ស្ថានការណ៍ព្រំដែនថមថយ! អ្នកសិល្បៈស្រុះដៃគ្នាចុះសួរសុខទុក្ខ និងគោរពវិញ្ញាណក្ខន្ធវីរ:កងទ័ពពលី

ខណ:ដែលស្ថានការណ៍នៅតាមបន្ទាត់ព្រំដែនថមថយកម្តៅ ក្រោយផ្ទុះសង្គ្រាមឈ្លានពានពីសំណាក់កងទ័ពចោរសៀមមកលើទឹកដីកម្ពុជា គេសង្កេតឃើញសប្បុរសជននានា បាននាំគ្នាចុះទៅសួរសុខទុក្ខវីរ:កងទ័ពជួរមុខនិងឧបត្ថម្ភស្បៀកអាហារដល់ប្រជាពលរដ្ឋភៀសសឹក ពិសេសគឺការគោរវិញ្ញាណក្ខន្ធវីរ:កងទ័ពពលី ដើម្បីការពារអធិបតេយ្យភាពទឹកដី។

មិនខុសគ្នាពីសប្បុរសជន និងអ្នកដែលមានធនធាននោះទេ សម្រាប់សិល្បករសិល្បការិនីខ្មែរល្បីៗជាច្រើនដួង ក៏បានស្រុះដៃគ្នាចុះសួរសុខទុក្ខវីរ:កងទ័ព ចែកស្បៀងអាហារដល់ជនភៀសសឹក និងគោរវិញ្ញាណក្ខន្ធវីរ:កងទ័ពពលី ដើម្បីបូរណភាពជាតិ បន្ទាប់ពីមានការឈ្លានពានពីសំណាក់កងទ័ពចោរសៀម រយ:ពេល ៥ថ្ងៃកន្លងទៅនេះ។

ស្របពេលគ្នានេះដែរ ងាកទៅមើលនៅលើបណ្តាញសង្គមហ្វេសប៊ុក ក៏មានការបង្ហោះសាររំលែកទុក្ខ និងកាន់ទុក្ខដល់វីរ:កងទ័ពខ្មែរ ដែលបានពលីជាច្រើនរូបដែលស៊ូលះបង់ជីវិត បូជាសាច់ស្រស់ឈាមស្រស់ ការពារទឹកដីពីការឈ្លានពានពីសំណាក់ចោសៀមឈ្លានពាន។ ក្នុងនោះ ប្រជាជនខ្មែរទូរទាំងប្រទេស បានបង្ហាញអារម្មណ៍ក្តុកក្តួល និងគាំទ្រជាខ្លាំង ចំពោះសកម្មភាពសិល្បករសិល្បការិនីមួយចំនួន ដែលបានធ្វើដំណើរទៅដល់រោងបុណ្យរបស់វីរ:កងពលីជូនជាតិផងនោះ។

សូមបញ្ជាក់ដែរថា កងទ័ពថៃបានបើកការឈ្លានពានកម្ពុជានៅថ្ងៃទី២៤ ខែកក្កដា ឆ្នាំ២០២៥ ដែលបណ្តាលឱ្យមានមនុស្សស្លាប់និងរបួស ខណៈមនុស្សជិត ១៧ម៉ឺននាក់ត្រូវភៀសខ្លួនពីភូមិស្រុក ព្រោះតែទង្វើគ្មានមនុស្សធម៌របស់ថៃក្នុងឧក្រិដ្ឋកម្មសង្គ្រាមតាមរយៈការប្រើប្រាស់គ្រាប់បែកចង្កោម និងផ្សែងពុលមកលើកម្ពុជា។ មិនត្រឹមតែរំលោភច្បាប់អន្តរជាតិថៃឈ្លានពាននេះ បានបង្កការខូចខាតធ្ងន់ធ្ងរដល់ប្រាសាទព្រះវិហារដែលត្រូវបានដាក់បញ្ចូលក្នុងសម្បត្តិបេតិកភណ្ឌរបស់អង្គការយូណេស្កូទៀតផង៕ ចាន់រ៉ា