កីឡាករ Barcelona ម្នាក់កំពុងពេញល្អ បែរ​ជារបួសចាស់រើឡើង ត្រូវអវត្តមានរយៈពេលវែង

ខ្សែបម្រើរបស់ Barcelona កីឡាករ Gavi នឹងត្រូវអវត្តមានពីទីលានប្រកួតដល់ទៅ ៥ ខែ បន្ទាប់ពីគាត់ទើបតែវះកាត់ព្យាបាលរបួសជង្គង់ខាងស្តាំរបស់គាត់។

កាលពីរដូវកាលមុន Gavi បានរបួសដាច់សរសៃជង្គង់ ACL ហើយត្រូវបានសម្រាកនៅក្រៅទីលានអស់មួយរដូវកាលពេញតែម្តង។ យ៉ាងណា នៅរដូវកាលថ្មី ២០២៥-២០២៦ រូបគេត្រូវបានអនុញ្ញាតឱ្យចូលទីលានឡើងវិញ បន្ទាប់ពីរបួស ACL បានជាសះស្បើយ។

ប៉ុន្តែមិនទាន់បានប៉ុន្មានផង របួសចាស់របស់គេនៅត្រង់ជង្គង់ខាងស្តាំនេះ ក៏មានបញ្ហាម្តងទៀត ហើយត្រូវបានគេព្រួយបារម្ភយ៉ាងខ្លាំង ថា សរសៃជង្គង់របស់គេអាចនឹងត្រូវបានរហែក។ ជាដំណឹងល្អ សរសៃជង្គង់ ACL របស់គេ មិនបានរហែកនោះទេ ប៉ុន្តែរូបគេត្រូវបានគ្រូពេទ្យធ្វើការវះកាត់ត្រង់ជង្គង់ខាងស្តាំដដែល ដើម្បីព្យាបាលឆ្អឹងខ្ចី ដែលបានខូច។

យោងតាមការបញ្ជាក់ពីក្លិប Barcelona បានឱ្យដឹង ថា៖ «កីឡាករក្នុងក្រុមធំ Pablo Páez Gavira (Gavi) បានធ្វើការវះកាត់ ដើម្បីដោះស្រាយបញ្ហារបួសជង្គង់របស់គាត់។ ការសម្រាកព្យាបាលរបួសត្រូវប្រើពេលចន្លោះពី ៤ ទៅ ៥ ខែ»។

ដោយឡែកអ្នកកាសែត អ៊ីតាលី លោក Fabrizio Romano បានឱ្យដឹងថា Gavi ហាក់មានភាពគ្រាំគ្រាចិត្តយ៉ាងខ្លាំង បន្ទាប់ពីរូបគេទទួលនូវដំណឹងនេះ ដោយសារបញ្ហារបួសនេះធ្វើឱ្យគេត្រូវអវត្តមានរយៈពេលវែង ហើយក៏នឹងប៉ះពាល់ធ្វើឱ្យគេមិនអាចជួយក្រុមជម្រើសជាតិ អេស្ប៉ាញ ក្នុងការប្រកួតព្រឹត្តិការណ៍បាល់ទាត់ជើងឯកពិភពលោក World Cup ២០២៦ ផងដែរ៕

ប្រែសម្រួល៖ សេម កុសល
ប្រភព៖ BBC