សេដ្ឋកិច្ច

អាកាសយានដ្ឋានអន្តរជាតិតេជោ ទទួលបានអ្នកដំណើរចេញ-ចូល ១ ម៉ឺន ៥ ពាន់នាក់ ក្នុងមួយថ្ងៃ

បានផុស

៩ ខែ មុន

នៅ

ថ្ងៃចន្ទ ២០ តុលា ២០២៥

ដោយ

គិតចាប់ពីថ្ងៃដាក់ឱ្យដំណើរការរហូតមកដល់ពេលនេះ អាកាសយានដ្ឋានអន្តរជាតិតេជោ ទទួលបានអ្នកដំណើរចេញ-ចូល ជាមធ្យម ១៥០០០ នាក់ ក្នុងមួយថ្ងៃ និងជើងហោះហើរ ១៣០ ជើង ក្នុងមួយថ្ងៃ ដែលមានក្រុមហ៊ុនអាកាសចរណ៍ចំនួន ៣២ (ក្រុមហ៊ុនអន្តរជាតិចំនួន ២៨ និងក្រុមហ៊ុនក្នុងស្រុកចំនួន ៤) កំពុងប្រតិបត្តិការហោះហើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាកាសយានដ្ឋានអន្តរជាតិតេជោ ជាអាកាសយានដ្ឋានលំដាប់ថ្នាក់ 4F ត្រូវបានចំណាយទុនវិនិយោគសរុប ២ ៣០០ លានដុល្លារ លើផ្ទៃដី ២ ៦០០ ហិកតា ស្ថិតនៅស្រុកកណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ មានចម្ងាយ ២៦ គីឡូម៉ែត្រ ពីរាជធានីភ្នំពេញ ដែលការសាងសង់មានរយៈពេល ៥ ឆ្នាំ ចាប់ពីថ្ងៃទី ០៧ ខែមករា ឆ្នាំ ២០២០ និងបញ្ចប់នៅថ្ងៃទី ៣១ ខែកក្កដា ឆ្នាំ ២០២៥។

ដំណាក់កាលទី១ ចាប់ពីឆ្នាំ ២០២០ ដល់ឆ្នាំ ២០៣០ សម្រាប់អ្នកដំណើរ ១៥ លាននាក់ ក្នុងមួយឆ្នាំ។ ទំហំការងារត្រូវសាងសង់រួមមាន៖ ផ្លូវរត់ទី១ បណ្ដោយប្រវែង ៤ ពាន់មែត្រ និងទទឹង ៦០ ម៉ែត្រ មានផ្លូវស្របចំនួន ២ និងចំណតអាកាសយានចំនួន ៧៥ ចំណត ក្នុងនោះចំណតអាកាសយាន នៅជាប់អាគារស្ថានីយអ្នកដំណើរចំនួន ៣២ ចំណត និងចំណតអាកាសយាននៅឆ្ងាយពីអាគារស្ថានីយចំនួន ៤៣ ចំណត។

អាកាសយានដ្ឋានអន្តរជាតិតេជោ មានសមត្ថភាពផ្ទុក ផ្ទេរទំនិញ ចេញ-ចូល តាមផ្លូវអាកាស ១៧៥ ០០០ តោន ក្នុងមួយឆ្នាំ។ ដំណាក់កាលទី ២ ឆ្នាំ ២០៣០ ដល់ ២០៥០ អាចទទួលអ្នកដំណើរ ៣០ លាននាក់ ក្នុងមួយឆ្នាំ ដែលមានផ្លូវរត់ទី ២ និងចំណតអាកាសយាន ១៤៤ មានសមត្ថភាព ផ្ទុក ផ្ទេរទំនិញចេញ-ចូលតាមផ្លូវអាកាស ៥២៧ ០០០ តោន ក្នុងមួយឆ្នាំ។ និងដំណាក់កាលទី ៣ ក្រោយឆ្នាំ ២០៥០ សម្រាប់អ្នកដំណើរ ៥០ លាននាក់ ក្នុងមួយឆ្នាំ មានផ្លូវរត់ទី ៣។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍នៅថ្ងៃទី ២០ ខែតុលា ឆ្នាំ ២០២៥ថា ការដាក់ឱ្យប្រើប្រាស់អាកាសយានដ្ឋានថ្មីនេះ នឹងក្លាយជាកាលានុវត្តភាព ប្រកបដោយសក្ដានុពលសម្រាប់វិស័យទេសចរណ៍ និងសេដ្ឋកិច្ចកម្ពុជា ការបើកចំហជើងមេឃ ការតភ្ជាប់តាមផ្លូវអាកាស គឺជាអាទិភាពគន្លឹះទី២ ក្នុងចំណោម «មនុស្ស ផ្លូ ទឹក ភ្លើង និងបច្ចេកវិទ្យា» នៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនិតិកាលទី៧ ហើយក៏ស្ថិតក្នុងកិច្ចការអាទិភាពទី២ នៃបញ្ចកោណទី២ ដោយផ្ដោតលើការលើកកម្ពស់ការតភ្ជាប់ និងបង្កើនប្រសិទ្ធភាពនៃវិស័យដឹកជញ្ជូន៕