តើឃ្លា«​ Don’t Thai to Me » ដែល​កំពុងពេញនិយម មានន័យដូចម្ដេច​​?

ថ្មីៗនេះមានឃ្លាថ្មីមួយដែលគេកំពុងពេញនិយមប្រើដើម្បីជាការនិយាយលេងសើច ឌឺដង​ដាក់​គ្នា ជាពិសេសនៅលើបណ្ដាញសង្គមគឺឃ្លា «Don’t Thai to Me» ​សូម្បី​​អ្នក​មាន​មុខ​មាត់ មាន​ឋានៈខ្ពស់​ក្នុងសង្គម ក៏​មាន​ប្រើប្រាស់​​ឃ្លា​នេះ​ក្នុងបរិបទ​ដែល​កម្ពុជា​និងថៃ​មាន​ភាព​តានតឹង​យ៉ាងខ្លាំង​ក្នុង​​​វិវាទ​ព្រំដែន​​ រហូតដល់​ជះឥទ្ធិពល​​​ដល់​វិស័យផ្សេងៗ​ជាច្រើន​ទៀត។

តាមពិតទៅឃ្លានេះបានក្លាយជាការពាក្យពេញនិយមនៅក្នុង​ប្រទេសជាច្រើន​ក្នុង​តំបន់អាស៊ីអាគ្នេយ៍ ​ដូចជាក្នុងប្រទេស ម៉ាឡេស៊ី ហុងកុង និងសិង្ហបុរី តាំងពីឆ្នាំចន្លោះឆ្នាំ២០១៣-២០១៤ មកម្លេះ។ ទោះបីឃ្លានេះជាញឹកញាប់ប្រើក្នុងន័យលេងសើចក៏ដោយ តែបានបង្គប់អត្ថន័យមែនទែននិងនាំឲ្យផ្ទុះការវែកញែកជាច្រើនអំពីអត្ថន័យរបស់វាទៅនឹងសង្គមនិងវប្បធម៌របស់ប្រទេសថៃ។

តើ​អ្វីជាអត្ថន័យពិតប្រាកដ​នៃ​ឃ្លា “Don’t Thai To Me”?

តាមពិត ឃ្លា «Don’t Thai To Me» ត្រូវ​បាន​គេ​ប្រើប្រាស់​ក្នុង​ន័យទូទៅ​ថា «កុំ​កុហក​ខ្ញុំ» ឬ «កុំ​បោកប្រាស់​ខ្ញុំ»។

បើទោះបីឃ្លានេះមិនត្រឹមត្រូវតាមវេយ្យាករណ៍អង់គ្លេសក៏ដោយ អត្ថន័យរបស់វាត្រូវបានយល់យ៉ាងទូលំទូលាយនៅក្នុងបរិបទនៃពាក្យជាក្រៀមភាសា។ វាត្រូវបានគេប្រើជាញឹកញាប់នៅក្នុងស្ថានភាពដែលនរណាម្នាក់សង្ស័យថាអ្នកផ្សេងទៀតមានភាពមិនស្មោះត្រង់ ឬមានល្បិចកល។

យោងតាមអត្ថបទមួយដែលចេញផ្សាយដោយកាសែតបាងកកប៉ុស្តិ៍កាលពីឆ្នាំ២០១៣ មនុស្ស​មួយ​ចំនួននៅក្នុងប្រទេសថៃ​តូច​ចិត្ត​ដោយ​សារ​ឃ្លានេះ​បង្ហាញ​ថា​ប្រជាជន​ថៃ​មិន​មានភាពស្មោះត្រង់ និងខ្សោយភាសាអង់គ្លេស។ ប៉ុន្តែប្រជាជនថៃជាច្រើនពិតជាយល់ស្របនឹងអត្ថន័យឃ្លានេះ ហើយនិយាយថាវាឆ្លុះបញ្ចាំងពីបញ្ហាពិតប្រាកដនៅក្នុងប្រទេសដែលសម្បូរទៅដោយមនុស្សនិយាយកុហក និងសង្គមពុករលួយ។

ក្នុង​វប្បធម៌​ថៃ មនុស្ស​ច្រើន​តែ​កុហក ដើម្បី​យកមុខ ឬ​ជួយកុហក​អ្នក​ណា​ម្នាក់​ឲ្យ​រួច​ខ្លួនពីច្បាប់ ភាគច្រើនសំដៅទៅលើអំពើពុករលួយ ឬការកុហកបោកប្រាស់នៅក្នុងជួរអ្នកដឹកនាំថៃ ដែលទាំងនេះឆ្លុះបញ្ចាំងពីទម្លាប់នៅក្នុងសង្គមថៃ។ អត្ថបទនេះក៏បានបង្ហាញដែរថា ​ដើម្បី​ឈប់​បន្ទោស​អ្នក​ដទៃកុំឲ្យនិយាយពាក្យ «Don’t Thai to Me» ប្រជាជនថៃខ្លួនឯងគ្រប់រូបគួរតែមានភាពស្មោះត្រង់ និងអនុវត្តតាមច្បាប់ក្នុងជីវិតប្រចាំថ្ងៃ។

ឃ្លានេះក៏បានធ្វើឱ្យមានប្រតិកម្មចម្រុះនៅក្នុងប្រទេសថៃផងដែរ ដោយអ្នក​រិះគន់​ខ្លះ​និយាយ​ថា ការ​ប្រើ​ពាក្យសញ្ជាតិ​ក្នុង​ឃ្លាបែប​នេះ​អាច​ជា​ការ​ប្រកាន់​ពូជសាសន៍ ខណៈមនុស្ស​មួយ​ចំនួន​មាន​អារម្មណ៍វាជាការ​ប្រមាថ​ និងជាអយុត្តិធម៌​របស់​ប្រជាជន​ថៃ​ដែលត្រូវបានចោទថា​មិន​ស្មោះត្រង់។ ប៉ុន្តែ​អ្នក​ខ្លះ​ទៀត​ជឿ​ថា​វា​ជា​ការ​ដាស់​តឿន​មួយ​ដែល​ជំរុញ​ឱ្យ​ប្រជាជន​មាន​ភាព​ស្មោះត្រង់​និង​តម្លាភាព​មិន​ត្រឹម​តែ​ក្នុង​រឿង​នយោបាយ​ប៉ុណ្ណោះ​ទេ ប៉ុន្តែ​ក្នុង​ជីវិត​ប្រចាំ​ថ្ងៃ។

ជាមួយគ្នានោះបើយោងតាមអត្ថបទមួយទៀតនៅក្នុងគេហទំព័រដែលមានឈ្មោះ​ថា Richard Barrow in Thailand របស់អ្នកបង្កើតមាតិកាជនជាតិអង់គ្លេសម្នាក់រស់នៅក្នុងប្រទេសថៃ ក៏បានបញ្ចេញមតិទៅលើឃ្លានេះដែរថា ជាក់ស្តែង ឃ្លានេះមាន​ន័យ​អវិជ្ជមាន ហើយ​ទំនងជា​ធ្វើឱ្យ​ប្រជាជន​ថៃ​មួយចំនួន​កាន់តែតូចចិត្ត​ ពីព្រោះលោកថាកាលពីលោកមកនៅប្រទេសថៃដំបូងក៏មានរឿងចលាចលអំពីការបញ្ចូលក្នុងវចនានុក្រម Longman ដែលពិពណ៌នាថាទីក្រុងបាងកកថាជា «កន្លែងដែលមានស្រីពេស្យាច្រើន»។

អត្ថបទរបស់លោកបន្ថែមថា ប្រជាជនថៃក៏មានការខកចិត្តយ៉ាងខ្លាំងដែលទីក្រុងបាងកកត្រូវបានគេដាក់ឈ្មោះជាផ្លូវការថាជា «រាជធានីផ្លូវភេទនៃពិភពលោក» ខណៈពេលនេះប្រជាជនថៃរឹតតែ​អន់​ចិត្ត​ថែមទៀត ដោយសារត្រូវបាន​គេ​ហៅ​ពួក​គេ​ថា​ពុក​រលួយ ឬ​ជា​ប្រទេស​កុហក។ ជាការពិតណាស់ ទីក្រុងបាងកកមិនមែនជាទីក្រុងតែមួយគត់នៅលើពិភពលោកដែលមានស្រីពេស្យាទេ ហើយប្រទេសថៃក៏មិនមែនជាប្រទេសតែមួយគត់ដែលមន្ត្រីរដ្ឋាភិបាលពុករលួយដែរ។ ប៉ុន្តែជំនួសឱ្យការខឹងនឹងរឿងនេះ ពួកគេគួរតែធ្វើអ្វីបញ្ឈប់អំពើពុករលួយ ហើយ​ដើម្បី​ប្រយោជន៍​ល្អ លោក Richard បន្ថែមថា «សូម​ឲ្យប្រជាជនថៃបញ្ឈប់​រាល់​ការ​ឈ្លោះ​ប្រកែក​គ្នា​នៅ​តាម​ដងផ្លូវមួយទៀត» និងបានចោទជាសំនូរថាហេតុ​អ្វី​បាន​ជាប្រជាជន​ថៃ​មិន​អាច​ត្រឡប់​មក​ស្រលាញ់​គ្នា​ដូច​កាល​ដែលលោកមក​ប្រទេសថៃ​ដំបូង?

សរុបមកទោះបីឃ្លានេះមានភាពចម្រូងចម្រាសខ្លាំងក៏ដោយ ក៏ «Don’t Thai to Me» នៅតែបន្តប្រើតាមអ៊ីនធឺណិត និងនៅក្នុងការសន្ទនាជាប្រចាំ។ ឃ្លានេះនៅតែជំរុញឱ្យមានការពិភាក្សាពិតប្រាកដអំពីភាពស្មោះត្រង់ ទម្លាប់ក្នុងសង្គម និងការផ្លាស់ប្តូរវប្បធម៌នៅក្នុងប្រទេសថៃ៕

អត្ថបទ៖ ប៊ុន សុភាព