បាងកក ប្រឈមគ្រោះទឹកជំនន់

រដ្ឋបាលក្រុងបាងកកកំពុងចាត់វិធានការដើម្បីត្រៀមទប់ទល់នឹងគ្រោះទឹកជំនន់ ខណៈទឹកទន្លេ ចៅប្រាយ៉ា កំពុងហក់ឡើងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលក្រុងបានណែនាំឲ្យមន្ត្រីពាក់ព័ន្ធទាំងឡាយត្រូវត្រៀមវិធានការទប់ទល់ ក៏ដូចជាចុះទៅពិនិត្យជញ្ជាំងការពារទឹកជំនន់និងហេដ្ឋារចនាសម្ព័ន្ធនានានៅតាមដងទន្លេចៅប្រាយ៉ា ព្រមទាំងតាមប្រឡាយKhlong Bangkok Noi, Khlong Mahasawt និង Khlong Phrakhanong ផងដែរ។

ទន្ទឹមនោះ អាជ្ញាធរថៃក៏ព្រមានឲ្យខេត្តចំនួន១១ដែលស្ថិតនៅខ្សែទឹកខាងក្រោមនៃទន្លេចៅប្រាយ៉ា ត្រូវប្រុងប្រយ័ត្នចំពោះទឹកជំនន់រហ័សផងដែរ ព្រោះទំនប់នេះនឹងបើកបង្ហូរទឹក នៅប៉ុន្មានថ្ងៃទៀត។

តាមសេចក្តីរាយការណ៍របស់ The Nation កាលពីថ្ងៃព្រហស្បតិ៍ទី២៩ខែឧសភាឆ្នាំ២០២៥, ខេត្តទាំង១១ដូចជា Uthai Thani, Chai Nat, Singburi, Ang Thong, Ayutthaya, Suphanburi, Lopburi, Pathum Thani, Nonthaburi​ និង Samut Prakan បូករួមជាមួយរាជធានីបាងកក មួយទៀត នឹងមានការហក់ឡើងនូវកម្ពស់ទឹកពី ០.៥០ ទៅ ១.៣០ម៉ែត្រ នៅប៉ុន្មានថ្ងៃខាងមុខ។

ជុំវិញបញ្ហានេះ ប្រធាននាយកដ្ឋានលូនិងប្រព័ន្ធលូបង្ហូរនៃប្រទេសថៃ Jessada Chandraprabha និយាយថា រដ្ឋបាលក្រុងបាងកក កំពុងសម្របសម្រួលជាមួយនាយកដ្ឋានធារាសាស្ត្រ, នាយកដ្ឋានជលសាស្ត្រ, កងទ័ពជើងទឹកថៃនិងភ្នាក់ងារផ្សេងៗទៀត ដើម្បីតាមដានស្ថានភាព និងចេញការព្រមាននៅពេលចាំបាច់។

រម្លឹកទៅកាលពីឆ្នាំ២០២២បន្តិច ពេលនោះ នាយកមជ្ឈមណ្ឌលបម្រែបម្រួលអាកាសធាតុ និងគ្រោះមហន្តរាយ នៃសាកលវិទ្យាល័យ Rangsit បានបង្ហាញផែនទីដែលលាតត្រដាងឲ្យឃើញ ទីក្រុងបាងកក និងតំបន់ជុំវិញខ្លួន ប្រឈមហានិភ័យលិចលង់ ហើយបាត់ខ្លួននៅត្រឹមឆ្នាំ ២១០០។ 

លោកអះអាងថា ប្រសិនបើរដ្ឋាភិបាល មិន​​ធ្វើ​អ្វី​ដើម្បី​ទប់​ស្កាត់​រឿង​នេះ​ទេនោះ ​រាជធានីចាំបាច់ត្រូវតែផ្លាស់ទីតាំងទៅកន្លែងផ្សេង៕

អត្ថបទ៖ សុខ​ សុវណ្ណ

ចុចអាន៖ ខេត្តថៃរងគ្រោះជំនន់ទឹកភ្លៀងជាបន្តបន្ទាប់