សភាពការណ៍តាមព្រំដែន រដ្ឋមន្ត្រីមហាផ្ទៃ ប្រាប់កម្លាំងឱ្យបង្កើនការប្រុងប្រយ័ត្នពីការឈ្លានពានរបស់បច្ចាមិត្ត

ថ្លែងចែករំលែកព័ត៌មានជុំវិញនឹងការវិវត្តសភាពការណ៍នៅក្នុងប្រទេសថៃ រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ស សុខា បាននិយាយថា ថៃកំពុងព្យាយាមបង្វែរបញ្ហាផ្ទៃក្នុងប្រទេសដ៏រញ៉េរញ៉ៃរបស់ខ្លួន មកភ្ជាប់នឹងរឿងព្រំដែនជាមួយកម្ពុជា ដើម្បីឱ្យមានការប្រឈមមុខដាក់គ្នាដោយកម្លាំងប្រដាប់អាវុធតាមខ្សែបន្ទាត់ព្រំដែន។ ក្នុងន័យនេះ រដ្ឋមន្ត្រីមហាផ្ទៃ បានប្រាប់ឱ្យកម្លាំងនគរបាលជាតិបង្កើនការប្រុងប្រយ័ត្នពីការឈ្លានពានរបស់បច្ចាមិត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងខ្លឹមសារដែលចេញផ្សាយដោយក្រុមអ្នកនាំពាក្យក្រសួងមហាផ្ទៃ ក្នុងគ្រាចុះសួរសុខទុក្ខ និងសំណេះសំណាលជាមួយកងកម្លាំងនគរបាលការពារព្រំដែន ក្បែរតំបន់មុំបី នាព្រឹកថ្ងៃទី១១ ខែមិថុនា ឆ្នាំ២០២៥ លោកនាយឧត្តមសេនីយ៍ ស សុខា «បានចែករំលែកព័ត៌មានសំខាន់ៗអំពីសភាពការណ៍នៅក្នុងប្រទេសថៃ ដែលពេលនេះ បាននិងកំពុងមានភាពរញ៉េរញ៉ៃ និងកំពុងព្យាយាមបង្វែរសភាពការណ៍ដ៏ស្មុគស្មាញនៅផ្ទៃក្នុងប្រទេសរបស់ខ្លួន មកបង្កើតជាព្រឹត្តិការណ៍នាំឱ្យមានការប្រឈមមុខដាក់គ្នាតាមខ្សែបន្ទាត់ព្រំដែនជាមួយកម្ពុជា»។

ក្នុងស្ថានភាពប្រែប្រួលគ្រប់ពេលវេលារបស់ភាគីថៃបែបនេះ លោកនាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដាក់បទបញ្ជាផ្ទាល់ដល់ថ្នាក់ដឹកនាំ និងកម្លាំងនគរបាលការពារព្រំដែនទាំងអស់ឱ្យបន្តបង្កើនការប្រុងប្រយ័ត្នគ្រប់ពេលវេលា និងត្រៀមលក្ខណៈឆ្លើយតបប្រកបដោយភាពម៉ឺងម៉ាត់តាមបទបញ្ជារបស់ថ្នាក់ដឹកនាំ។

ថ្លែងចេញពីបរិវេណទីបញ្ជាការវរសេនាតូចនគរបាលការពារព្រំដែនគោកលេខ១០៥ ស្ថិតនៅភូមិសែនតេជៈ ឃុំមរកត ស្រុកជាំក្សាន្ត ខេត្តព្រះវិហារ នាយឧត្តមសេនីយ៍ ស សុខា ក៏បាននាំភាពកក់ក្ដៅ និងថាមពលអង់អាចពីសម្ដេចធិបតី ប្រមុខរាជរដ្ឋាភិបាល ទៅគាំទ្រនគរបាលការពារព្រំដែន នៅតំបន់មុំបី ដែលបាននិងកំពុងឈរជើងបំពេញតួនាទី និងភារកិច្ចការពារដែនអធិបតេយ្យភាពជាតិ ជាមួយកម្លាំងកងទ័ពនៃកងយោធពលខេមរភូមិន្ទផងដែរ។

លោក បានថ្លែងចាត់ទុកបេសកកម្មរបស់នគរបាលការពារព្រំដែន ជាពិសេសក្នុងកាលៈទេសៈរងការប៉ុនប៉ងឈ្លានពានពីកងទ័ពថៃ នាពេលនេះ ជាការបញ្ជាក់នូវស្មារតីប្រកៀកស្មាយ៉ាងរឹងមាំនៃកងកម្លាំងរបស់ជាតិ ដូចគ្នានឹងស្មារតីរួបរួមគាំទ្ររាជរដ្ឋាភិបាលរបស់ប្រជាពលរដ្ឋខ្មែរទាំងក្នុង និងក្រៅប្រទេស។

នាយឧត្តមសេនីយ៍ រដ្ឋមន្ត្រីក្រសួងមហាផ្ទៃ បន្ថែមថា រាជរដ្ឋាភិបាល និយាយជារួម និងដោយឡែកក្រសួងមហាផ្ទៃ ក្នុងនាមជាសេនាធិការ រួមទាំងថ្នាក់ដឹកនាំរបស់រដ្ឋបាលថ្នាក់ក្រោមជាតិ និងស្នងការដ្ឋាននគរបាលគ្រប់រាជធានី ខេត្ត បានសហការគិតគូរប្រកបដោយការយកចិត្តទុកដាក់ខ្ពស់ ដើម្បីគាំទ្រជាជំនួយស្បៀងអាហារ សម្ភារៈដល់នគរបាលការពារព្រំដែន។

តំណាងកងកម្លាំងនគរបាលការពារព្រំដែន លោកនាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិប្រចាំទិសភូមិភាគទី៣ ទី៤ និងទី៥ បានថ្លែងអំណរគុណចំពោះលោកនាយឧត្តមសេនីយ៍ រដ្ឋមន្ត្រីក្រសួងមហាផ្ទៃ ព្រមទាំងថ្នាក់ដឹកនាំទាំងអស់ ដែលបានតែងតែផ្ដល់ការគាំទ្រ លើកទឹកចិត្ត និងផ្ដល់ភាពកក់ក្ដៅគ្រប់បែបយ៉ាងដល់នគរបាលការពារព្រំដែន៕