ព័ត៌មានអន្ដរជាតិ

ម៉ាឡេស៊ីប្តឹង Telegram ពីបទផ្សព្វផ្សាយមាតិកាបង្កគ្រោះថ្នាក់

បានផុស

៣៣ វិនាទី មុន

នៅ

ថ្ងៃព្រហស្បតិ៍ ១៩ មិថុនា ២០២៥

ដោយ

គណៈកម្មាការទំនាក់ទំនង និងពហុព័ត៌មានម៉ាឡេស៊ី (MCMC) បានដាក់ពាក្យបណ្តឹងរដ្ឋប្បវេណីប្រឆាំងនឹងក្រុមហ៊ុនបណ្ដាញទំនាក់ទំនង Telegram និងឆាណែលចំនួន ២ លើវេទិកានេះ ពីបទផ្សព្វផ្សាយមាតិកាបង្កគ្រោះថ្នាក់ ដែលអាចបំផ្លាញការជឿទុកចិត្តលើស្ថាប័នសាធារណៈ និងគំរាមកំហែងដល់សណ្តាប់ធ្នាប់សង្គម។ នេះបើតាមការចុះផ្សាយរបស់សារព័ត៌មាន Free Malaysia Today។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

MCMC បាននិយាយថា ឆាណែលទាំង ២ រួមមានឈ្មោះ «Edisi Siasat» និង «Edisi Khas» ត្រូវបានរកឃើញថា មានមាតិកា ដែលបំពានលើបទប្បញ្ញត្តិនៅក្រោមច្បាប់ទំនាក់ទំនង និងពហុព័ត៌មាន ឆ្នាំ ១៩៩៨។ គណៈកម្មាការនិយាយក្នុងសេចក្តីថ្លែងការណ៍ថា៖ «នេះជាចំណាត់លើកដំបូង ដែលធ្វើឡើងលើក្រុមហ៊ុនផ្ដល់សេវាកម្មបណ្ដាញសង្គម ជាពិសេសចាប់តាំងពីក្រុមហ៊ុន Telegram ទទួលបានអាជ្ញាប័ណ្ណអ្នកផ្តល់សេវាកម្ម»។

គណៈកម្មាការបានបន្តថា៖ «ចំណាត់ការនេះ ធ្វើឡើងបន្ទាប់ពី Telegram បរាជ័យយ៉ាងខ្លាំងក្នុងការដោះស្រាយមាតិកា ដែលមានគេរាយការណ៍ម្តងហើយម្តងទៀតទៅកាន់ក្រុមហ៊ុន ទោះបីជាមានការចរចា និងកិច្ចសហប្រតិបត្តិការជាច្រើនពី MCMC ក៏ដោយ»។

ដោយសារតែ Telegram មិនបានអនុវត្តតាម និយតករទូរគមនាគមម៉ាឡេស៊ីដដែលបាននិយាយថា ខ្លួនមានដីកាតុលាការ ដើម្បីបញ្ឈប់ការចែកចាយមាតិកាដែលបង្កគ្រោះថ្នាក់ និងការពារការបង្ហោះមាតិកាទាំងនោះបន្ថែមទៀត។ គណៈកម្មាការបានបន្ថែមថា Telegram មានសិទ្ធិការពារខ្លួនដោយយុត្តិធម៌។

មកទល់ពេលនេះ Telegram ដែលរងការត្រួតពិនិត្យក្នុងប្រទេសជាច្រើនទូទាំងពិភពលោក ជុំវិញការអនុញ្ញាតការចែកចាយ «មាតិកាខុសច្បាប់ ឬគ្រោះថ្នាក់» នោះ មិនទាន់បញ្ចេញប្រតិកម្មយ៉ាងណានោះទេ។

គួរគូសបញ្ជាក់ថា កាលខែមករា ម៉ាឡេស៊ីបានណែនាំច្បាប់បណ្ដាញសង្គមថ្មី ដែលតម្រូវវេទិកាបណ្ដាញសង្គម និងសេវាកម្មផ្ញើសារទាំងអស់ ដែលមានអ្នកប្រើប្រាស់ច្រើនជាង ៨ លាននាក់ ត្រូវចុះឈ្មោះទទួលអាជ្ញាប័ណ្ណ បើមិនដូច្នោះទេ ពួកគេត្រូវប្រឈមនឹងវិធានការផ្លូវច្បាប់។ ច្បាប់ថ្មីនោះ មានគោលបំណងដើម្បីដោះស្រាយកំណើនឧក្រិដ្ឋកម្មតាមអ៊ិនធឺណិត។ អាជ្ញាធរម៉ាឡេស៊ីរាប់ថា ការលេងល្បែងតាមអ៊ិនធឺណិត ការបោកប្រាស់ រូបភាពអាសអាភាសកុមារ ការគំរាមកំហែងតាមអ៊ិនធឺណិត និងមាតិកាទាក់ទងនឹងពូជសាសន៍ សាសនា និងរាជវង្ស ថាជាមាតិកាគ្រោះថ្នាក់៕