ខ្វះទុនផលិតកុន! ហ៊ុយ យ៉ាឡេង ប្រកាសលក់ក្រលៀនមួយចំហៀង តែមតិភាគច្រើនមិនពេញចិត្តនឹងទង្វើនេះ

ដោយបង្ហាញនូវឆន្ទ:ស្រលាញ់វិស័យភាពយន្ត លោក ហ៊ុយ យ៉ាឡេង ដែលជាផលិតករល្បីឈ្មោះបានសម្រេចចិត្តប្រកាសលក់ក្រលៀនរបស់ខ្លួន ដើម្បីយកលុយធ្វើដើមទុនផលិតរឿង “ព្រះរស់” ដែលជាភាពយន្តជីវិតនិយាយអំពីគុណមាតាបិតា។ យ៉ាងណា ការប្រកាសនេះ មានសាធារណជនមួយចំនួនបានសម្តែងការកោតសរសើរ ខណៈខ្លះទៀត ក៏បង្ហាញការមិនពេញចិត្តនឹងទង្វើនេះឡើយ ហើយថែមទាំងបានរិះគន់លើកុនមួយចំនួនរបស់លោកថែមទៀត។

កន្លងមក ផលិតកររូបនេះតែងប្រកាសលក់ទ្រព្យរបស់ខ្លួនដើម្បីផលិតកុន ខុសប្លែកតែលើកនេះ លោកប្រកាសលក់ក្រលៀនខ្លួនឯងដើម្បីផលិតកុន។ អ្នកដឹកនាំរឿង “ដើម្បីកូន” លោក ហ៊ុយ យ៉ាឡេង បានបញ្ជាក់ថា ជីវិតលោកបើមិនបានផលិតភាពយន្ត គឺស្មើនឹងស្លាប់ ដូច្នេះទើបលោកប្រកាសលក់ក្រលៀនមួយចំហៀង ដើម្បីបានថវិការថតភាពយន្ត ខណៈត្រូវការទុនដល់ទៅ ៦ម៉ឺនដុល្លារ ដើម្បីថតភាពយន្តរឿង “ព្រះរស់” ជាសាច់រឿងដែលនិយាយពីគុណរបស់មាតាបិតា។

តាមរយៈសំណេរលើគណនីហ្វេសប៊ុកផ្ទាល់ខ្លួន លោក ហ៊ុយ យ៉ាឡេង បានរៀបរាប់ថា “ខ្ញុំអស់អ្វីលក់ហើយ សង្ឃឹមបងប្អូនជួយម្នាក់បន្តិចៗ ដើម្បីឱ្យខ្ញុំបាទបានថវិការថតហើយខ្ញុំនឹងបរិច្ចាគក្រលៀនមួយចំហៀងទៅបងប្អូនដែលខ្វះខាតហើយត្រូវការ សង្ឃឹមបងប្អូនដែលបានទស្សនាភាពយន្តរបស់ខ្ញុំទាំងអស់ជួយខ្ញុំហើយខ្ញុំនឹងសងគុណទៅបងប្អូនដែលជួយខ្ញុំវិញដោយទស្សនាភាពយន្តរបស់ខ្ញុំដោយមិនគិតថ្លៃពេញមួយជីវិត”។

ផលិតកររូបនេះបន្តថា លោកសន្យានឹងខំប្រឹងផលិតភាពយន្តខ្មែរ ដើម្បីផ្សព្វផ្សាយទៅក្រៅប្រទេស ខណៈពេលនេះលោកកំពុងធ្វើការជាមួយមិត្តចិន ដើម្បីយកភាពយន្តរឿង “ដើម្បីកូន” ចាក់ផ្សាយនៅទូរទស្សន៍ចិន CCTC6 ដោយសង្ឃឹមថានឹងបានជោគជ័យ និងសង្ឃឹមថាមហាជនជួយតាមលទ្ធភាពដើម្បីជួយផលិតភាពយន្តរឿង “ព្រះរស់”។

ជុំវិញការប្រកាសនេះ ធ្វើឱ្យសាធារណជន រួមទាំងអ្នកផលិតមាតិកាមួយចំនួន បង្ហាញការមិនពេញចិត្តនឹងទង្វើនេះផងដែរ ដោយយល់ថា ជាទម្លាប់ដដែលៗដែលផលិតកររូបនេះធ្វើក្នុងន័យផ្សព្វផ្សាយកុនរបស់ខ្លួនប៉ុណ្ណោះ។

សូមបញ្ជាក់ថាផលិតករភាពយន្តខ្មែរ លោកហ៊ុយ យ៉ាឡេង ថ្វីដ្បិតកន្លងទៅ លោកត្រូវខាតបង់អស់ទ្រព្យពីខ្លួនក្នុងការផលិតរឿងក៏ពិតមែន ប៉ុន្តែលោកនៅក្សាជំហរ និងឆន្ទ:សម្រាប់លើកស្ទួយវិស័យសិល្ប:របស់ខ្មែរ ដើម្បីផ្សព្វផ្សាយទៅកាន់ពិភពលោក។ ជាឆន្ទ:របស់លោក ហ៊ុយ យ៉ាឡេង ក៏បានធ្វើកាសន្យាដោយខិតខំប្រឹងឱ្យអស់លទ្ធភាព ដើម្បីចូលរួមការពារថែរក្សាលើកតម្កើងសិល្បៈទៅកាន់ពិភពលោក៕ ចាន់រ៉ា