អ្នកជំនាញថៃ ទាញស្ថានភាពគ្រោះទឹកជំនន់ឆ្នាំនេះ ដូចទៅនឹងវិនាសកម្មឆ្នាំ២០១១

ព្យុះអស់ពីមួយចូលមួយ បានបង្កទុក្ខវេទនាដល់ប្រជាជនថៃ ដោយបង្កើតជាគ្រោះទឹកជំនន់លិចសព្វទិសទី បូកផ្សុំជាមួយបំណាក់ដីដ៏កាចសាហាវ សម្លាប់ពលរដ្ឋអស់ជាច្រើននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិដ្ឋភាពក្នុងឆ្នាំ២០២៥នេះ ធ្វើឲ្យគេនឹកឃើញដល់វិនាសកម្មនៃគ្រោះទឹកជំនន់ដ៏ធ្ងន់ធ្ងរបំផុត កាលពី១៤ឆ្នាំមុន ដែលបង្កការបំផ្លិចបំផ្លាញយ៉ាងធំធេង។

អ្នកជំនាញថៃ បានទាញស្ថានភាពគ្រោះទឹកជំនន់ឆ្នាំនេះទៅដូចកាលឆ្នាំ២០១១រួចទៅហើយ ដ្បិតថា បច្ចុប្បន្នជនរងគ្រោះមិនមានច្រើនដូចកាលនោះ ហើយប្រព័ន្ធនានាត្រូវបានគ្រប់គ្រងយ៉ាងល្អក៏ដោយ។

លោក Seri Supratit នាយកមជ្ឈមណ្ឌលបម្រែបម្រួលអាកាសធាតុនិងគ្រោះមហន្តរាយនៅសាកលវិទ្យាល័យ Rangsit និងជាអ្នករួមចំណែកដល់របាយការណ៍វាយតម្លៃទីប្រាំមួយ (AR6) របស់ក្រុមប្រឹក្សាអន្តររដ្ឋាភិបាលស្តីពីការប្រែប្រួលអាកាសធាតុ (IPCC) បាននិយាយថា គ្រោះធម្មជាតិនឹងកាន់តែញឹកញាប់និងសាហាវទៅនាពេលអនាគត។

ដ្បិតចំនួនព្យុះជាមធ្យមប្រចាំឆ្នាំ ទំនងជាមិនកើនឡើងលើសពី២៥ក៏ដោយ តែគេហ៊ានសន្មត់ថា កម្លាំងរបស់ព្យុះនាពេលអនាគតនឹងកាន់តែខ្លាំងឡើងៗ។ ជាពិសេសព្យុះត្រូពិចអាចពង្រឹងខ្លួនទៅជាព្យុះទីហ្វុង  ខណៈព្យុះទីហ្វុងមួយចំនួនអាចកាន់តែខ្លាំងបន្ថែមទៀតទៅជាព្យុះទីហ្វុងទំនើប ដែលនាំមកនូវភ្លៀងធ្លាក់និងខ្យល់បក់កាន់តែខ្លាំង។

សូមជម្រាបថា កាលពីឆ្នាំ២០១១ ប្រទេសថៃជួបទឹកធំដោយសារឥទ្ធិពលព្យុះភ្លៀងមូសុង បណ្តាលឲ្យមនុស្សស្លាប់ជាង៨០០នាក់ និងប៉ះពាល់ពលរដ្ឋជាង១៣លាននាក់ និងឈានដល់ការប្រកាសអាសន្ននៅខេត្តចំនួន៦០។ 

ក្រៅពីសម្លាប់មនុស្ស, ទឹកជំនន់ឆ្នាំ២០១១នៅប្រទេសថៃ គឺស្ថិតក្នុងចំណោមគ្រោះមហន្តរាយធម្មជាតិដែលបង្កការខាតបង់ទឹកប្រាក់ច្រើនបំផុតលើពិភពលោកនាពេលនោះ ដោយបំផ្លាញសេដ្ឋកិច្ចថៃ ក្នុងទំហំទឹកប្រាក់ ៤៥ពាន់លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ ទូទាំងប្រទេសថៃ ត្រូវរងទុក្ខដោយគ្រោះធម្មជាតិដល់សប្តាហ៍ក្រោយ ឯបាងកក ក៏ជន់លិចនិងបាក់ដី