កីឡា

Nick Taylor ចាត់ទុកក្លិបព្រះខ័នរាជស្វាយរៀងល្អបំផុតនៅកម្ពុជា ដោយមានអ្វីគ្រប់យ៉ាង

បានផុស

២៦ នាទីutes មុន

នៅ

ថ្ងៃសុក្រ ២៣ ឧសភា ២០២៥

ដោយ

ខ្សែបម្រើការពារខ្មែរ-អាមេរិក Nick Taylor បានលើកឡើងពីលក្ខណៈសម្បត្តិរបស់ក្លិបព្រះខ័នរាជស្វាយរៀងដែលរូបគេចាត់ទុកជាក្លិបល្អបំផុតនៅក្នុងប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយឈ្នះជើងឯកលីគកំពូលកម្ពុជារដូវកាល ២០២៤-២៥ កីឡាករ Nick Taylor បានលើកឡើងថា វាជារដូវកាលមួយវែងដ៏អស្ចារ្យដែលក្រុមបានលេងជាង ៥០ ប្រកួត និងទីបំផុតទទួលបានភាពរីករាយតាមរយៈការឈ្នះជើងឯកលីគ។ អ្វីដែលកាន់តែពិសេសគឺការលើកពានលីគនៅកីឡដ្ឋានខេត្តស្វាយរៀងចំពោះមុខអ្នកគាំទ្ររបស់ខ្លួនរាប់ពាន់នាក់។

កីឡាករបាននិយាយថា ៖«ប្រាកដណាស់ ខ្ញុំគិតថា កីឡាករយើងមានគុណភាពច្រើន។ យើងជាក្រុមដ៏ល្អ ខ្ញុំមិនដឹងថា ពន្យល់ដូចម្តេចទេ តែយើងជាក្រុមខ្លាំង។ កីឡាករជាច្រើនមានគុណភាព មិនមែន១១នាក់ ឬ១៥នាក់ទេ តែកីឡាករភាគច្រើនគឺល្អ។ វាជាការប្រកួតប្រជែងដ៏តានតឹង ហើយកីឡាករអាចលេងបានយ៉ាងល្អ»។

«ខ្ញុំគិតថា ភាពខ្លាំងរបស់យើងក្នុងឆ្នាំនេះគឺយើងមានការប្រកួតជាង៥០លើក។ កីឡាករជាច្រើនបានលេង កីឡាករជាច្រើនមានសមត្ថភាព និងបានបង្ហាញខ្លួនលើទីលាន។ ទាំងនេះហើយដែលជាភាពខ្លាំងរបស់យើងរហូតបានឈ្នះជើងឯកលីគឆ្នាំនេះ។ យើងមានក្រុមការងារគ្រូបង្វឹកដ៏ល្អ យើងមានថ្នាក់ដឹកនាំដ៏ល្អ។ ក្លិបមានអ្វីៗគ្រប់យ៉ាង ដូច្នេះច្បាស់ណាស់ ព្រះខ័នរាជស្វាយរៀង គឺជាក្លិបបាល់ទាត់ល្អបំផុតនៅកម្ពុជា»។

Nick បានពន្យល់ថា ៖«យើងមានអ្នកគាំទ្រច្រើន របៀបលេង ការគ្រប់គ្រង ថ្នាក់ដឹកនាំគឺ អ្វីៗគ្រប់យ៉ាងគឺល្អបំផុត។ ជាពិសេស យើងចង់ឈ្នះពានឲ្យបានច្រើនក្នុងឆ្នាំនេះ គឺចង់ឈ្នះពានទាំងអស់»។

កីឡាករបានបន្តថា រឿងដ៏ខកចិត្តបំផុតគឺចាញ់ការប្រកួតវគ្គផ្តាច់ពានរង្វាន់ AFC Challenge League ហើយរហូតដល់ពេលនេះរូបគេនៅតែឈឺចាប់ និងសោកស្តាយ។

«ខ្ញុំមិនចង់សម្លឹងមើលមេដាយប្រាក់ដែលយើងទទួលបានទេ ពីព្រោះខ្ញុំគិតថា ការប្រកួតនោះ យើងគួរតែឈ្នះ។ ខ្ញុំគិតថា យើងលេងបានល្អជាងពួកគេ។ ជាពិសេស យើងលេងនៅចំពោះមុខអ្នកគាំទ្រ៣២០០០នាក់»។ សំដីរបស់កីឡាករ Nick Taylor។

Nick Taylor ត្រូវបានមហាជនឃើញជាកីឡាករទទួលបានជោគជ័យបំផុត បន្ទាប់ពីចូលរួមជាមួយក្លិបព្រះខ័នរាជស្វាយរៀងកាលពីឆ្នាំ២០២៣ ដោយបានឈ្នះជើងឯកលីគ២កំពូលកម្ពុជា២រដូវកាលជាប់គ្នា ឈ្នះពានខេមបូឌានស៊ុបភើខាប់ ឈ្នះពានសម្តេចតេជោ ហ៊ុន សែន និងកំពុងឈានដល់វគ្គផ្តាច់ព្រ័ត្រទៀត ព្រមទាំងទទួលបានចំណាត់ថ្នាក់លេខ២ពានអាស៊ី AFC Challenge League។ ជាពិសេស រូបគេទទួលបានជោគជ័យទាំងស្នេហា និងការងារក្រៅពីបាល់ទាត់៕