ព័ត៌មានអន្ដរជាតិ

លោក អាន់វ៉ា អញ្ជើញ អានុទីន ទៅទស្សនកិច្ចនៅម៉ាឡេស៊ីដែលអាចដោះស្រាយបញ្ហាទ្វេភាគីផង និងជម្លោះជាមួយកម្ពុជាផង

បានផុស

១០ ខែ មុន

នៅ

ថ្ងៃសុក្រ ១៩ កញ្ញា ២០២៥

ដោយ

ខណៈពេលដែលភាពតានតឹងរវាងកម្ុជានិងថៃ បានផ្ទុះឡើងជាថ្មី នាយករដ្ឋមន្ត្រីម៉ាឡេស៊ី លោកអាន់វ៉ា អ៊ីប្រាហ៊ីម (Anwar Ibrahim ) បានអញ្ជើញនាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) ទៅបំពេញទស្សនកិច្ចនៅប្រទេសម៉ាឡេស៊ី ដើម្បីដោះស្រាយបញ្ហាទ្វេភាគីជាមួយម៉ាឡេស៊ីផង និង ជជែករកដំណោះស្រាយលើបញ្ហាជម្លោះជាមួយកម្ពុជាផង។

លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និង លោក អានុទីន ឆានវីរៈគុល នាយករដ្ឋមន្ត្រីថៃ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម កំពុងកាន់តួនាទីជាប្រធានប្តូរវេនអាស៊ាន និងជាអ្នកសម្របសម្រួលដ៏សកម្មក្នុងជម្លោះកម្ពុជានិងថៃ ដោយទទួលបានការកោតសរសើរពីមហាអំណាចសហរដ្ឋអាមេរិក និងចិន បានរួតរះដាក់ចេញដំណោះស្រាយសម្រាប់ការចរចា ក្នុងពេលដែលភាគីថៃត្រូវបានគេមើលឃើញថា បានដាក់ពង្រាយកងទ័ពជាថ្មីទៅកាន់តំបន់ព្រំដែន ព្រមទាំងបង្ករបួសដល់ប្រជាជនកម្ពុជាកាលថ្ងៃទី១៧ខែកញ្ញា នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

ឆ្លើយតបទៅនឹងជម្លោះកើនឡើងជាថ្មីនេះ នាយករដ្ឋមន្ត្រីម៉ាឡេស៊ី បានជួបសន្ទនាតាមទូរស័ព្ទជាមួយនាយករដ្ឋមន្ត្រីថៃ លោក អានុទីន ឆានវីរៈគុល ក៏ដូចជា ជាមួយនាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត នៅថ្ងៃទី១៨ខែកញ្ញា ពោលគឺមួយថ្ងៃបន្ទាប់ពីកើតហេតុនៃអំពើហិង្សានៅព្រំដែន។

សារព័ត៌មានម៉ាឡេស៊ី Bernama បានស្រង់សំណេររបស់លោក អាន់វ៉ា ក្នុងខ្លឹមសារដើមថា៖«ការបំពេញទស្សនកិច្ច(ដោយនាយករដ្ឋមន្ត្រី អានុទីន) គឺស្ថិតក្នុងចំណោមកិច្ចខិតខំប្រឹងប្រែងដើម្បីពង្រឹងទំនាក់ទំនងជិតស្និទ្ធរវាងប្រទេសជិតខាងទាំងពីរ»។

លោក អាន់វ៉ា បន្ថែមថា៖ «យើងក៏បានពិភាក្សាការវិវឌ្ឍចុងក្រោយនៅឯព្រំដែនថៃ-កម្ពុជា។ យើងសង្កត់ធ្ងន់នូវសារៈ សំខាន់ចំពោះគ្រប់ភាគីដើម្បីរក្សាសន្តិភាព និងជៀសវាងការអនុញ្ញាតឲ្យភាពផ្សេងគ្នាណាមួយបង្កភាពតានតឹងមិនចាំបាច់»។

តាមរយៈសារដែលបង្ហោះលើបណ្តាញសង្គមផ្លូវការ នាយករដ្ឋមន្ត្រីម៉ាឡេស៊ី ក៏អំពាវនាវឲ្យថៃនាំយកបញ្ហាដែលកើតឡើង ទៅដោះស្រាយនៅតុចរចា តាមរយៈកិច្ចប្រជុំគណៈកម្មាធិការព្រំដែនរួម (JBC )។

នាយករដ្ឋមន្ត្រីម៉ាឡេស៊ី បានបង្ហោះសារពីការសន្ទនាជាមួយ នាយករដ្ឋមន្ត្រីថៃ លោក អានុទីន ឆានវីរៈគុល ប៉ុន្តែលោកមិនបានបង្ហាញអំពីការជួបសន្ទនាជាមួយនាយករដ្ឋមន្ត្រីកម្ពុជាទេ ស្របពេលដែលបណ្តាញសង្គមរបស់នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានបង្ហោះពីការជួបសន្ទនាជាមួយនាយករដ្ឋមន្ត្រីម៉ាឡេស៊ីកាលថ្ងៃទី១៨ខែកញ្ញានោះដែរ។

នាយករដ្ឋមន្ត្រីថៃ លោក អានុទីន ឆានវីរគុល បានឡើងជានាយករដ្ឋមន្ត្រីផ្លូវការកាលថ្ងៃទី៧ខែកញ្ញា បន្ទាប់ព្រះមហាក្សត្រថៃបានចេញព្រះរាជក្រឹត្យតែងតាំង ក្រោយសភាបោះឆ្នោតគាំទ្រកាលថ្ងៃទី៥ខែកញ្ញា ដែលមានរយៈពេលមួយសប្តាហ៍ ក្រោយពីអតីតនាយករដ្ឋមន្ត្រីផែថងថាន ស៊ីណាវ៉ាត្រ ត្រូវបានបណ្តេញចេញពីអំណាចកាលថ្ងៃទី២៩ខែសីហា ដោយតុលាការធម្មនុញ្ញថៃ៕

រ៉ាន់ រើយ