ឯកអគ្គរដ្ឋទូតចិន៖ កាលពី៦០០ឆ្នាំមុន បេសកជនចិន កោតសរសើរទំនៀមទម្លាប់ដ៏សម្បូរបែបកម្ពុជា

លោក វ៉ាង វិនពីន (WANG Wenbin) ឯកអគ្គរដ្ឋទូតវិសាមញ្ញ និង​ពេញ​សមត្ថភាពនៃសាធារណរដ្ឋប្រជាមានិតចិន ប្រចាំនៅកម្ពុជា បានលើកឡើងថា កាលពី ៦០០ ឆ្នាំមុន មានបេសកជនចិន បានកើតសរសើរ ពី «ទំនៀមទំម្លាប់ដ៏សម្បូរបែប» របស់កម្ពុជា។

ការលើកឡើងនេះ បន្ទាប់ពីលោក បានសម្តែងការរីករាយជាខ្លាំងដែលបានទៅទស្សនាវិហារលោកតាព្រហ្មនៅជាយក្រុងកំពង់ចាម និងបានគោរពលោក Zheng He ដែលជាបេសកជននៃមិត្តភាពរវាងចិននិងកម្ពុជា។ លោក វ៉ាង វិនពីន បានបង្ហោះនៅលើបណ្តាញសង្គមហ្វេសប៊ុក នាយប់ថ្ងៃទី ០២ ខែមេសា ឆ្នាំ ២០២៥ នេះថា៖«កាលពី ៦០០ ឆ្នាំមុន លោក Zheng He បានកោតសរសើរ”ទំនៀមទម្លាប់ដ៏សម្បូរបែប”របស់ប្រទេសកម្ពុជា។ ៦០០ ឆ្នាំក្រោយនាថ្ងៃនេះ កម្ពុជាកំពុងបោះជំហានទៅមុខលើមាគ៌ាថ្មីនៃប្រជាជាតិខ្មែរ»។

ភ្ជាប់ជាមួយខ្លឹមសារខាងលើនេះ លោកឯកអគ្គរដ្ឋទូតចិន បានគូសបញ្ជាក់ថា មិត្តភាពដែកថែបរវាងចិននិងកម្ពុជាដែលឆ្លងកាត់អស់រយៈពេលយូរឆ្នាំនិងការសាកល្បងនៃឧបសគ្គទាំងឡាយ ប្រាកដជាទទួលបានលទ្ធផលជាផ្លែផ្កាយ៉ាងច្រើនអនេក។

ជាការកត់សម្គាល់ អំឡុងពេលលោក វ៉ាង វិនពីន កាន់តំណែងជាឯកអគ្គរដ្ឋទូតចិនប្រចាំកម្ពុជា លោកតែងតែចែករំលែកពីភាពសម្បូរបែបវប្បធម៌ប្រពៃណី តំបន់ទេសចរណ៍ និងសក្តានុពលវិនិយោគរបស់កម្ពុជា នៅលើបណ្តាញសង្គមរបស់ខ្លួន៕