានាធិបតី Ronald Reagan ដែលរក្សាទុកយន្តហោះ Air Force One ស៊េរីចាស់ដែរ៕

អត្ថបទ៖ សុខ សុវណ្ណ

ចុចអាន៖ ត្រាំ៖ បើមិនទទួលអំណោយយន្តហោះប្រណីតតម្លៃ ៤០០លានពីកាតា មានតែមនុស្សឆ្កួត!