សម្ដេចធិបតី ស្នើកុំអន់ចិត្តសង្ក្រាន្តថៃចូលបញ្ជីយូណេស្កូ ខណៈកម្ពុជាក៏មានសិទ្ធិស្នើ

ខណៈមានការមិនពេញចិត្តចំពោះ ថៃដែលបានចុះ សង្ក្រាន្តថៃ ចូលបញ្ជីបេតិកភណ្ឌអរូបីមនុស្សជាតិ របស់យូណេស្កូ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើប្រជាពលរដ្ឋកុំមានការអាក់អន់ស្រពន់ចិត្ត ខណៈ កម្ពុជា ក៏មានសិទ្ធិ និងគ្រោង ស្នើ សង្រ្កាន្តកម្ពុជា ចុះក្នុងបញ្ជីបេតិកភណ្ឌអរូបីមនុស្សជាតិ យូណេស្កូ ផងដែរ។

ការថ្លែងនេះ ធ្វើឡើងក្នុងឱកាស សម្តេចមហាបវរធិបតី ហ៊ុន ម៉ាណែត អញ្ជើញជាអធិបតី​ក្នុង ពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងការងារ និងបណ្តុះបណ្តាលវិជ្ជាជីវៈ នៅរសៀលថ្ងៃទី៨ ខែកុម្ភៈ ឆ្នាំ២០២៤ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ហ៊ុន ម៉ាណែត បញ្ជាក់ថា ថៃមិនបានយក សង្ក្រាន្តខ្មែរទេ ដ្បិតពិធីបុណ្យនេះមាននៅប្រទេសកាន់ព្រះពុទ្ធសាសនាមួយចំនួនទៀតផងដែរ។

សម្ដេចធិបតី ហ៊ុន​ ម៉ាណែត បញ្ជាក់ថា៖ “យើងក៏មាន [សង្ក្រាន្ត] ដែរ ក្រសួងវប្បធម៌យើងទៅថ្ងៃមុខ កំពុងពិចារណា ក្នុងការដាក់សង្ក្រាន្តនៅកម្ពុជាជាបេតិកភណ្ឌដែរ។ វប្បធម៌យើងស្រដៀងគ្នា ដូច គុនខ្មែរ និង មួយថៃ។ កាលយើងចុះ គុនខ្មែរ ក៏បងប្អូនថៃមួយចំនួនយល់ច្រឡំថាជារបស់គាត់ ហើយជំទាស់មិនឱ្យចុះ ប៉ុន្តែវប្បធម៌ប្រទេស២ ដោយឡែកស្រដៀងគ្នា”។

សម្ដេចធិបតី ហ៊ុន​ ម៉ាណែត មានប្រសាសន៍បន្តថា៖ “ថៃចុះ សង្ក្រាន្តថៃ មិនមែនសង្ក្រាន្ត ទទេទេ ចំណែកកម្ពុជា ក៏មានសិទ្ធិចុះសង្ក្រាន្តកម្ពុជាដែរ គឺអត់មានអីខុសទេ សុំបញ្ជាក់។ ហើយកុំយករឿងយល់ច្រឡំនាំឱ្យឈ្លោះគ្នាប្រទេសជាតិទាំងសងខាង”។

គួររម្លឹកថា អង្គការយូណេស្កូ កាលពីថ្ងៃទី៦ ខែធ្នូ ឆ្នាំ២០២៣ បានប្រកាសដាក់បញ្ចូលពិធីបុណ្យសង្ក្រាន្តចូលឆ្នាំថ្មីរបស់ប្រទេសថៃ ទៅក្នុងបញ្ជីបេតិកភណ្ឌអរូបីនៃមនុស្សជាតិ ចេញពីប្រទេសបុតស្វាណាដែលជាប្រទេសស្ថិតនៅតំបន់អាហ្វ្រិកខាងត្បូង បន្ទាប់ពីថៃបានស្នើដាក់បញ្ចូលព្រឹត្តិការណ៍មួយនេះកាលពីឆ្នាំ២០២០ មកម្ល៉េះ។

ក្រោយទទួលដំណឹងនេះ គណៈកម្មាធិការរដ្ឋាភិបាលថៃ នៅឆ្នាំ២០២៤ នឹងប្រារព្ធពិធីបុណ្យសង្ក្រាន្តពេញមួយខែមេសាតែម្តង ពោលគឺមិនរៀបចំត្រឹម ៣ ថ្ងៃដូចប្រពៃណីមុនៗឡើយ ក្នុងគោលបំណងធ្វើឱ្យប្រទេសស្ថិតក្នុងចំណោមគោលដៅទេសចរណ៍ពិភពលោកកំពូលទាំង១០៕