ព័ត៌មានជាតិ

គ្រូពេទ្យខេត្តកោះកុង ចុះពិនិត្យនិងព្យាបាលកុមារកំព្រា ខណៈពួកគេកង្វះអនាម័យរស់នៅ

បានផុស

៩ ខែ មុន

នៅ

ថ្ងៃចន្ទ ១ កញ្ញា ២០២៥

ដោយ

កោះកុង ៖ ក្រុមគ្រូពទេ្យមន្ទីរពេទ្យបង្អែកខេត្ត បានចុះពិនិត្យ និងព្យាបាលជំងឺជាលក្ខណៈបឋមដល់កុមារកំព្រាចំនួន១៥នាក់ ស្របពេលពួកគេកង្វះការយល់ដឹងអំពីអនាម័យ និងលើកកម្ពស់ផ្នែកមនុស្សធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងហោចណាស់ ក៏មានកុមារកំព្រាចំនួន១៥នាក់ ដែលត្រូវបានក្រុមគ្រូពេទ្យនៃមន្ទីរបង្អែកខេត្តកោះកុងចុះបេសកកម្មពិគ្រោះ និងព្យាបាលនៅនឹងកន្លែងផ្ទាល់តែម្តង ក្រោមរូបភាពមនុស្សធម៌ និងការណែនាំរបស់រដ្ឋបាលខេត្ត។

លោកវេជ្ជបណ្ឌិត ហៃ ឡៃសុន ប្រធានមន្ទីរបង្អែកខេត្តកោះកុង បានឱ្យដឹងនៅរសៀលថ្ងៃទី១ ខែកញ្ញា ឆ្នាំ២០២៥នេះថា សកម្មភាពពិនិត្យព្យាបាលជូនកុមារកំព្រានៅពេលនេះ ដោយសារតែពួកគេមានកង្វះអនាម័យថែទាំខ្លួនប្រាណ និងជាបេសកម្មប្រចាំរបស់មន្ទីរពេទ្យលើផ្នែកមនុស្សធម៌។

លោកវេជ្ជបណ្ឌិត ហៃ ឡៃសុន គូសបញ្ជាក់ទៀតថា កុមារនៅមណ្ឌលកំព្រា មានជំងឺសើស្បែកមួយចំនួន និងជំងឺមាត់ធ្មេញដោយក្រុមគ្រូពេទ្យនឹងអប់រំណែនាំបន្ថែមអំពីវិធីសាស្រ្តការពារជំងឺដល់ពួកគេ ដើម្បីជៀសផុតនៃការរីករាលដាលជំងឺផ្សេងៗបន្ត។

លោក សែម វ៉ាន់នី ជាអ្នកគ្រប់គ្រងមណ្ឌលកុមារកំព្រាខេត្តកោះកុង និយាយថា មណ្ឌលកុមារកំព្រាក្នុងខេត្ត សព្វថ្ងៃមានកុមារចំនួន១៥នាក់ដែលកំពុងស្នាក់នៅរៀនសូត្រ ដែលពួកគេត្រូវបានម្តាយឪពុកបោះចោល និងខ្លះទៀតជាប់ពន្ធនាការ។

បើតាមលោក សែម វ៉ាន់នី សម្តែងក្តីរីករាយដែលមានក្រុមគ្រូពេទ្យចុះមកព្យាបាលជំងឺទូទៅដល់កុមារនៅមណ្ឌលរបស់លោក ព្រោះនៅមានចំណុចខ្វះខាត និងតម្រូវការជាច្រើនទៀតបម្រើការដល់ជួយផ្គត់ផ្គង់យកចិត្តទុកដាក់។

ដោយឡែកលោកស្រី ឈី វ៉ា អភិបាលខេត្តកោះកុង ក៏សូមថ្លែងអំណអរគុណយ៉ាងជ្រោលជ្រៅជូនក្រុមគ្រូពេទ្យនៃមន្ទីរបង្អែកខេត្តដែលបានដឹកនាំគ្រូពេទ្យចុះមកពិនិត្យព្យាបាលជំងឺដល់កុមារនៅមណ្ឌលកំព្រាផ្ទាល់តែម្តង គ្រាយកចិត្តទុកដាក់នេះមិនអាចកាត់ថ្លៃបានទេសំដៅដល់លើកកម្ពស់សុខភាពរស់នៅរបស់កុមារប្រចំាថ្ងៃ។

លោកស្រី ឈី វ៉ា រំលេចដែរថា កន្លងទៅ និងបច្ចុប្បន្នរដ្ឋបាលខេត្ត មន្ទីរពាក់ព័ន្ធ និងសប្បុរសជិតឆ្ងាយនានា បានជួយគាំទ្រទំនុកបម្រុងអាហារ កសាងបន្ទប់ស្នាក់នៅ ធ្វើសួនច្បារ និងបំពេញរាល់តម្រូវការផ្សេងៗបន្ថែមជូនមណ្ឌលកុមារកំព្រា ក្រៅពីការយកចិត្តទុកដាក់លើការផ្នែកអនាម័យសុខភាព៕

អត្ថបទ ៖ សិរីវឌ្ឍនៈ