ព័ត៌មានអន្ដរជាតិ

Netflix វិនិយោគរាប់រយលានដុល្លារនៅថៃ ដើម្បីឱ្យប្រទេសនេះក្លាយជាមជ្ឈមណ្ឌលមាតិកាអាស៊ី

បានផុស

១១ ខែ មុន

នៅ

ថ្ងៃសុក្រ ២២ សីហា ២០២៥

ដោយ

ក្រុមហ៊ុនផ្ដល់សេវាកម្មផ្សាយភាពយន្តអនឡាញជាអន្តរជាតិ Netflix ដ៏ល្បីបំផុតរបស់សហរដ្ឋអាមេរិក បានបោះជំហានយុទ្ធសាស្រ្ត ដោយដាក់ការវិនិយោគជាប្រាក់ប្រមាណ ២០០ លានដុល្លារ ឬប្រហែល ៦,៥ ប៊ីលានបាត នៅក្នុងប្រទេសថៃ ក្នុងរយៈពេល ៤ ឆ្នាំកន្លងមក ដើម្បីកែប្រែប្រទេសនេះឱ្យក្លាយជា «មជ្ឈមណ្ឌលមាតិកា» ប្រចាំអាស៊ីថ្មីមួយទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បរិមាណនៃការវិនិយោគដ៏ច្រើននេះ ឆ្លុះបញ្ចាំងពីកិច្ចខិតខំប្រឹងប្រែងរួមគ្នាដើម្បីទាញយកភាពល្បីល្បាញរបស់ថៃ ដែលជាទិសដៅផលិតកម្មសម្រាប់ប្រព័ន្ធផ្សព្វផ្សាយពិភពលោក ចំពេលដែលភាពយន្តថៃក៏ល្បីនៅលើវេទិការបស់ Netflix។ តាមការចុះផ្សាយរបស់កាសែត The Nation សន្ទុះនៃការគាំទ្រភាពយន្តថៃ ធ្វើឱ្យចំនួននៃការចូលមើលមាតិកា ឬភាពយន្តថៃកើនឡើងរហូតដល់ទៅ ៧៥០ លានម៉ោង គិតតែក្នុងឆ្នាំនេះ។

មែនទែនទៅ ការវិនិយោគរបស់ក្រុមហ៊ុន Netflix គាំទ្រយុទ្ធសាស្រ្តជាតិរបស់ថៃ ដែលកំណត់គោលដៅបង្កើតប្រាក់ចំណូល ៤ ទ្រីលានបាត និងការងារចំនួន ២០ លាន តាមរយៈ «សេដ្ឋកិច្ចថ្នៃប្រឌិត» ដែលរួមបញ្ចូលទាំងផលិតកម្មភាពយន្ត និងវប្បធម៌ ដើម្បីជំរុញកំណើនសេដ្ឋកិច្ច។ កន្លងមក រដ្ឋាភិបាលថៃបានលើកឡើងពីការយកប្រទេសកូរ៉េខាងត្បូងជាគំរូ ដោយទាញយកប្រយោជន៍សេដ្ឋកិច្ចពី «ថាមពលទន់»។

ជាក់ស្ដែង យុទ្ធសាស្រ្តសម្រាប់វិស័យភាពយន្តថៃ បានទាក់ទាញផលិតកម្មបរទេសជាង ៤ ៦០០ ចាប់តាំងពីឆ្នាំ ២០១៦ ដោយរកចំណូលបានជាង ១ ប៊ីលានដុល្លារ (៣៣ ប៊ីលានបាត) ជាតម្លៃ។

បច្ចុប្បន្ន ក្រៅតែពីក្រុមហ៊ុន Netflix គេឃើញមានក្រុមហ៊ុនអន្តរជាតិសំខាន់ៗផ្សេងៗទៀត ដែលបោះទុនវិនិយោគ ឬមកផលិតភាពយន្តនៅថៃ ដូចជា HBO, Universal, FX, Warner Bros, និង iQiyi ជាដើម៕