មេបក្សប្រឆាំងថៃ លោក Anutin សរសើររដ្ឋាភិបាលកម្ពុជា

លោក Anutin Charnvirakul មេដឹកនាំគណបក្សភូមិចៃថៃ ដែលជាគណបក្សប្រឆាំងរបស់ប្រទេសថៃ បានកោតសរសើររដ្ឋាភិបាលកម្ពុជាថា បណ្តុះចលនាជាតិនិយមចំពោះប្រជាជន ប៉ុន្តែថៃវិញបណ្តុះចលនាឲ្យប្រជាជនស្រឡាញ់រដ្ឋាភិបាល ហើយទាល់តែប្រជាជនដាស់តឿនទើបរដ្ឋាភិបាលចេះស្រឡាញ់ជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Anutin បានលើកឡើងដូច្នេះនៅក្នុងការបង្ហោះ Facebook កាលពីថ្ងៃពុធទី៣០ខែកក្កដាឆ្នាំ២០២៥ មិនយូរប៉ុន្មានបន្ទាប់ពីបទឈប់បាញ់រវាងកម្ពុជានិងថៃ ចូលជាធរមាន។

ក្នុងនោះលោកសរសេរថា រដ្ឋាភិបាលកម្ពុជា ដាស់ពលរដ្ឋខ្មែរឲ្យស្រឡាញ់ប្រទេសជាតិ។ ចំណែកប្រជាជនថៃ ដាស់រដ្ឋាភិបាលឲ្យចេះស្រឡាញ់ជាតិទៅវិញ។

លោក Anutin ធ្លាប់មានទំនាក់ទំនងយ៉ាងជិតស្និទ្ធជាមួយគណបក្សកាន់អំណាចនៅប្រទេសថៃ។ តាមពិតទៅ គណបក្ស ភូមិចៃថៃ គឺជាផ្នែកមួយដ៏សំខាន់នៃរដ្ឋាភិបាលចម្រុះ ដែលដឹកនាំប្រទេសថៃអស់មួយរយៈ។ នៅក្នុងរដ្ឋាភិបាលចម្រុះនោះ លោក Anutin បានកាន់តំណែងជា ឧបនាយករដ្ឋមន្ត្រី និង រដ្ឋមន្ត្រីក្រសួងមហាផ្ទៃ ដែលជាមុខតំណែងដ៏មានឥទ្ធិពលមួយ មុនពេលលាលែង។

នេះបង្ហាញថា ប្រទេសថៃកាន់តែបែកបាក់គ្នាខ្លាំងឡើងៗ ដោយគណបក្សប្រឆាំងបានចេញមុខរិះគន់រដ្ឋាភិបាលរបស់ខ្លួនជាបន្តបន្ទាប់។

តួយ៉ាងមុននេះ តំណាងរាស្រ្តគណបក្ស People’s Party មណ្ឌលខេត្តឈុនបុរី លោក Sahassawat Kumkong ក៏បង្ហោះ Facebook ចោទប្រកាន់កងទ័ពថៃដែរថា លាក់បាំងការពិតឬមិនបង្ហាញតម្លាភាព ហើយរិះគន់ការសម្រេចចិត្តរបស់រដ្ឋាភិបាល ដែលអនុញ្ញាតឲ្យយោធាដឹកនាំទំនាក់ទំនងជាមួយសាធារណជនក្នុងអំឡុងពេលជម្លោះនេះ។

លោកអំពាវនាវឲ្យរដ្ឋាភិបាលនិងកងទ័ព បង្ហាញតួលេខពិតនៃទាហានថៃដែលស្លាប់និងរបួស ក្នុងជម្លោះ ព្រោះប្រជាជនមានសិទ្ធិដឹងការពិតអំពីស្ថានភាពរបស់កូនចៅពួកគេ។

បញ្ហានេះបានក្លាយជាជម្លោះនយោបាយដ៏ពុះកញ្ជ្រោលនៃផ្ទៃក្នុងថៃ ហើយវាក៏បង្ហាញពីភាពច្របូកច្របល់នៅក្នុងប្រទេសថៃផងដែរ៕

អត្ថបទ៖ សុខ សុវណ្ណ

ចុចអាន៖ ជម្លោះផ្ទៃក្នុងថៃ ក្តៅគគុក ក្រោយតំណាងរាស្រ្ត ហ៊ានរិះគន់កងទ័ព ដែលឈ្លានពានកម្ពុជា