វប្បធម៌ ជំនឿ

ម្ហូបមួយមុខទាក់ទងនឹងពពួកប្រេត កូនចៅខ្មែរចោលមិនបាន ក្នុងពិធីកាន់បិណ្ឌថ្ងៃទីមួយ

បានផុស

៩ ខែ មុន

នៅ

ថ្ងៃពុធ ២២ កញ្ញា ២០២១

ដោយ

ភ្ជុំបិណ្ឌ ជាពិធីបុណ្យមួយក្នុងចំណោមពិធីបុណ្យធំៗដទៃទៀត ចំពោះអ្នកកាន់ព្រះពុទ្ធសាសនា។ ប្រជាជនខ្មែរតាំងពីបុរាណរៀងមក តែងប្រារព្ធពិធីនេះឡើង ចាប់ពីថៃ្ង ១រោច ខែភទ្របទ រហូតដល់ថៃ្ងទី ១៥រោច មានរយៈពេល ១៥ ថៃ្ង ដែលយើងហៅថាបិណ្ឌ១, បិណ្ឌ២ … និងថៃ្ងបញ្ចប់ គឺជា ថៃ្ង “ភ្ជុំបិណ្ឌ”

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកនៅថ្ងៃកាន់បិណ្ឌទីមួយ ពុទ្ធសាសនិកខ្មែរតែងមានជំនឿលើមុខម្ហូបមួយមុខ ដែលមានប្រវត្តិទាក់ទងនឹងបុណ្យភ្ជុំបិណ្ឌ ជាពិសេសគឺពពួកប្រេតតែម្ដង។

ឆាមីសួរ ជាមុខម្ហូបមួយស្រួលធ្វើនិងរហ័សមិនសាំញាំច្រើនដូចម្ហូបដទៃទៀត។ ម្ហូបមួយនេះ មានប្រវត្តិចាក់ស្រេះ និងជំនឿដ៏យូរលង់ណាស់មកហើយ។

បើតាមការរៀបរាប់ពីចាស់ៗក្នុងផ្ទះបានមានប្រសាសន៍ថា ឆាមីសួរជាម្ហូបដែលពពួកប្រេតអាចហូបបានជាងម្ហូបណាទាំងអស់។ ដោយសារប្រេតខ្លះ មានមាត់តូចជាងម្ជុល មិនអាចបរិភោគម្ហូបអាហារបានតាមចិត្តដូចប្រេតផ្សេងៗបានទេ។ មូលហេតុក៏ដោយសារប្រេតនេះមានកម្មក្រាស់ជាងប្រេតផ្សេង ទើបតម្រូវឲ្យមានតូចជាម្ជុល ពិបាកហូប ពិបាកផឹកទឹក និងពិបាកដកដង្ហើមជាងគេ។

ដូចនេះហើយទើបកូនចៅស្រករក្រោយ ដែលមានជំនឿជាប់ តែងនិយមធ្វើឆាមីសួរទៅវត្តនៅថ្ងៃកាន់បិណ្ឌទីមួយ មិនដែលអាក់ខានឡើយ។ ជាពិសេសដើម្បីបានប្រគេនទៅដល់ព្រះសង្ឃដែលគង់ចាំព្រះវស្សា និងជឿថា ម្ហូបពិសេសនេះ នឹងអាចទៅដល់ដូនតាពួកគេ ដែលមិនដឹងថាទៅកើតជាអ្វីឬយ៉ាងណានោះទេ។

យ៉ាងណាមិញ បើតាមល្បើកប្រេតរបស់លោក សុង ស៊ីវ បានបញ្ជាក់ថា ប្រេតក្នុងលោកនេះមានចំនួន ១២ ប្រភេទ ហើយប្រេត សូចិមុខ ជាប្រេតដែលមានមាត់ប៉ុនម្ជុល ក្បាលធំត្រមែង រន្ធមាត់ប៉ុនរន្ធក្តិតម្ជុល ដៃជើងធំបែក រាងទុលមុលធំប៉ុនភ្នំ ភ្នែកលៀនក្រឡោក ក្រចកដៃសោតស្រែងស៊ីសុះដុំ ដុះវែងក្រាសចោទដូចជើងភ្នំ សក់ក្បាលពុកមាត់ពុកចង្កាដុះដូចព្រឹក្សា ។ ពួកប្រេតនេះ ច្រើនរស់នៅបព្វតាព្រៃជ្រៅ ភ្នំគិជ្ឈកូដ ហើយប្រេតនេះស្រេកឃ្លានអាហារចាក់ទឹកមិនចូល ញាត់បាយមិនទៅ ចេះតែរស់នៅដោយផលកម្មដែលខ្លួនបានសាង ។ កាលពីជាតិមុនមិនបានធ្វើបុណ្យ មានទ្រព្យច្រើនតែចិត្តកំណាញ់ មិនដាក់ទានឲ្យអ្នកក្រខ្សត់ សូម្បីតែមាតាបិតា ក៏មិនឲ្យលោកពិសាគ្រប់ដែរ ៕

អត្ថបទ៖ សាង ស្រីល័ក្ខ

ចុចអាន៖អត្ថន័យនិងជំនឿនៃការបោះបាយបិណ្ឌ នាវេលាម៉ោង ៤ ទៀបភ្លឺ

ចុចអាន៖ជិតដល់ថ្ងៃកាន់បិណ្ឌហើយ មកដឹងពីប្រភេទប្រេតក្នុងជំនឿសាសនា

ចុចអាន៖ការពិត ៥ យ៉ាង ទាក់ទងនឹងពិធីបុណ្យភ្ជុំបិណ្ឌ