Anutin ស្តីឲ្យរដ្ឋាភិបាលថៃ ថា គិតរឿងច្បាប់ល្បែងធំជាងប្រជាជននៅព្រំដែន ដែលកំពុងរងទុក្ខ

ជម្លោះនយោបាយនៅបាងកកឯណោះ ក៏កំពុងក្តៅគគុកដដែល ដោយសារជាថ្មីម្តងទៀត មេបក្សភូមិចៃថៃ លោក Anutin Charnvarikul បានបន្ទោសរដ្ឋាភិបាលថៃ រឿងគិតច្បាប់ល្បែងបៀជាធំ ទាំងមិនគិតលើរឿងសំខាន់ជាងនេះផ្សេងទៀត ពិសេសប្រជាជននៅព្រំដែនកម្ពុជា-ថៃ ដែលកំពុងរងទុក្ខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់អ្នកសារព័ត៌មានកាលពីថ្ងៃអង្គារទី៥ខែសីហាឆ្នាំ២០២៥ ដោយសំដៅចំៗទៅនាយករដ្ឋមន្ត្រីស្តីទី Phumtham Wechayachai, លោក Anutin និយាយថា មានអាទិភាពផ្សេងទៀតដែលសំខាន់ជាងនេះ ប៉ុន្តែរដ្ឋាភិបាលមិនគិត។ ចំពោះច្បាប់ល្បែងបៀនេះ គឺលោកមិនគាំទ្រឡើយ។

លោក Anutin លើកឡើងថា មានបញ្ហាបន្ទាន់ផ្សេងទៀតដែលត្រូវគិតគូរ ជាពិសេសការជួយប្រជាជនដែលរស់នៅតាមបណ្តោយព្រំដែនកម្ពុជា-ថៃ ឲ្យបានឆាប់រហ័ស។

កាលពីសប្តាហ៍មុន លោក Anutin ក៏រិះគន់ខ្លាំងៗទៅរដ្ឋាភិបាលថៃផងដែរ ក៏ព្រោះតែពួកគេបណ្តុះចលនាឲ្យប្រជាជនស្រឡាញ់រដ្ឋាភិបាល ហើយទាល់តែប្រជាជនដាស់តឿនទើបរដ្ឋាភិបាលចេះស្រឡាញ់ជាតិ។

សូមជម្រាបថា Anutin ធ្លាប់មានទំនាក់ទំនងយ៉ាងជិតស្និទ្ធជាមួយគណបក្សកាន់អំណាចនៅប្រទេសថៃ។ តាមពិតទៅ ភូមិចៃថៃ គឺជាគណបក្សមួយដ៏សំខាន់នៃរដ្ឋាភិបាលចម្រុះ ដែលដឹកនាំប្រទេសថៃបានមួយរយៈ។ 

នៅក្នុងរដ្ឋាភិបាលចម្រុះនោះ Anutin បានកាន់តំណែងជា ឧបនាយករដ្ឋមន្ត្រី និង រដ្ឋមន្ត្រីក្រសួងមហាផ្ទៃ ដែលជាមុខតំណែងដ៏មានឥទ្ធិពលមួយ មុនពេលលាលែង។

នេះបង្ហាញថា ប្រទេសថៃកាន់តែបែកបាក់គ្នាខ្លាំងឡើងៗ ដោយគណបក្សប្រឆាំងបានចេញមុខរិះគន់រដ្ឋាភិបាលរបស់ខ្លួនជាបន្តបន្ទាប់៕

អត្ថបទ៖ សុខ សុវណ្ណ

ចុចអាន៖ មេបក្សប្រឆាំងថៃ លោក Anutin សរសើររដ្ឋាភិបាលកម្ពុជា