ព័ត៌មានអន្ដរជាតិ

សមាជិកសភាអាមេរិក ស្នើច្បាប់អនុញ្ញាតឲ្យ ត្រាំ ផ្តល់ B-2 ទៅអ៊ីស្រាអែល ទុកវាយអ៊ីរ៉ង់ ថ្ងៃមុខ

បានផុស

១ year មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

សមាជិករដ្ឋសភាអាមេរិកពីររូប បានបង្ហាញសេចក្តីព្រាងច្បាប់មួយ ដែលនឹងអនុញ្ញាតឲ្យលោកប្រធានាធិបតី ដូណាល់ ត្រាំ ផ្តល់យន្តហោះទម្លាក់គ្រាប់បែក B-2 និងគ្រាប់បែក «Bunker Buster» ទម្ងន់ ១៣ ៦០៧គីឡូក្រាមដល់អ៊ីស្រាអែល បើសិនជាអ៊ីរ៉ង់ហ៊ានវាយប្រហារនាពេលអនាគត និងប្រសិនបើរកឃើញថា ទីក្រុងតេហេរ៉ង់ នៅតែបន្តអភិវឌ្ឍកម្មវិធីអាវុធនុយក្លេអ៊ែរ។

យន្តហោះទម្លាក់គ្រាប់បែក B-2 (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Fox News, ច្បាប់នេះមានឈ្មោះ «Bunker Buster Act» ត្រូវបានបង្ហាញកាលពីថ្ងៃពុធទី២ខែកក្កដាឆ្នាំ២០២៥ដោយលោក Josh Gottheimer នៃរដ្ឋ New Jersey និងលោក Mike Lawler នៃរដ្ឋ New York ជាមួយគោលបំណងឲ្យលោក ត្រាំ ចាត់វិធានការដើម្បីធានាថា អ៊ីស្រាអែល រៀបចំវាយប្រហាររួចស្រេចគ្រប់កាលៈទេសៈ ប្រសិនបើអ៊ីរ៉ង់ស្វែងរកការអភិវឌ្ឍអាវុធនុយក្លេអ៊ែរ មែន។

ទោះបីជាយ៉ាងណាក៏ដោយ ដើម្បីអនុម័តច្បាប់បាន គឺទាមទារឲ្យមានការឯកភាពផ្នែកនយោបាយខ្លាំងបំផុត និងត្រូវឆ្លងកាត់ឧបសគ្គនីតិវិធីជាច្រើននៅក្នុងប្រព័ន្ធនីតិប្បញ្ញត្តិរបស់សហរដ្ឋអាមេរិក។

សូមជម្រាបថា សំណើនេះធ្វើឡើងតែប៉ុន្មានសប្តាហ៍ប៉ុណ្ណោះ បន្ទាប់ពីអាមេរិកនិងអ៊ីស្រាអែល បើកការវាយប្រហារផ្លូវអាកាសរួមគ្នា វាយប្រហារទីតាំងនុយក្លេអ៊ែរស៊ីវិលរបស់អ៊ីរ៉ង់។

អាជ្ញាធរអ៊ីរ៉ង់ ប្រកាសជាផ្លូវការថា មនុស្សយ៉ាងតិច ៩៣៥នាក់ត្រូវបានសម្លាប់ ក្នុងអំឡុងសង្គ្រាមរយៈពេល១២ថ្ងៃកាលពីខែមិថុនាជាមួយអ៊ីស្រាអែលនិងសហរដ្ឋអាមេរិក។

អ៊ីស្រាអែលបានចាប់ផ្តើមសង្រ្គាមផ្លូវអាកាសកាលពីថ្ងៃទី១៣ខែមិថុនា ដោយវាយលុកទីតាំងនុយក្លេអ៊ែរអ៊ីរ៉ង់ និងសម្លាប់មេបញ្ជាការយោធាកំពូលជាច្រើនរូប ក៏ដូចជាជនស៊ីវិលនៅក្នុងការវាយប្រហារដ៏អាក្រក់បំផុតចំពោះសាធារណរដ្ឋឥស្លាម គិតចាប់តាំងពីសង្រ្គាមឆ្នាំ១៩៨០ជាមួយអ៊ីរ៉ាក់។

អ៊ីរ៉ង់ បានសងសឹកវិញដោយការផ្លោងមីស៊ីលលើទីតាំងយោធា ហេដ្ឋារចនាសម្ព័ន្ធ និងទីក្រុងរបស់អ៊ីស្រាអែល។ សហរដ្ឋអាមេរិកបានចូលរួមក្នុងសង្រ្គាមនៅថ្ងៃទី២២ខែមិថុនា ដោយការទម្លាក់គ្រាប់ខ្នាតធំលើរោងចក្រនុយក្លេអ៊ែរចំនួន៣របស់អ៊ីរ៉ង់ដូចជា Fordo, Natanz និង Isfahan៕

អត្ថបទ៖ សុខ សុវណ្ណ

ចុចអាន៖ ចារកម្មអាមេរិក៖ អ៊ីរ៉ង់រៀបចំបង្កប់មីននៅច្រកសមុទ្រ Hormuz