ព័ត៌មានអន្ដរជាតិ

អាជីវកម្មថៃខាតបង់ជាង ៤៥០ លានដុល្លារ/ខែៗ រាប់តាំងពីបិទព្រំដែនជាមួយកម្ពុជា

បានផុស

៨ ខែ មុន

នៅ

ថ្ងៃអង្គារ ២១ តុលា ២០២៥

ដោយ

រាប់តាំងពីបិទព្រំដែនគោកជាមួយកម្ពុជានៅខែមិថុនាមក អាជីវកម្មថៃបានខាតបង់គិតជាប្រាក់ប្រមាណ ១៥ ប៊ីលានបាត ឬ ៤៥៨ លានដុល្លារអាមេរិក ក្នុង១ខែៗ។ នេះបើតាមការចុះផ្សាយផ្ដាច់មុខរបស់សារព័ត៌មាន Bloomberg News ដែលស្រង់ទិន្នន័យពីក្នុងកិច្ចប្រជុំនៃគណៈកម្មធិការសេដ្ឋកិច្ចថៃកាលពីសប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Bloomberg បានសរសេរក្នុងអត្ថបទដែលចេញផ្សាយកាលពីថ្ងៃចន្ទថា ការខាតបង់អាចកាន់តែធ្ងន់ធ្ងរខ្លាំង ដោយនឹងកើនដល់ទៅ ១០០ ប៊ីលានបាត ឬប្រមាណ ៣,១ ប៊ីលានដុល្លារអាមេរិក ប្រសិនបើស្ថានភាពរាំងស្ទះព្រំដែនបន្តអូសបន្លាយដល់ចុងឆ្នាំនេះ។ នេះបើតាមរបាយការណ៍របស់គណៈកម្មធិការ ដែលស្ថិតនៅក្រោមការគ្រប់គ្រងរបស់រដ្ឋាភិបាលថៃ របស់លោកនាយករដ្ឋមន្រ្តី អានុទីន ឆានវីរៈគុន។

គួរគូសបញ្ជាក់ថា ពាណិជ្ជកម្មទ្វេភាគីកម្ពុជា-ថៃ បានធ្លាក់ចុះជាគំហុកក្រោយយោធាថៃបានសម្រេចចិត្តជាឯកតោភាគី លើការកំណត់ម៉ោងចេញចូលព្រំដែនដីគោកជាមួយកម្ពុជានៅដើមខែមិថុនា ហើយឈានទៅដល់ការបិទទាំងស្រុងនៅចុងខែដដែល។ ការណ៍នេះ បានបង្អាក់ដំណើរការចេញចូល រួមទាំងការដឹកជញ្ជូនទំនិញពីភាគីទាំងសងខាង ខណៈអាជីវកម្មថៃបានត្អូញត្អែរពីផលប៉ះពាល់នៃការបិទនេះជាហូរហែរ។

ការបិទព្រំដែនបានបន្តចំពេលដែលភាពតានតឹងកើនឡើង រហូតឈានដល់ការផ្ទុះជម្លោះប្រដាប់អាវុធនៅថ្ងៃទី ២៤ កក្កដា មុនពេលបទឈប់បាញ់សម្រេចឡើង ៥ ថ្ងៃក្រោយមក ខណៈបច្ចុប្បន្នរដ្ឋាភិបាលកម្ពុជាប្រកាន់ជំហរបើកព្រំដែនឡើងវិញ លុះត្រាំតែថៃបើកជាមុនជាឯកតោភាគីដូចការបិទរបស់ខ្លួន។

*នាយករដ្ឋមន្រ្តីថៃ លោក អានុទីន ឆានវីរៈគុន*

តាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) ពាណិជ្ជកម្មទ្វេភាគីកម្ពុជា-ថៃ សម្រេចបានជាង ៤,២៨ ប៊ីលានដុល្លារ ឆ្នាំមុន កើនឡើង ១៥,៥ ភាគរយ ដោយថៃនាំចូលមកកម្ពុជាប្រមាណ ៣,៤៤ ប៊ីលានដុល្លារ។ ដោយឡែក ៩ ខែដើមឆ្នាំនេះ ពាណិជ្ជកម្មទ្វេភាគីដដែលបានធ្លាក់ចុះ ៨,២ ភាគរយ មកត្រឹម ២,៩០ ប៊ីលានដុល្លារ ដោយការនាំចូលពីថៃធ្លាក់ចុះ ៧,៦ ភាគរយ មកត្រឹម ២,៣៣ ប៊ីលានដុល្លារ។

ប៉ុន្តែគួរកត់សម្គាល់ថា ពាណិជ្ជកម្មតាមច្រកព្រំដែនគោកកម្ពុជា និងថៃ បានធ្លាក់ចុះស្ទើរតែទាំងស្រុងនៅក្រោយព្រំដែនត្រូវបានបិទ។ ជាក់ស្ដែង នាយកដ្ឋានពាណិជ្ជកម្មបរទេសថៃ (DFT) បានឱ្យដឹងកាលពីចុងខែកញ្ញាថា ពាណិជ្ជកម្មថៃជាមួយកម្ពុជាបានធ្លាក់ចុះ ៩៩,៩ ភាគរយ មកនៅត្រឹម ១០ លានបាត (៣០,៩ ម៉ឺនដុល្លារ) នៅខែសីហា។

មន្រ្តី DFT បានសម្ដែងការព្រួយបារម្ភថា ការបិទព្រំដែនជាមួយកម្ពុជា នឹងធ្វើឱ្យប៉ះពាល់ដល់គោលដៅនាំចេញរបស់ថៃនៅឆ្នាំនេះ ចំពេលដែលសេដ្ឋកិច្ច និងពាណិជ្ជកម្មសកល ធ្លាក់ចូលទៅក្នុងភាពស្រពិចស្រពិលដោយសារតែគោលនយោបាយពន្ធគយរបស់សហរដ្ឋអាមេរិក៕

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា