លោក អុិន វិចិត្រ បង្ហាញការមិនពេញចិត្តខ្លាំង ក្រោយមានអ្នកតិះដៀលរឿងខ្មែរ ហើយសរសើររឿងសៀម

លោក អុិន វិចិត្រ ចាងហ្វាងផលិតកម្ម Mediaload Pictures បានសម្តែងការហួសចិត្តជាខ្លាំង រហូតចេញមុខប្រតិកម្មចំពោះអ្នកដែលមិនសូវឱ្យតម្លៃលើរឿងខ្មែរ ហើយបែរជាទៅសរសើររឿងសៀម ឬបរទេសជាដើម។

លោក អុិន វិចិត្រ ត្រូវបានគេស្គាល់ថាជាផលិតករភាពយន្តវ័យក្មេងរបស់ខ្មែរម្នាក់ ដែលមានបទពិសោធនឹងស្នាដៃជាច្រើន ក្នុងការផលិតរឿងបែបកំប្លុកកំប្លែងភ័យរន្ធត់ ខណ:ថ្មីៗនេះលោកកំពុងទទួលបានការចាប់អារម្មណ៍ និងគាំទ្រលើភាពយន្តរបស់លោកដែលបានចាក់បញ្ចាំងនៅតាមបណ្តារោងកុនក្នុងស្រុកមួយចំនួន។

ទន្ទឹមនឹងសន្ទុះការគាំទ្រស្នាដៃផលិតរឿងបែបភ័យរន្ធត់ លាយឡំនឹងភាពកំប្លុកកំប្លែងបង្កភាពសប្បាយរីករាយជូនទស្សនិកជននេះដែរ ថ្មីៗកន្លងមកនេះក៏មានអ្នកគាំទ្រមួយចំនួនបានស្នើឱ្យលោកផលិតកុនបែបមនោសញ្ចេតនាបន្ថែមរស់ជាតិថ្មីតម្រូវតាមទីផ្សារចង់បានរបស់ពួកគេផងដែរ។

ដោយឡែកងាកមកចាប់អារម្មណ៍មុននេះ លោក អុិន វិចិត្រ បានបង្ហាញអារម្មណ៍ហាក់មិនសប្បាយចិត្ តនូវការរិះគន់របស់បុគ្គលមួយចំនួនតូច ដែលមើលមិនឃើញតម្លៃភាពយន្តក្នុងស្រុក។

គួរបញ្ជាក់ដែរថា កាលពីថ្មីៗកន្លងទៅ មហាជនខ្មែរនិងសិល្បករសិល្បការិនីព្រមជាមួយផលិតករភាពយន្តរបស់ខ្មែរបានបង្ហាញការគាំទ្រយ៉ាងពេញទំហឹង ក្រោយពេលដែលសម្តេចតេជោ ហ៊ុន សែន បានមានប្រសាសន៍ឱ្យបញ្ឈប់ការចាក់បញ្ចាំកុនរបស់ថៃនៅក្នុងប្រទេសកម្ពុជា ដោយនាំគ្នាងាកមកធ្វើឱ្យវិស័យភាពយន្តខ្មែរកាន់តែមានសន្ទុះទីផ្សារ និងការគាំទ្រច្រើនឡើងវិញ៕ ចាន់រ៉ា