នាយករដ្ឋមន្ត្រីម៉ាឡេស៊ី ពិភាក្សាបញ្ហាកម្ពុជា-ថៃ ជាមួយលោកត្រាំ ក្នុងជំនួបតាមទូរស័ព្ទ

តាមរយៈសារបង្ហោះលើទំព័រ Facebook ផ្លូវការរបស់លោក អាន់វ៉ា អ៊ីប្រាហ៊ីម នៅរសៀលថ្ងៃព្រហស្បតិ៍ទី២៥ខែកញ្ញាឆ្នាំ២០២៥, នាយករដ្ឋមន្ត្រីម៉ាឡេស៊ី បានឲ្យដឹងថា លោកបានសន្ទនាតាមទូរស័ព្ទជាមួយប្រធានាធិបតីអាមេរិក ដូណាល់ ត្រាំ ហើយក្នុងកិច្ចពិភាក្សានោះ លោកក៏លើកឡើងពីជម្លោះកម្ពុជា-ថៃផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អាន់វ៉ា បានសរសេរខ្លឹមសារថា «ក្នុងកិច្ចសន្ទនាតាមទូរស័ព្ទជាមួយប្រធានាធិបតី ដូណាល់ ត្រាំ មុននេះបន្តិច ខ្ញុំបានបញ្ជាក់ជាថ្មីពីការប្តេជ្ញាចិត្តរបស់ម៉ាឡេស៊ី ក្នុងនាមជាប្រធានអាស៊ាន ដើម្បីបន្តដើរតួនាទីយ៉ាងសកម្មក្នុងការធានាសុខសន្តិភាពក្នុងតំបន់ ជាពិសេសទាក់ទងនឹងបញ្ហាកម្ពុជា-ថៃ។ ប្រធានាធិបតី ត្រាំ ទទួលស្គាល់ភាពជោគជ័យរបស់ម៉ាឡេស៊ី ក្នុងការសម្រួលកិច្ចព្រមព្រៀងឈប់បាញ់រវាងកម្ពុជា និងថៃ ថាជាសមិទ្ធផលដ៏ធំធេង ដែលបង្ហាញពីអធិបតេយ្យភាពនិងភាពរឹងមាំរបស់ម៉ាឡេស៊ី។ ខ្ញុំក៏សរសើរគាត់ដែរ ចំពោះតួនាទីដែលសហរដ្ឋអាមេរិក កំពុងតែធ្វើការធានាថា បទឈប់ បាញ់គ្នាបានសម្រេច។ ម៉ាឡេស៊ី ទន្ទឹងរង់ចាំវត្តមានរបស់លោកប្រធានាធិបតី ត្រាំ ក្នុងកិច្ចប្រជុំកំពូលអាស៊ាននៅខែក្រោយ ដែលនឹងក្លាយជាវេទិកាសំខាន់មួយ សម្រាប់ពង្រឹងកិច្ចសហប្រតិបត្តិការ ដើម្បីសន្តិភាព ស្ថិរភាព និងវិបុលភាពក្នុងតំបន់»។

សូមជម្រាបថា ​​​នាយករដ្ឋមន្ត្រី​​ម៉ាឡេស៊ី​ កំពុង​​កាន់តួនាទី​​​ជា​ប្រធានប្តូរវេន​អាស៊ាន និង​ជា​អ្នកសម្របសម្រួល​ដ៏សកម្ម​​ក្នុង​​​ជម្លោះ​​កម្ពុជា​និង​ថៃ ដោយ​ទទួលបាន​ការ​កោតសរសើរ​ពី​​មហាអំណាច​សហរដ្ឋអាមេរិក និង​ចិន។

យ៉ាងណា ប្រទេសថៃ នៅតែរំលោភបទឈប់បាញ់និងបន្តឈ្លានពានកម្ពុជា ដល់ថ្នាក់លោក អាន់វ៉ា ជំរុញឲ្យថៃ ចូលតុចរចា ដោះស្រាយជម្លោះព្រំដែនជាមួយកម្ពុជា។ 

លោកបានជួបសន្ទនាតាមទូរស័ព្ទជាមួយនាយករដ្ឋមន្ត្រីថៃ Anutin Charnvirakul ដោយជំរុញឲ្យភាគីថៃ ដោះស្រាយជម្លោះព្រំដែនជាមួយកម្ពុជា ដោយសន្តិវិធី និងនាំយកបញ្ហាទៅកាន់តុចរចា។

ទន្ទឹមនោះ លោក អាន់វ៉ា ក៏អំពាវនាវផងដែរឲ្យយកបញ្ហាដែលកើតឡើង ទៅដោះស្រាយនៅតុចរចា តាមរយៈកិច្ចប្រជុំគណៈកម្មាធិការព្រំដែនរួម (JBC )៕

អត្ថបទ៖ សុខ សុវណ្ណ

ចុចអាន៖ លោក អាន់វ៉ា អញ្ជើញ​ អានុទីន ទៅ​ទស្សនកិច្ច​នៅ​ម៉ាឡេស៊ីដែល​​​អាច​ដោះស្រាយ​បញ្ហា​ទ្វេភាគីផង​ ​និង​ជម្លោះ​ជាមួយកម្ពុជា​ផង​​​​