តម្លៃប្រេងអន្តរជាតិ​កើនជាង២% ពេលបិទការជួញដូរចុងសប្ដាហ៍ ជុំវិញសង្គ្រាមអ៊ុយក្រែន-រុស្ស៊ី

តម្លៃប្រេងឆៅអន្តរជាតិបាន​កើនឡើងជាង ២% ពេលបិទការជួញដូរនៅថ្ងៃសុក្រ ដែលជាថ្ងៃជួញដូរចុងក្រោយ​ប្រចាំសប្ដាហ៍ ក្រោយកំពង់ផែrរុស្ស៊ី Novorossiisk ​ផ្អាកការនាំចេញប្រេង បន្ទាប់ពីមាន​ការវាយប្រហារដោយដ្រូនរបស់អ៊ុយក្រែនលើកន្លែងស្ដុងប្រេងរុស្ស៊ី ដែល​បង្កើនក្ដីបារម្ភផ្នែកផ្គត់ផ្គង់។

តាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ តម្លៃប្រេងឆៅនាពេលអនាគត ម៉ាក Brent បាន​កើនឡើង ១,៣៨ ដុល្លារ ឬ ២,១៩% ដោយបិទការជួញដូរនៅតម្លៃ ៦៤,៣៩ ដុល្លារ/បារ៉ែល ខណៈតម្លៃប្រេងអាមេរិកម៉ាក WTI បាន​បិទការជួញដូរនៅតម្លៃ ១,៤០ ដុល្លារ​ ឬ ២,៣៩% ដោយ​បិទនៅតម្លៃ ៦០,០៩ ដុល្លារ/បារ៉ែល។ ​

ក្នុងអត្រាប្រចាំសប្ដាហ៍ តម្លៃប្រេងម៉ាក Brent បាន​កើនឡើង ១,៦% ខណៈ WTI បា​នកើនឡើង ០,៦%។

មន្ត្រីរុស្ស៊ីបាននិយាយថា ការវាយប្រហារនៅថ្ងៃសុក្ររបស់អ៊ុយក្រែន បានបំផ្លាញ​ឃ្លាំងប្រេងមួយកន្លែងនៅក្រុងកំពង់ផែ Novorossiisk។ អ្នកវិភាគទីផ្សារបាន​លើកឡើងថា ការវាយប្រហារលើកនេះ ហាក់មាន​ទំហំធំ និងប៉ះពាល់ខ្លាំងជាងការវាយប្រហារមុនៗ។

​ប្រភព​ពីក្នុងវិស័យប្រេងប្រាប់រ៉យទ័រថា កំពង់ផែ Novorossiisk ដែល​បានផ្អាកការនាំចេញប្រេង​ក្រោយការ នាំចេញប្រេងប្រមាណ ២,២ លាន​បារ៉ែល/ថ្ងៃ ឬ ២% នៃការផ្គត់ផ្គង់សកល។ ​លើសពីនេះ ក្រុមហ៊ុន Transneft ដែលជាក្រុមហ៊ុនផ្តាច់មុខផ្នែក​បង្ហូរប្រេងទៅកំពង់ផែដដែល បានផ្អាក​ប្រតិបត្តិការរបស់ខ្លួនជាបណ្ដោះអាសន្ន។

យ៉ាងណាមិញ​ កំណើនតម្លៃប្រេងអន្តរជាតិ​ ក៏ជំរុញផងដែរ ពីការដាក់ទណ្ឌកម្ម​របស់អាមេរិក​លើក្រុមហ៊ុនប្រេងយក្សរុស្ស៊ី Lukoil​ និង Rosneft ដែលគ្រោងចូលជាធរមាន​នៅថ្ងៃទី ២១ វិច្ឆិកា ខាងមុខ ចំពេលដែលប្រទេសអតិថិជនធំៗរួមមាន​ចិន និងឥណ្ឌា បាន​ផ្អាកការទិញប្រេងរបស់ខ្លួនដោយសារតែទណ្ឌកម្ម។

ទោះបីបែបនេះក្ដី អ្នកវិភាគទីផ្សារបាន​លើកឡើងថា កំណើននៃតម្លៃប្រេងនៅតែមាន​កំណត់ ជុំវិញ​កំណើនផលិតកម្ម និងការផ្គត់ផ្គង់ ចំពេលដែលតម្រូវការសកលបន្តខ្សោយ៕