សេដ្ឋកិច្ច

សភាកម្ពុជា អនុម័តច្បាប់ចូលជាសមាជិក នៃអនុសញ្ញា ប្រាតិភោគជាអន្តរជាតិ សំដៅធានាលំហូរឥណទាន ក្នុងការទិញ លក់ អាកាសយាន

បានផុស

៦ នាទី មុន

នៅ

ថ្ងៃអង្គារ ១៤ កក្កដា ២០២៦

ដោយ

សម្ដេច ឃួន សុដារី ប្រធានរដ្ឋសភាកម្ពុជា នៅថ្ងៃទី ១៤ កក្កដា ២០២៦ បានសម្រេចអនុម័តសេចក្ដីព្រាងច្បាប់ចូលជាសមាជិក នៃអនុសញ្ញាប្រាតិភោគជាអន្តរជាតិ ដើម្បីធានាលំហូរឥណទាន ក្នុងការទិញ លក់ និងជួល អាកាសយាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋលេខាធិការដ្ឋានអាកាសចរណ៍ស៊ីវិល បានដាក់សំណើស្នើសុំសេចក្តីព្រាងច្បាប់ ស្ដីពីការអនុម័តយល់ព្រមឱ្យកម្ពុជាចូលជារដ្ឋភាគីនៃអនុសញ្ញាស្ដីពីប្រាតិភោគជាអន្តរជាតិចំពោះឧបរណ៍ចល័ត ជូនរាជរដ្ឋាភិបាលដើម្បីពិនិត្យ និងអនុម័ត កាលពីថ្ងៃទី ២៥ មីនា ឆ្នាំ២០២៦ ហើយគណៈរដ្ឋមន្ត្រីបានសម្រេចយល់ព្រមក្នុង សម័យប្រជុំពេញអង្គគណៈរដ្ឋមន្ត្រី នៅថ្ងៃទី ២៦ មិថុនា ឆ្នាំ២០២៦ ដើម្បីបញ្ជូន សំណើនេះទៅសុំការពិនិត្យ និងអនុម័តពីស្ថាប័ននីតិប្បញ្ញត្តិ។

អនុសញ្ញា និងពិធីសារអាកាសយាន ត្រូវបានរៀបចំឡើងជាគោលការណ៍ដើម្បីដោះស្រាយបញ្ហាក្នុងការអនុវត្តសិទ្ធិ ប្រកបដោយការធានា និងមានលក្ខណៈងាយស្រួលចំពោះឧបករណ៍អាកាសយានដែលមានតម្លៃខ្ពស់ ដូចជាតួ អាកាសយាន ម៉ាស៊ីន និងឧត្ថម្ភាគចក្រជាដើម។

អនុសញ្ញា និងពិធីសារអាកាសយាន នឹងជួយដល់កម្ពុជា ក្នុងការអនុវត្តកិច្ចព្រមព្រៀងធានាបំណុល, ការលក់មាន លក្ខខណ្ឌក្រោមកិច្ចព្រមព្រៀងរក្សាសិទ្ធិកម្មសិទ្ធ និងកិច្ចព្រមព្រៀងជួល ចំពោះឧបករណ៍ អាកាសយាន ក្រោមរបៀបរបបអន្តរជាតិថ្មីមួយ ក្នុងការគ្រប់គ្រងឧបករណ៍ចល័ត ដែលមានតម្លៃខ្ពស់ ដូចជាតួអាកាសយាន ម៉ាស៊ីនអាកាសយាន និងឧទ្ធម្ភាគចក្រ។

ការចូលជារដ្ឋភាគីអនុសញ្ញា និងពិធីសារអាកាសយាន នឹងផ្ញើសារវិជ្ជមានទៅកាន់ទីផ្សារ ហិរញ្ញវត្ថុ និងអាកាសចរណ៍អន្តរជាតិថា កម្ពុជាបានបន្តធ្វើសមាហរណកម្មទៅក្នុងប្រព័ន្ធច្បាប់ពាណិជ្ជកម្មអន្តរជាតិ។

អនុសញ្ញា និងពិធីសារអាកាសយាន នឹងផ្ដល់ជំនឿទុកចិត្តដល់បណ្ដាអ្នកវិនិយោគ និងអ្នកឱ្យខ្ចីប្រាក់ ក្នុងការផ្ដល់ហិរញ្ញប្បទានកាន់តែច្រើនឡើងថែមទៀត ដើម្បីទិញ ឬជួលឧបករណ៍ចល័តដែលមានតម្លៃខ្ពស់ដោយសារតែមានប្រាតិភោគជាអន្តរជាតិលើគោការអនុវត្តសិទ្ធិកាន់កាប់ឡើងវិញ ការលុបការចុះបញ្ជី និងការនាំចេញអាកាសយាន ព្រមទាំងការទូទាត់សំណង៕