នាយ ពាង ប្រាប់សប្បុរសជនដែលចង់ជួយខ្លួនតាម QR ធនាគារ ជួយផ្ទៀងផ្ទាត់ឈ្មោះជាមុន ព្រោះមានជនខិលខូចកំពុងឆ្លៀតឱកាស

តារាកំប្លែងជើងចាស់នាយ ពាង បានស្នើឱ្យមហាជនអ្នកគាំទ្រនិងអ្នកសិល្ប:មានការប្រុងប្រយ័ត្ន ខណ:ដែលថ្មីៗនេះ មានជនខិលខូចបានឆ្លៀតឱកាសយកឈ្មោះលោកទៅរៃអង្គាសលុយ ស្របពេលដែលខ្លួនកំពុងមានជំងឺសម្រាកព្យាបាលនៅមន្ទីពេទ្យ និងស្នើសុំជំនួយពីសប្បុរសជន។

បច្ចុប្បន្ន តារាកំប្លែងលោក គឹម ដាំរ៉ុង ហៅនាយ ពាង កំពុងត្រូវបន្តទទួលការព្យាបាលដោយគីមី បន្ទាប់ពីវះកាត់ដុំសាច់កាចនៅត្រង់អណ្តាតខាងឆ្វេង នៅមន្ទីពេទ្យព្រះអង្គរឌួង។

យ៉ាងណាមិញ ស្របពេលដែលនាយ ពាង កំពុងមានទុក្ខនេះដែរ ស្រាប់តែមានជនឆ្លៀតឱកាសបានយករូបភាពរបស់លោកទៅបង្ហោះដើម្បីរៃអង្គាសលុយ ភ្ជាប់នឹងខ្លឹមសារថា “សុំចិត្តបងប្អូនខ្មែរជនរួមជាតិសុំជួយ នាយពាង ផងពេលនេះគឺ គាត់ឈឺធ្ងន់សង្រ្គោះបន្ទាន់ណាមួយកូនៗនៅតូចៗសុំជួយគាត់តាមសិទ្ធា”។

មិនតែប៉ុណ្ណោះ ជនឆ្លៀតឱកាសទាំងនោះ បានសុំជំនួយតាមរយៈ QR របស់ខ្លួនឯង ពុំមែនជាគណនីធនាគាររបស់ នាយ ពាង នោះឡើយ។

សូមជម្រាបថា ថ្វីត្បិតទទួលបានការវះកាត់ដោយសុវត្ថិភាពក៏ពិតមែន ប៉ុន្តែនាយ ពាង ត្រូវបាញ់គីមីដើម្បីរស់បន្តដោយ សារតែនាយ ពាង មានជំងឺទឹកនោមផ្អែមឡើងកូនកណ្តុរនិងលើសឈាម។ ម៉្យាងវិញទៀត នាយ ពាង កំពុងមានកូនតូច ៣នាក់ និងម្តាយចាស់ជរាក្នុងបន្ទុក ខណៈភរិយានៅសរសៃខ្ចីនៅឡើយ។ នេះបើតាមការបញ្ជាក់ពីគណនីហ្វេសប៊ុកឈ្មោះ Moonna Vlog ដែលបានទៅជួបសួរសុខទុក្ខ នាយពាង ដោយផ្ទាល់៕ ចាន់រ៉ា