​ជន​ស្រេកឃ្លាន​នៅហ្គាហ្សា​រាប់សិបនាក់​នៅតែស្លាប់​ដោយ​អ៊ីស្រាអែល​វាយប្រហារ​

យោងតាមប្រភពពីមន្ទីរពេទ្យយ៉ាងហោចណាស់ជនជាតិប៉ាឡេស្ទីន ៨២ នាក់ត្រូវបានសម្លាប់នៅទូទាំងតំបន់ហ្គាហ្សាកាលពីថ្ងៃសុក្រជាមួយនឹងការស្លាប់ចំនួន ៣៤ នាក់ ត្រូវបានរាយការណ៍នៅជិតមជ្ឈមណ្ឌលចែកចាយជំនួយនៅភាគកណ្តាលនិងភាគខាងត្បូងនៃតំបន់ហ្គាហ្សា។

យោងតាមការចេញផ្សាយរបស់សារព័ត៌មាន Al Jazeera ជនរងគ្រោះជាច្រើនគឺជាជនស៊ីវិលដែលកំពុងស្វែងរកអាហារ និងសម្ភារ​ប្រើប្រាស់​ចាំបាច់ ចំពេលមានវិបត្តិមនុស្សធម៌កាន់តែអាក្រក់ទៅៗ។ ចាប់តាំងពីការចែកចាយជំនួយបានចាប់ផ្តើមនៅថ្ងៃទី ២៧ ខែឧសភា អ្នកស្វែងរកជំនួយជាង៤០០នាក់ ត្រូវបានគេរាយការណ៍ថា បានស្លាប់ និងជាង ៣២០០នាក់បានរងរបួស។

មូលនិធិមនុស្សធម៌សម្រាប់តំបន់ហ្គាហ្សា (GHF) ដែលគាំទ្រដោយអ៊ីស្រាអែល និងសហរដ្ឋអាមេរិក បានប្រឈមមុខនឹង​ការរិះគន់ពីអង្គការសហប្រជាជាតិចំពោះការបរាជ័យក្នុងការធានាការផ្តល់ជំនួយប្រកបដោយសុវត្ថិភាព។ អង្គការយូនីសេហ្វបានព្រមានថា តំបន់ហ្គាហ្សាកំពុងប្រឈមមុខនឹងគ្រោះរាំងស្ងួតដែលបង្កើតឡើងដោយមនុស្ស ដោយប្រព័ន្ធទឹកភាគច្រើនត្រូវបានបំផ្លាញ ហើយកុមារប្រឈមនឹងការស្លាប់ដោយសារការស្រេកទឹក។

ទន្ទឹម​នឹង​នេះ សង្គ្រាម​របស់​អ៊ីស្រាអែល​លើ​តំបន់​ហ្គាហ្សា​នៅ​តែ​បន្ត​ទន្ទឹម​នឹង​ការ​បង្កើន​ភាព​តានតឹង​ជាមួយ​អ៊ីរ៉ង់។ ប្រធានាធិបតីតួកគីលោក Recep Tayyip Erdogan បានថ្កោលទោសសកម្មភាពរបស់អ៊ីស្រាអែល ដោយព្រមានថា ការវាយប្រហារកំពុងឈានដល់ «ចំណុចនៃការវិលត្រឡប់មកវិញ» និងជំរុញឱ្យមានបទឈប់បាញ់ជាបន្ទាន់៕

អត្ថបទ៖ ប៊ុន សុភាព