ព័ត៌មានអន្ដរជាតិ

ឥណ្ឌូណេស៊ីគ្រោងសាងសង់ឃ្លាំងថ្មីចំនួន ១០០ ដើម្បីដាក់ស្រូវ និងពោត ដែលទិញពីកសិករ

បានផុស

៣ ថ្ងៃ មុន

នៅ

ថ្ងៃអង្គារ ១១ វិច្ឆិកា ២០២៥

ដោយ

ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ បានបញ្ជាឱ្យសាងសង់ឃ្លាំងថ្មីចំនួន ១០០ សម្រាប់់ក្រុមហ៊ុនភស្តុភាររដ្ឋ Bulong ដើម្បីពង្រឹងការទិញកសិផលរួមមានស្រូវ និងពោត ពីប្រជាកសិករ។ នេះបើតាមការចុះផ្សាយរបស់កាសែត Antara នៅថ្ងៃអង្គារនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីសម្របសម្រួលកិច្ចការស្បៀងអាហារឥណ្ឌូណេស៊ី លោក Zulkifli Hasan បាននិយាយប្រាប់អ្នកសារព័ត៌មានថា៖ «កាលពីអតីតកាល ចំនួនឃ្លាំង Bulog មានទំនោរធ្លាក់ចុះ ជាជាងកើនឡើង។ ដូច្នេះ លោកប្រធានាធិបតីបានសម្រេចចិត្តថា យើងគួរតែកែប្រែបញ្ហានេះឱ្យរហ័ស ដើម្បីបន្ថែមឃ្លាំងក្នុងទីតាំងរហូតដល់ ១០០ កន្លែង»។

លោកបានពន្យល់ថា រដ្ឋាភិបាលឥណ្ឌូណេស៊ី មានគម្រោងបង្កើតឃ្លាំងស្តុកទុកក្នុងតំបន់ផលិតស្បៀងអាហារសំខាន់ៗ ដែលកំពុងប្រឈមនឹងបញ្ហា ដោយសារតែកង្វះខាតកន្លែងផ្ទុកស្បៀង ចំពេលដែលឥណ្ឌូណេស៊ីពង្រឹងការផ្គត់ផ្គង់ស្បៀងដោយខ្លួនឯង។

លោក Zulkifli បានបន្ថែមថា ផែនការអភិវឌ្ឍន៍ឃ្លាំងស្តុកទំនិញ មានសារៈសំខាន់សម្រាប់ប្រទេសឥណ្ឌូណេស៊ី ដើម្បីធានាបាននូវការគ្រប់គ្រងស្តុកស្បៀងអាហារជាតិឱ្យបានល្អប្រសើរ ជាពិសេសជាមួយនឹងការព្យាករដែលថា ផលិតកម្មស្រូវនឹងកើនឡើងពី ៣០ លានតោនក្នុងឆ្នាំ ២០២៤ ដល់ ៣៤,៧៧ លានតោន ក្នុងឆ្នាំ ២០២៥។

លោករដ្ឋមន្ត្រីដដែល បានកត់សម្គាល់បន្ថែមទៀតថា រដ្ឋាភិបាលឥណ្ឌូណេស៊ីបានកំណត់ថវិកាចំនួន ៥ ទ្រីលានរូពី (ប្រហែល ៣០០ លានដុល្លារអាមេរិក) ដើម្បីផ្តល់ហិរញ្ញប្បទានដល់គំនិតផ្តួចផ្តើមនានា ដែលមានគោលបំណងជំរុញការប្រមូលទិញយកទិន្នផលស្រូវ និងពោតពីកសិករក្នុងស្រុក៕