សេដ្ឋកិច្ច

ហាងទំនិញ និងអាហារដ្ឋានជាង ៨០ បោះទីតាំងបើកអាជីវកម្មនៅព្រលានយន្តហោះអន្តរជាតិតេជោ

បានផុស

១១ ខែ មុន

នៅ

ថ្ងៃសុក្រ ៦ មិថុនា ២០២៥

ដោយ

លោកឧកញ៉ា ឆារស៍ វ៉ាន់ អភិបាលក្រុមហ៊ុន CAIC បានប្រាប់ឱ្យដឹងនៅថ្ងៃទី ០៦ ខែមិថុនា ឆ្នាំ ២០២៥ថា ហាងលក់ទំនិញ អាហារដ្ឋានជាង ៨០ បានបើកអាជីវកម្មនៅក្នុងអាកាសយានដ្ឋានអន្តរជាតិតេជោ ដែលនឹងគ្រោងដាក់ឱ្យដំណើការនៅថ្ងៃទី៩ ខែកញ្ញាខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧកញ៉ា ឆារស៍ វ៉ាន់បញ្ជាក់ថា៖ «ហាងទាំងខាងក្នុង និងខាងក្រៅជាង ៨០ បានចុះកុងត្រាចប់សព្វគ្រប់អស់ហើយ ពេលនេះយើងមានប្រមាណ ១០០ ហាងទៀត ដែលគេចាប់អារម្មណ៍ចង់ចូលមក ដែលយើងអត់មានទីតាំងអោយគេ អញ្ចឹងទេ យើងទុកនៅក្នុងបញ្ជីរង់ចាំជូនគាត់ ដើម្បីថា ថ្ងៃក្រោយបើមាននរណាចេញទៅ យើងឱ្យគាត់ចូលមក ហើយនៅពេលដែលយើងគូប្លង់ គឺយើងគិតថា ប៉ុណ្ណឹងសមរម្យហើយ តែជាក់ស្ដែងអ្នកដែលចង់បានត្រូវការច្រើនជាងទីតាំងដែលយើងមាន»។

ក្រុមហ៊ុនធំៗ ដែលបើកអាជីវកម្មដូចជាក្រុមហ៊ុន Lagardère Travel Retail SAS នៅបារាំង និងដៃគូសហការក្នុងស្រុក HSC Group ក្នុងការលក់ទំនិញរួចពន្ធ ទំនិញបង់ពន្ធរួច សំលៀកបំពាក់ សម្ភារសម្រាប់ធ្វើដំណើរសំខាន់ៗ និងការផ្ដល់សេវាកម្មម្ហូបអាហារ នៅព្រលានយន្តអន្តរជាតិតេជោ។

មន្ត្រីស្ថានទូតបារាំងចុះទស្សនកិច្ចព្រលានយន្តហោះអន្តរជាតិតេជោថ្ងៃ ០៦ ខែមិថុនា ២០២៥

អាកាសយានដ្ឋានអន្តរជាតិតេជោលំដាប់ 4F ដំណាក់កាលទី១ តម្លៃ ១ ៥០០ លានដុល្លារ សាងសង់លើផ្ទៃដី ២ ៦០០ ហិកតា សម្រេចការសាងសង់ ៩៩% ដែលអាចឱ្យយន្តហោះខ្នាតធំឆ្លងទ្វីបចុះចតបាន។

អាកាសយានដ្ឋានអន្តរជាតិតេជោ នឹងបើកឱ្យប្រតិបត្តិការហោះហើរ នៅថ្ងៃទី៩ ខែកញ្ញា ឆ្នាំ២០២៥ ខណៈពិធីសម្ពោធជាផ្លូវការ រៀបចំធ្វើឡើងនៅថ្ងៃទី២០ ខែតុលា ឆ្នាំ២០២៥ ក្រោមអធិបតីភាព សម្ដេច ហ៊ុន ម៉ាណែត នាយករដ្ឋមន្ដ្រីកម្ពុជា។

អាកាសយានដ្ឋានអន្តរជាតិតេជោ ត្រូវបានជាប់ ឈ្មោះ ជា សំណង់ស្ថាបត្យកម្មដ៏អស្ចារ្យបំផុតមួយក្នុងចំណោម ១១-ស្ថាបត្យកម្មដ៏អស្ចារ្យបំផុតនៅ លើពិភពលោក ដោយដាក់ទីតាំងព្រលានយន្តហោះតេជោនៅជួរមុខនៃការរចនាប្រកប ដោយភាពច្នៃប្រឌិត និងនិរន្តរភាព។

អាកាសយានដ្ឋានអន្តរជាតិតេជោ នឹងមកជំនួសអាកាសយានដ្ឋានអន្តរជាតិភ្នំពេញបច្ចុប្បន្ន ដែលមានសមត្ថភាពបម្រើសេវាកម្មដឹកភ្ញៀវទេសចរណ៍បានរហូតដល់ទៅ ៦ដង លើសព្រលានបច្ចុប្បន្ន។

អាកាសយានដ្ឋានអន្តរជាតិតេជោមាន៣ដំណាក់កាល គឺដំណាក់កាលទី១ សាងសង់រួចរាល់នៅឆ្នាំ ២០២៥ អាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ ដែលអាចទទួលបានអ្នកដំណើរប្រមាណជា ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ៕