ព័ត៌មានអន្ដរជាតិ

ទាហានអ៊ីស្រាអែលជាង ១ម៉ឺននាក់ ស្លាប់និងរបួសនៅក្នុងតំបន់ហ្គាហ្សា

បានផុស

១៥ វិនាទី មុន

នៅ

ថ្ងៃអង្គារ ៣ មិថុនា ២០២៥

ដោយ

Chheang

យោងតាមការចុះផ្សាយនៅថ្ងៃអង្គារទី៣ខែមិថុនាឆ្នាំ២០២៥របស់កាសែត Yedioth Ahronoth ទាហានអ៊ីស្រាអែលជាង ១០ ០០០នាក់ត្រូវបានសម្លាប់ ឬរងរបួសចាប់តាំងពីការចាប់ផ្តើមនៃសង្រ្គាមក្នុងតំបន់ហ្គាហ្សាស្ទ្រីប។

កងកម្លាំងអ៊ីស្រាអែលនៅតំបន់ហ្គាហ្សា (រូបថត៖ IDF)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីដែលមិនបញ្ចេញឈ្មោះមួយរូបបានប្រាប់កាសែតអ៊ីស្រាអែលថា៖ «យើងបាត់បង់ទាហានជាង ១ម៉ឺននាក់ដែលបានស្លាប់ ឬរងរបួស និង២ទៅ៣ពាន់នាក់ផ្សេងដែលកើតមានជំងឺស្ត្រេសក្រោយការប៉ះទង្គិចផ្លូវចិត្ត»។

កន្លងមកបើយោងតាមតួលេខផ្លូវការរបស់យោធាអ៊ីស្រាអែល យ៉ាងហោចណាស់ទាហាន ៨៦១នាក់ត្រូវបានសម្លាប់ និង ៥ ៩២១នាក់ផ្សេងទៀតបានរងរបួសក្នុងសង្គ្រាមនៅតំបន់ហ្គាហ្សាចាប់តាំងពីខែតុលាឆ្នាំ២០២៣។

ដោយបដិសេធការអំពាវនាវរបស់អន្តរជាតិលើបទឈប់បាញ់ អ៊ីស្រាអែលបានបន្តការវាយលុកដ៏សាហាវនៅតំបន់ហ្កាហ្សាចាប់តាំងពីខែតុលាឆ្នាំ២០២៣ ដោយបានសម្លាប់ប្រជាជនប៉ាឡេស្ទីនជិត ៥៤ ៥០០នាក់ ដែលភាគច្រើនជាស្ត្រី និងកុមារ។ នេះបើតាមទិន្នន័យពីក្រសួងសុខាភិបាលដែលគ្រប់គ្រងដោយក្រុមសកម្មប្រយុទ្ធប៉ាឡេស្ទីនហាម៉ាស។

ទីភ្នាក់ងារជំនួយបានព្រមានអំពីហានិភ័យនៃគ្រោះទុរ្ភិក្សក្នុងចំណោមមនុស្សជាង ២លាននាក់នៃតំបន់ហ្គាហ្សា។
កាលពីខែវិច្ឆិកាឆ្នាំមុន តុលាការឧក្រិដ្ឋកម្មអន្តរជាតិបានចេញដីកាចាប់ខ្លួននាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ និងអតីតរដ្ឋមន្ត្រីការពារជាតិរបស់គាត់លោក Yoav Gallant ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ។

អ៊ីស្រាអែលក៏ប្រឈមនឹងសំណុំរឿងប្រល័យពូជសាសន៍នៅតុលាការយុត្តិធម៌អន្តរជាតិផងដែរសម្រាប់ឧក្រិដ្ឋកម្មសង្គ្រាមប្រឆាំងជនស៊ីវិលនៅក្នុងតំបន់ហ្គាហ្សា៕

ដោយ៖ ឈាង