ព័ត៌មានជាតិ

ទោះបិទការនាំចូលពីថៃ ម្ហូបអាហារបន្លែត្រីសាច់ ផ្លែឈើ ជាផលិតផលខ្មែរ ត្រូវបានលក់ដូរយ៉ាងទូលំទូលាយគ្រប់គ្រាន់នៅផ្សារអូរឫស្សី

បានផុស

១២ ខែ មុន

នៅ

ថ្ងៃព្រហស្បតិ៍ ១៩ មិថុនា ២០២៥

ដោយ

ម្ហូបអាហារ បន្លែ ត្រី សាច់ និងផ្លែឈើជាច្រើនជាផលិតផលខ្មែរក្នុងស្រុក ត្រូវបានលក់ដូរយ៉ាងទូលំទូលាយនៅផ្សារអូរឫស្សី ទោះបីបិទការនាំចូលពីថៃក៏ដោយ ក៏មិនបង្កផលប៉ះពាល់ដល់ការលក់ដូររបស់អាជីវករក្នុងផ្សារឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡយ ស៊ាងអាង ប្រធានគណៈកម្មការគ្រប់គ្រងផ្សារអូរឫស្សី បានប្រាប់ឱ្យដឹងថា អាជីវករលក់ដូរក្នុងផ្សារ ក្រោមការគ្រប់គ្រងរបស់លោក បានលក់ដូរយ៉ាងទូលំទូលាយលើម្ហូបអាហារ បន្លែ ផ្លែឈើ ដោយមិនមានការព្រួយបារម្ភពីកង្វះខាតទំនិញក្នុងការលក់នោះទេ ខណៈប្រជាពលរដ្ឋជាច្រើន ក៏បានបន្តអញ្ជើញមកទិញអីវ៉ាន់របស់ខ្មែរផងដែរ ដោយមិនផ្តោតខ្លាំងលើទំនិញក្រៅស្រុក ជាពិសេសកសិករក្នុងស្រុកផលិតបានគ្រប់គ្រាន់សម្រាប់ផ្គត់ផ្គង់ប្រចាំថ្ងៃ។

ជាមួយនេះ អាជីវករលក់ដូរនៅផ្សារអូរឫស្សី ក៏បានសម្តែងក្តីពេញចិត្តក្នុងការលក់ដូរផលិតផលខ្មែរជូនប្រជាពលរដ្ឋខ្មែរយកទៅបរិភោគ ដោយពួកគាត់យល់ឃើញថា ការគាំទ្រផលិតផលខ្មែរមកលក់ដូរ ជាការជួយដល់សេដ្ឋកិច្ចប្រជាជនក្នុងស្រុក ក៏ដូចជាសេដ្ឋកិច្ចជាតិទាំងមូលផងដែរ។ ជាពិសេសប្រជាពលរដ្ឋបានបរិភោគ បន្លែ ត្រី សាច់ រស់ធម្មជាតិ របស់កសិករខ្មែរ និងប្រជាកសិករផលិតក្នុងស្រុកមានការសប្បាយចិត្ត ដោយពុំមានរបស់ក្រៅស្រុកហូរចូល។

សូមបញ្ជាក់ថា ប្រមុខរាជរដ្ឋាភិបាលកម្ពុជា កាលពីពេលថ្មីៗ នេះ បានសម្រេចបិទការនាំចូលបន្លែ ផ្លែឈើ ត្រី សាច់ ពីប្រទេសថៃ ក្រោយភាគីថៃបានបិទច្រកព្រំដែនអន្តរជាតិរវាងប្រទេសទាំង ២ ដោយឯកតោភាគី។

ការសម្រេចបិទការនាំចូលនេះ ធ្វើឡើងបន្ទាប់ពីរាជរដ្ឋាភិបាលបានទុកពេល ២៤ ម៉ោង ឱ្យភាគីថៃ បើកច្រកទ្វារព្រំដែនប្រទេសទាំង ២ ឱ្យវិលទៅរកភាពប្រក្រតីធម្មតាដូចដើមវិញ ប៉ុន្តែភាគីថៃ មិនបានធ្វើតាមការដាក់ឱសានវាទរបស់កម្ពុជាឡើយ គឺបន្តការបិទដោយឯកតោភាគីដដែល ទើបកម្ពុជាសម្រេចបិទទំនិញខាងលើនាំចូលពីប្រទេសថៃតែម្ដង៕

អត្ថបទ ៖ សុភា