សេដ្ឋកិច្ច

CBC៖ ការស្នើសុំឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចកើនឡើង ៤,៥%

បានផុស

៨ ខែ មុន

នៅ

ថ្ងៃសុក្រ ៧ វិច្ឆិកា ២០២៥

ដោយ

ចំនួននៃពាក្យស្នើសុំឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូច បានកើនឡើង ៤,៥% នៅក្នុងត្រីមាសទី ៣ ឆ្នាំ ២០២៥ ខណៈអនុបាតនៃគណនីប្រាក់កម្ចីជាមួយនឹងការសងយឺត ៩០ ថ្ងៃហួសកាលបរិច្ឆេទកំណត់ ត្រឹម ៧,៤% ដដែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍សង្ខេបរបស់ក្រុមហ៊ុនក្រេឌីត ប្យួរ៉ូ (CBC) ចេញផ្សាយក្នុងសប្ដាហ៍នេះ បង្ហាញថា ចំនួននៃពាក្យស្នើសុំឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចបានកើនឡើងជារួមមាន ៤,៥%។

បែងចែកជាវិស័យ គឺពាក្យស្នើសុំទិញទ្រព្យសកម្មកើនឡើង ២៦,៤% និងពាក្យស្នើសុំកម្ចីប្រើប្រាស់សម្រាប់អាជីវកម្មខ្នាតតូចកើនឡើងចំនួន ១២,២ ភាគរយ ប្រៀបធៀបនឹងត្រីមាសមុន។ ពាក្យស្នើសុំកម្ចីសំណង់ធ្លាក់ចុះ ៧,២%។ ពាក្យស្នើសុំក្នុងវិស័យកសិកម្មធ្លាក់ចុះ ២៣,១%។

CBC បញ្ជាក់ថា សម្រាប់ដំណើរការឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូច គឺចំនួនគណនីឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចសរុបមានការថយចុះចំនួន ០,៦% ដែលនាំឱ្យចំនួនគណនីមានចំនួន ១,៧៨ លានគណនី។ សមតុល្យសរុបបានកើនឡើង ១,៨% ឈានដល់ ៣៦,១៨ ប៊ីលានដុល្លារ នៅត្រីមាសទី ៣ ឆ្នាំ ២០២៥។

ចំណែកឯ គុណភាពឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូច គឺអនុបាតនៃឥណទានសំណងយឺតលើសពី ៩០ ថ្ងៃ (90+DPD) រក្សានៅ ៧,៤% ដដែល។ អតិថិជនភាគច្រើន នៅតែមានការប្រើប្រាស់កម្ចីតែមួយស្ថាប័ន (៦៩,៨៩%) ហើយមានគណនីឥណទានតែមួយគណនី (៥៥,៥%)។

លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុន ក្រេឌីត ប្យួរ៉ូ មានប្រសាសន៍ថា៖ «ចំនួននៃពាក្យស្នើសុំឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូច មានការកើនឡើង និងសមតុល្យនៃពាក្យស្នើសុំឥណទានមានការកើនឡើងដូចគ្នានៅក្នុងត្រីមាសនេះ ធៀបនឹងត្រីមាសមុន។ ចំនួនគណនី នៃដំណើរការឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចក៏មានការថយចុះ ០,៦% ប៉ុន្តែសមិទ្ធផលឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចនៅតែមានភាពវិជ្ជមានជាមួយនឹងចំនួនសមតុល្យ ១,៨% នៅក្នុងត្រីមាសទី ៣ នេះ»។

លោក បន្ថែមថា គុណភាពឥទានធៀបនឹងត្រីមាសមុន នៃរក្សាកម្រិតដដែលនៃអនុបាតនៃគណនីប្រាក់កម្ចីជាមួយនឹងការសងយឺត ៩០ ថ្ងៃហួសកាលបរិច្ឆេទកំណត់ត្រឹម ៧,៤% ក្នុងត្រីមាសនេះ៕

អត្ថបទ៖ ឡេង ដេត