ព័ត៌មានអន្ដរជាតិ

មេដឹកនាំកំពូលវៀតណាម ប្ដេជ្ញាជំរុញសេដ្ឋកិច្ចឱ្យកើនលើស ១០% ទោះមានឧបសគ្គសកល

បានផុស

៣ ខែ មុន

នៅ

ថ្ងៃអង្គារ ២០ មករា ២០២៦

ដោយ

មេដឹកនាំកំពូលវៀតណាម លោក តូ ឡាំ (To Lam) បានបេជ្ញាចិត្តជំរុញសេដ្ឋកិច្ចរបស់ប្រទេសឱ្យកើនឡើងលើស ១០% ក្នុង១ឆ្នាំ ក្នុងរយៈពេលប៉ុន្មានឆ្នាំចុងក្រោយនៃទសវត្សរ៍នេះ ទោះបីជាមានបញ្ហាប្រឈមពីខាងក្រៅក៏ដោយ។ នេះបើតាមអ្វីដែលលោកថ្លែងទៅកាន់ប្រតិភូក្នុងសមាជបក្សកុម្មុយនិស្តនាថ្ងៃអង្គារនេះ និងចុះផ្សាយរបស់ដោយទីភ្នាក់ងារសារព័ត៌មានរ៉យទ័រ។

សមាជបក្សកុម្មុយនិស្តវៀតណាម ដែលមានរយៈពេល១សប្ដាហ៍រាប់ពីថ្ងៃចន្ទតទៅ នឹងជ្រើសរើសប្រធានបក្សកុម្មុយនិស្តថ្មី ដែលនឹងរៀបចំគោលដៅសេដ្ឋកិច្ចរហូតដល់ឆ្នាំ ២០៣០។

លោក ឡាំ ដែលជាអគ្គលេខាធិការបក្សកុម្មុយនិស្ត បានថ្លែងថា សមាជនេះធ្វើឡើង ចំពេលដែលមាន «ការលំបាក និងបញ្ហាប្រឈមជាច្រើន រាប់ចាប់តាំងពីគ្រោះមហន្តរាយធម្មជាតិ ព្យុះ និងទឹកជំនន់ រហូតដល់ជំងឺរាតត្បាត ហានិភ័យសន្តិសុខ ការប្រកួតប្រជែងជាយុទ្ធសាស្ត្រដ៏ខ្លាំងក្លា និងការរំខានធំៗក្នុងខ្សែច្រវ៉ាក់ផ្គត់ផ្គង់ថាមពល និងស្បៀងអាហារ»។

កន្លងមក រដ្ឋាភិបាលវៀតណាមបានកំណត់គោលដៅកំណើនសេដ្ឋកិច្ចមិនក្រោម ១០% ចាប់ពីឆ្នាំ ២០២៦ នេះតទៅ។

លោក ឡាំ បានថ្លែងនៅថ្ងៃអង្គារនេះបន្តថា វៀតណាមប្តេជ្ញាកាត់បន្ថយប្រព័ន្ធរដ្ឋបាលដែលមានភាពស្មុកស្មាញ និងពង្រីកពាណិជ្ជកម្មសកល ដើម្បីការពារឯករាជ្យភាព និងផលប្រយោជន៍ជាតិរបស់ប្រទេស។

គេមើលឃើញថា ទោះបីជាប្រធានាធិបតីអាមេរិក ដូណាល់ ត្រាំ ដាក់ពន្ធ ២០% លើទំនិញវៀតណាមក្ដី ប៉ុន្តែការនាំចេញរបស់វៀតណាមទៅអាមេរិកនៅតែកើនឡើងខ្លាំង ដែលបង្កើតបានជាអតិរេកពាណិជ្ជកម្មដ៏ខ្ពស់។ យ៉ាងណាមិញ ដោយសារតែបញ្ហានេះ វៀតណាមកំពុងព្យាយាមពង្រឹងពាណិជ្ជកម្មជាមួយដៃគូផ្សេងទៀតៗ ដោយរំពឹងថា ឥទ្ធិពលនៃពន្ធអាមេរិកនឹងប៉ះពាល់លើការនាំចេញខ្លាំងទៅៗ។

លោក ឡាំ ក៏បាននិយាយផងដែរថា ហេដ្ឋារចនាសម្ព័ន្ធត្រូវការអភិវឌ្ឍដើម្បីដោះស្រាយការប្រែប្រួលអាកាសធាតុ និងដើម្បីកែលម្អការតភ្ជាប់ក្នុងតំបន់ និងពិភពលោក។ លោកគូសបញ្ជាក់អំពីកំណើននៃគម្រោងហេដ្ឋារចនាសម្ព័ន្ធ ដែលបានជួយដល់កំណើនសេដ្ឋកិច្ច ប៉ុន្តែក៏បានបង្កើនការព្រួយបារម្ភអំពីការចំណាយខ្ជះខ្ជាយផងដែរ៕