អាជ្ញាធរសំបូរព្រៃគុក ក្រសួងការបរទេសអាមេរិក រៀបចំសិក្ខាសាលា បេតិកភណ្ឌវប្បធម៌​

អាជ្ញាធរជាតិសំបូរព្រៃគុក សហការជាមួយក្រសួងការបរទេស សហរដ្ឋអាមេរិក បានរៀបចំសិក្ខាសាលាស្ដីពី “តម្លៃបេតិកភណ្ឌវប្បធម៌ និងការអនុវត្តច្បាប់នៅរមណីយដ្ឋានប្រាសាទសំបូរព្រៃគុក”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងវប្បធម៌ និងវិចិត្រសិល្បៈ បានឱ្យដឹងថា អាជ្ញាធរជាតិសំបូរព្រៃគុក បានរៀបចំបើកសិក្ខាសាលាស្ដីពី “តម្លៃបេតិកភណ្ឌវប្បធម៌ និងការអនុវត្តច្បាប់នៅរមណីយដ្ឋានប្រាសាទសំបូរព្រៃគុក” ក្រោមអធិបតីភាព លោក ប្រាក់ សុណ្ណារ៉ា រដ្ឋលេខាធិការ តំណាង បណ្ឌិតសភាចារ្យ ភឿង សកុណា រដ្ឋមន្រ្តី ក្រសួងវប្បធម៌ និងវិចិត្រសិល្បៈ ចាប់ពីថ្ងៃទី១៩-២២ ខែមិថុនា ឆ្នាំ២០២៣។

សិក្ខាសាលានេះ រៀបចំដើម្បីជូនដល់មន្រី្តជំនាញនៅតាមបណ្តារាជធានី-ខេត្ត សហគមន៍វប្បធម៌ សហគមន៍ទេសចរណ៍ ព្រមទាំងកងកម្លាំងនគរបាលការពារបេតិកភណ្ឌ និងនគរបាលទេសចរណ៍ ដែលមានសិក្ខាកាមសរុបចំនួនប្រមាណ ៩០នាក់។

សិក្ខាសាលាស្ដីពី “តម្លៃបេតិកភណ្ឌវប្បធម៌ និងការអនុវត្តច្បាប់នៅរមណីយដ្ឋានប្រាសាទសំបូរព្រៃគុក” មានការចូលរួមធ្វើបទបង្ហាញពីសំណាក់វាគ្មិនជាតិ និងអន្តរជាតិ នៅប្រាសាទសំបូរព្រៃគុក និងទីរួមខេត្តកំពង់ធំ ក្រោមជំនួយឧបត្ថម្ភនៃការអនុវត្តកិច្ចព្រមព្រៀងបេតិកភណ្ឌវប្បធម៌ (ឆ្នាំ២០២២) របស់ក្រសួងការបរទេស សហរដ្ឋអាមេរិក។

សិក្ខាសាលាខាងលើរៀបចំឡើងក្នុងគោលបំណងចូលរួមផ្សព្វផ្សាយ និងអនុវត្តច្បាប់ សម្រាប់រួមចំណែកដល់ការអភិរក្ស និងកិច្ចការពាររមណីយដ្ឋានប្រាសាទសំបូរព្រៃគុក៕