ហ្សេលេនស្គី ច្រានចោលការដកកម្លាំង​ចេញ​ពី​ Donbas

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានច្រានចោលយ៉ាងម៉ឺងម៉ាត់​ចំពោះការដកទ័ពចេញពីតំបន់ Donbas ដោយព្រមានថា ការដកថយនឹងផ្តល់​ឲ្យ​រុស្ស៊ីនូវជំហរយុទ្ធសាស្ត្រសម្រាប់ការវាយលុកនាពេលអនាគត។

ការកត់សម្គាល់របស់មេ​ដឹក​នាំ​អ៊ុយក្រែន ធ្វើ​ឡើង​នៅ​ថ្ងៃ​ទី​១៣​ខែ​សីហានេះ ខណៈ​ដែល​​ប្រធានាធិបតីអាមេរិក ដូណាល់ ត្រាំ កំពុង​ត្រៀម​រៀបចំជួបសមភាគី​រុស្ស៊ីលោក វ៉្លាឌីមៀរ ពូទីន នៅរដ្ឋ​អាឡាស្កា ដែលជាកិច្ចពិភាក្សាផ្ទាល់លើកដំបូងរបស់ពួកគេចាប់តាំងពីឆ្នាំ​២០២១។ ក្នុង​​កិច្ច​ប្រជុំ​កំពូល​នៅ​ថ្ងៃសុក្រ​សប្ដាហ៍​នេះ គេ​រំពឹង​ថា​នឹង​មាន​ការ​ជជែក​គ្នា​អំពី​ការ​សម្បទានទឹកដី​​រវាង​ភាគី​ជម្លោះ​ទាំងពីរ​នៅ​ក្នុង​សង្គ្រាម​អ៊ុយក្រែន ដែល​អូសបន្លាយ​ដល់​ឆ្នាំ​ទី​បួន​ហើយ។

លោក ហ្សេលេនស្គី បានរិះគន់កិច្ចប្រជុំកំពូលថាជា «ជ័យជម្នះ​ផ្ទាល់ខ្លួន» សម្រាប់ ពូទីន ដោយលើកហេតុផលថា វាពន្យារពេលការដាក់ទណ្ឌកម្មរបស់សហរដ្ឋអាមេរិក និងធ្វើ​ឲ្យ​ប្រធានាធិបតីរុស្ស៊ីមានភាពស្របច្បាប់នៅលើឆាកពិភពលោក។ ទន្ទឹមនឹងនេះ កងកម្លាំងរុស្ស៊ីបន្តរុលទៅភាគខាងកើត​ប្រទេស​អ៊ុយក្រែន​ចម្ងាយ ១០គីឡូម៉ែត្រនៅជិត Dobropillia ដែលជាទីក្រុងរុករករ៉ែដ៏សំខាន់។

កិច្ចប្រជុំត្រាំ-ពូទីន ដែលត្រូវបានស្នើសុំដោយវិមានក្រឹមឡាំង មានគោលបំណងស្វែងរកមធ្យោបាយដើម្បីបញ្ចប់សង្រ្គាម ប៉ុន្តែ​លោក ហ្សេលេនស្គី បារម្ភថា វាអាចដាក់សម្ពាធអ៊ុយក្រែន​ឲ្យ​ទទួល​យក​កិច្ចព្រមព្រៀង«កាត់ទឹកដី» ដែល​ទីក្រុង​កៀវ​តែង​តែ​ជំទាស់​យ៉ាង​ដាច់​អហង្ការ។ ចំណែក​ឯ​មេដឹកនាំអឺរ៉ុប បានជំរុញ​ឲ្យ​ដាក់​បញ្ចូល​អ៊ុយក្រែន​នៅ​ក្នុង​កិច្ច​ប្រជុំ​កំពូល និង​ត្រូវ​មាន​ការ​គោរព​ចំពោះ​អធិបតេយ្យភាពរបស់ទីក្រុងកៀវ៕

ដោយ៖ ឈាង

ចុចអាន៖ ពូទីន ហៅ​ទូរសព្ទ​ទៅ គីម ជុងអ៊ុន ដើម្បី​ពិភាក្សាគ្នា មុនកិច្ចប្រជុំកំពូលជាមួយ ត្រាំ ស្តីពីអ៊ុយក្រែន