ទឹកជំនន់នៅទីក្រុងប៉េកាំងប្រទេសចិន សម្លាប់មនុស្ស ៤៤ នាក់ និងបាត់ខ្លួន ៩ នាក់

យោងតាមការចេញផ្សាយរបស់ NDTV នៅថ្ងៃទី០១ខែសីហា ព្យុះភ្លៀងដ៏ខ្លាំងបង្កជាទឹកជំនន់នៅទីក្រុងប៉េកាំងបានបណ្តាលឱ្យមនុស្សស្លាប់ចំនួន៤៤ នាក់ និងមនុស្ស ៩ នាក់បាត់ខ្លួន ដោយមានអ្នកស្រុកជាង ៣០០,០០០ នាក់បានរងផលប៉ះពាល់ និងផ្ទះចំនួន ២៤,០០០ ខ្នងរងការខូចខាត។

ក្នុង​ចំណោម​អ្នក​ស្លាប់​មាន​មនុស្ស​ចាស់​ចំនួន ៣១​នាក់​នៅ​មណ្ឌល​ថែទាំ​មួយ​ក្នុង​សង្គាត់ Miyun។ អ្នកបាត់ខ្លួនរួមមានមន្ត្រីក្នុងតំបន់ចំនួនបួននាក់ដែលចូលរួមក្នុងកិច្ចខិតខំប្រឹងប្រែងជួយសង្គ្រោះ។

គួរម្លឹកថាភ្លៀងធ្លាក់ខ្លាំងចាប់ផ្ដើមតាំងពីថ្ងៃទី២៣ដល់ ២៩ ខែកក្កដា បង្កឲ្យមានទឹកជំនន់ភ្លាមៗ ជាពិសេសនៅតំបន់ភ្នំភាគខាងជើងដូចជា សង្គាត់Miyun និង Huairou។ ទំបន់ទឹក Miyun បានប្រឈមនឹងសម្ពាធទឹកដែលមិនធ្លាប់មានពីមុនមក ដោយទទួលបានទឹក ៩១០ លានម៉ែត្រគូបក្នុងរយៈពេល ៧ ថ្ងៃ បំបែកកំណត់ត្រា៥០ ឆ្នាំមិនធ្លាប់មាន។

ក្រុមឆ្លើយតបគ្រាអាសន្នរបស់ចិនបានជម្លៀសមនុស្សជាង ១០៤,០០០ នាក់ និងបានជួយសង្គ្រោះជាង ៥,៤០០ នាក់។ បុគ្គលិកជាង ៦,៨០០ នាក់ រថយន្ត ១,៣០០ គ្រឿង និងទូកចំនួន ២៩៦ត្រូវបានដាក់ពង្រាយ ដោយប្រើទូក ខ្សែពួរ យន្តហោះគ្មានមនុស្សបើក និងឧបករណ៍ធុនធ្ងន់ក្នុងប្រតិបត្តិការជួយសង្គ្រោះ។ ផ្លូវដែលរងការខូចខាត និងសេវាសំខាន់ៗជាច្រើនកំពុងត្រូវបានស្តារឡើងវិញ ខណៈដែលរដ្ឋាភិបាលផ្តោតលើការជួសជុលផ្ទះ និងហេដ្ឋារចនាសម្ព័ន្ធ ការគាំទ្រគ្រួសារជនរងគ្រោះ និងការផ្តល់ជំនួយដល់សហគមន៍ដែលរងផលប៉ះពាល់៕

អត្ថបទ៖ ប៊ុន សុផាព