អាជីវករលក់ដូរមុខផ្សារស្ទឹង ទ្រាំអង្គុយលក់ជាមួយក្លិនស្អុយរាល់ថ្ងៃចេញពីគំនរសំរាម

ក្រុមអាជីវករលក់ដូរនៅខាងមុខផ្សារស្ទឹង ស្ថិតក្នុងភូមិស្ទឹង ឃុំកោងកាង ស្រុកពញាក្រែក ខេត្តត្បូងឃ្មុំ រអ៊ូរទាំរឿងសំរាមជះក្លិនស្អុយរាល់ថ្ងៃ ខណៈថៅកែផ្សារមិនមានដំណោះស្រាយ។

ក្រុមអាជីវករផ្សារស្ទឹង បានលើកឡើងថា ការតស៊ូលក់ដូរនៅជាមួយគំនរសំរាមបែបនេះជារៀងរាល់ថ្ងៃ ដោយសារពួកគាត់គ្មានកន្លែងលក់ ចេះតែនាំគ្នាទ្រាំលក់ ហើយពួកគាត់តែងស្នើសុំឲ្យថៅកែផ្សារជួយប្រមូលសំរាមចេញផង ថៅកែផ្សារ ថារថយន្តខូចកំពុងជួសជុល។ បើតាមក្រុមអាជីវករ អាជ្ញាធរស្រុក និងបរិស្ថានខេត្ត ក៏មិនសូវចុះត្រួតពិនិត្យបញ្ហាសំរាមជះក្លិនស្អុយនេះដែរ ហើយក៏គ្មានការរៀបចំធុងសំរាមឲ្យបានត្រឹមត្រូវ ធ្វើឲ្យជះក្លិនស្អុយស្ទើរពេញផ្សារ។

ក្រុមអាជីវករទាំងអស់ក៏សូមស្នើឲ្យថៅកែផ្សារ ក៏ដូចអាជ្ញាធរស្រុក និងជំនាញពាក់ព័ន្ធជួយពិនិត្យមើលផង ព្រោះពួកគាត់អាចប្រឈមនឹងបញ្ហាសុខភាពផ្លូវដង្ហើមបើនៅតែមានក្លិនស្អុយរាល់ថ្ងៃបែបនេះ។

ទាក់ទងបញ្ហានេះ លោក កែ សារ៉េត ថៅកែវិនិយោគផ្សារស្ទឹង មិនបានបញ្ជាក់ពីមូលហេតុអ្វីនោះទេ ដោយសារទូរស័ព្ទចូល តែគ្មានអ្នកលើក៕

អត្ថបទ៖ សាន វិឡែម