សេដ្ឋកិច្ច

ការសងត្រឡប់យឺតលើសពី ៩០ថ្ងៃ ក្នុងប្រព័ន្ធធនាគារ និងហិរញ្ញវត្ថុ កើនឡើង ៦,៤៦% តែអាចគ្រប់គ្រងបាន

បានផុស

៤ ខែ មុន

នៅ

ថ្ងៃអាទិត្យ ២៩ មីនា ២០២៦

ដោយ

ការសងត្រឡប់យឺតយ៉ាវរបស់អតិថិជនក្នុងប្រព័ន្ធធនាគារ និងហិរញ្ញវត្ថុលើសពី ៩០ថ្ងៃ មានអត្រា ៦.៤៦% នៅក្នុងឆ្នាំ ២០២៥ កើនពី ៦.០៣ នៅឆ្នាំ ២០២៤។ នេះបើយោងតាមរបាយការណ៍របស់ក្រុមហ៊ុន ក្រេឌីត ប្យួរ៉ូ ខេមបូឌា (CBC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុន ក្រេឌីត ប្យួរ៉ូ ខេមបូឌា មានប្រសាសន៍ថា នៅក្នុងឆ្នាំ ២០២៥ ឥណទានដែលសងយឺតយ៉ាវលើសពី ៩០ថ្ងៃ រាងអាក្រក់បន្តិចបើប្រៀបធៀបនឹងឆ្នាំ ២០២៤ ប៉ុន្តែស្ថិតក្នុងលំហមួយដែលអាចគ្រប់គ្រងបាន។

យោងតាមធនាគារជាតិនៃកម្ពុជា (NBC) គិតត្រឹមឆ្នាំ ២០២៥ វិស័យធនាគារ និងមីក្រូហិរញ្ញវត្ថុនៅកម្ពុជា បានផ្ដល់ឥណទានឱ្យទៅអតិថិជនមានទំហំប្រមាណ ៦៣ ពាន់លានដុល្លារ កើនឡើង ៤,១% ប្រៀបធៀបនឹងឆ្នាំ ២០២៤ ឆ្លុះបញ្ចាំងពីភាពធន់ ក្នុងចំណោមភាពមិនប្រាកដប្រជាសកល និងបញ្ហាប្រឈមក្នុងស្រុក។

លោកស្រី ជា សិរី ទេសាភិបាលធនាគារជាតិនៃកម្ពុជា បានអះអាងថា ប្រព័ន្ធធនាគារនៅកម្ពុជា នៅតែមានភាពធន់ និងរឹងមាំព្រមទាំងបន្តទទួលបានជំនឿទុកចិត្តពីសាធារណជន ទោះបីជាស្ថានភាពសេដ្ឋកិច្ចពិភពលោកនៅតែមិនប្រាកដប្រជា។

លោកស្រី ជា សិរី បន្ថែមថា ភាពធន់ និងរឹងមាំរបស់ធនាគារ ដោយសារស្ថានភាពរឹងមាំនៃដើមទុន និងលទ្ធភាពខ្ពស់ក្នុងការបញ្ចេញសាច់ប្រាក់ដោយឆ្នាំ ២០២៥ ឥណទានដែលផ្តល់ដោយប្រព័ន្ធធនាគារបន្តកើនឡើងសន្សឹមៗ ក្នុងអត្រា ៤.១% ខ្ពស់ជាងឆ្នាំ ២០២៤ ដែលរួមចំណែកគាំទ្រដោយកំណើនតម្រូវការទុនរបស់ SMEs ក្នុងការពង្រីកអាជីវកម្ម។ ចំណែកប្រាក់បញ្ញើក្នុងប្រព័ន្ធធនាគារបានបន្តកើនឡើងល្អប្រសើរ ជាមួយនឹងអត្រាកំណើន ១៤.៧ភាគរយ។

យោងតាមរបាយការណ៍របស់ធនាគារជាតិកម្ពុជា (NBC) នៅក្នុងឆ្នាំ ២០២៥ ប្រាក់កម្ចីឥណទានរបស់អតិថិជនបានកើនឡើងប្រមាណ ៤,១% ដល់ ៦៣ ពាន់លានដុល្លារ ខណៈប្រាក់បញ្ញើបានកើន ១៤,៧% ដល់ ៦៥,៧ ពាន់លានដុល្លារ ប្រៀបធៀបនឹងឆ្នាំ ២០២៤។

យោងតាម CBC គិតត្រឹមឆ្នាំ ២០២៥ ប្រព័ន្ធធនាគារ និងហិរញ្ញវត្ថុនៅកម្ពុជា មានស្ថាប័នសរុបចំនួន ១៩៦ ក្នុងនោះមានធនាគាចំនួន ៩១ គ្រឹះស្ថានមីក្រូហិរញ្ញវត្ថុចំនួន ៧១ ក្រុមហ៊ុនភតិសន្យា និងគ្រឹះស្ថានឥណទានជនបទសរុបចំនួន ៣៤។

កម្ពុជាមានប្រជាពលរដ្ឋចំនួន ៥,១៣ លាននាក់ កំពុងប្រើប្រាស់កម្ចីឥណទានពីប្រព័ន្ធធនាគារ និងហិរញ្ញវត្ថុ នៅក្នុងឆ្នាំ ២០២៥ ដែលមានទំហំទឹកប្រាក់ប្រមាណ ៦២ ពាន់លានដុល្លារ៕