ព័ត៌មានអន្ដរជាតិ

វេណេស៊ុយអេឡា៖ អាមេរិកបង្កហេតុ ដោយដាក់ពង្រាយយន្តហោះចម្បាំងជិតឆ្នេរសមុទ្រការ៉ាប៊ីន

បានផុស

១០ ខែ មុន

នៅ

ថ្ងៃសុក្រ ៣ តុលា ២០២៥

ដោយ

Chheang

ប្រទេសវេណេស៊ុយអេឡា បានឲ្យដឹងកាលពីថ្ងៃព្រហស្បតិ៍ទី២ខែតុលាឆ្នាំ២០២៥ថា ខ្លួនបានរកឃើញយន្តហោះចម្បាំង F-35 របស់អាមេរិកចំនួន៥គ្រឿង ដែលកំពុងហោះហើរនៅជិតឆ្នេរសមុទ្រការ៉ាប៊ីនរបស់ខ្លួន ដោយហៅឧបទ្ទវហេតុនេះថាជា«ការបង្កហេតុ» និងការគំរាមកំហែងដល់សន្តិសុខជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងការពារជាតិ លោក Vladimir Padrino បានប្រាប់ទូរទស្សន៍រដ្ឋថា យន្តហោះដែលហោះហើរក្នុងកម្ពស់ប្រហែល ១០គីឡូម៉ែត្រ និងក្នុងល្បឿនប្រមាណ ៧៤០គីឡូម៉ែត្រក្នុងមួយម៉ោង ត្រូវបានតាមដានឃើញដោយប្រព័ន្ធការពារដែនអាកាសនៅក្នុងតំបន់ Maiquetía ដែលគ្របដណ្តប់លើដែនអាកាសវេណេស៊ុយអេឡា និងលាតសន្ធឹងលើផ្ទៃមេឃអន្តរជាតិ។

លោក Padrino បាននិយាយថា «ពួកគេគឺជាយន្តហោះប្រយុទ្ធ។ យន្តហោះប្រយុទ្ធដែលចក្រពត្តិនិយមអាមេរិកបានហ៊ានចូលទៅជិតឆ្នេរសមុទ្រវេណេស៊ុយអេឡា»។ លោកបានបន្ថែមថា នាវិកក្រុមហ៊ុនអាកាសចរណ៍ពាណិជ្ជកម្មក្នុងតំបន់ក៏រាយការណ៍ថាបានឃើញយន្តហោះទាំងនោះដែរ។

យោងតាមរដ្ឋាភិបាល យន្តហោះទាំងនោះត្រូវបានគេរកឃើញចម្ងាយប្រហែល ៧៥គីឡូម៉ែត្រពីឆ្នេរសមុទ្ររបស់ប្រទេសវេណេស៊ុយអេឡា។

ក្រសួងការពារជាតិវេណេស៊ុយអេឡា បានប្រាប់ថា យន្តហោះចម្បាំង F-35 ទំនងជាមានមូលដ្ឋាននៅព័រតូរីកូ ជាកន្លែងដែលសហរដ្ឋអាមេរិកបានដាក់ពង្រាយក្រុមយន្តហោះនាពេលថ្មីៗនេះ។ យ៉ាងហោចណាស់ យន្តហោះចម្បាំងអាមេរិក ៥គ្រឿងបានទៅដល់ទីនោះនៅពាក់កណ្តាលខែកញ្ញា ហើយទីក្រុងវ៉ាស៊ីនតោនបានបញ្ជាក់ពីផែនការដាក់ពង្រាយឲ្យដល់ ១០គ្រឿងសម្រាប់ការបណ្តុះបណ្តាល និងប្រតិបត្តិការក្នុងតំបន់។

ការប្រទះឃើញនេះ កើតឡើងចំពេលដែលភាពតានតឹងកាន់តែខ្លាំងឡើងរវាងទីក្រុងការ៉ាកាស និងទីក្រុងវ៉ាស៊ីនតោន បន្ទាប់ពីការដាក់ពង្រាយនាវាចម្បាំងអាមេរិកជាច្រើនគ្រឿងនៅតំបន់ការ៉ាប៊ីន។ សហរដ្ឋអាមេរិកនិយាយថា បេសកកម្មនេះមានគោលដៅលើការជួញដូរគ្រឿងញៀន ប៉ុន្តែមន្ត្រីវេណេស៊ុយអេឡាអះអាងថា អាមេរិកមានគោលបំណងផ្លាស់ប្តូររបប។

កងកម្លាំងសហរដ្ឋអាមេរិក បានធ្វើការវាយប្រហារក្នុងរយៈពេលប៉ុន្មានសប្តាហ៍ថ្មីៗនេះប្រឆាំងនឹងទូកចំនួន៤គ្រឿងនៅក្នុងតំបន់ ដោយបានសម្លាប់ជនសង្ស័យជាអ្នកជួញដូរគ្រឿងញៀនជាង១០នាក់។ យ៉ាងណាមិញ វេណេស៊ុយអេឡា បានច្រានចោលយុត្តិកម្មរបស់អាមេរិក ដោយលើកឡើងថា ទីក្រុងវ៉ាស៊ីនតោនមិនបានផ្តល់ព័ស្តុតាងដែលថា គោលដៅគឺពាក់ព័ន្ធនឹងការរត់ពន្ធគ្រឿងញៀនទេ៕

ដោយ៖ ឈាង