​ក្រុមហ៊ុន​នាំចេញ​​ ចូលរួមពិព័រណ៍ម្ហូបអាហារ នៅសហរដ្ឋអាមេរិក​​ សំដៅពង្រីកទីផ្សារអង្ករកម្ពុជា

ក្រុមហ៊ុន​នាំចេញអង្ករ ​Amru Rice ​(Cambodia) បានចូលរួមពិព័រណ៍ម្ហូបអាហារ ដែលរៀបចំឡើងដោយសមាគម​ភោជនីយដ្ឋាន​សហរដ្ឋអាមេរិក ​(NRA Show 2026) ​នៅទីក្រុង ​Chicago ចាប់ពីថ្ងៃទី ១៦ ​ដល់ថ្ងៃទី ១៩ ​ឧសភា ​២០២៦​ ដើម្បីបន្តពង្រីកទីផ្សារអង្ករកម្ពុជា និងវិស័យស្បៀងអាហារប្រកប​ដោយចីរភាព​ទៅ​កាន់ទីផ្សារពិភពលោក។ ​

​លោក សុង សារ៉ន អគ្គនាយនៃក្រុមហ៊ុន Amru Rice (Cambodia) ​មានប្រសាសន៍ថា ក្រុមហ៊ុន Amru Rice បានចូលរួម ដើម្បីផ្សព្វផ្សាយអង្ករប្រណីតកម្ពុជា ដែលឆ្លើយតបទៅនឹងប្រព័ន្ធ​សុវត្ថិភាពស្បៀង​អាហារប្រកបដោយនិរន្តភាព ដែលបានសហការជាមួយគម្រោងជាច្រើនដូចជា គម្រោង អេមស៍ (AIMS) ​កម្មវិធីស្បៀងអាហារពិភពលោក (WFP) និងគម្រោងផ្សេងទៀតដែលជំរុញទីផ្សារកសិផល និងប្រព័ន្ធស្បៀង​អាហារ​ប្រកបដោយនិរន្តភាព។​

​លោក សុង សារ៉ន ​បន្ថែមថា ដំណើរចូលរួមលើកនេះ ​ក្នុង​ក្របខណ្ឌម៉ាកយីហោអង្កររបស់កម្ពុជាផ្ទាល់ ​គឺជាលើកទី១​សម្រាប់ Amru Rice ខណៈម៉ាកយីហោ​របស់គេគឺបានទៅចូលរួមច្រើនដងមកហើយតាំងពីឆ្នាំ ​២០១៣។​

​យោងតាម​​សហព័ន្ធស្រូវ​អង្ករ​កម្ពុជា​(CRF) ​គិតចាប់ពីខែមករា ​ដល់ខែមេសា ២០២៦ ​កម្ពុជា​សម្រេច​បាន​ការនាំចេញ​អង្ករ​ចំនួន​ជិត ​៤៧ ម៉ឺនតោន ​(៤៦៩៩០៩) ​ទៅកាន់គោលដៅ ៦០ ប្រទេស​ សម្រេចបាន​ទឹក​ប្រាក់ជាង ២៦៦ លានដុល្លារ។ ​​

ប្រភេទ​អង្ករ​បាន​នាំចេញអង្ករក្រអូបចំនួន ៥៨,៦៦% ​ប្រភេទអង្ករសគ្រាប់វែង ២១.៣៨% អង្ករចំហ៊ុយ ១.៦៩% អង្ករសរីរាង្គចំនួន ​០.៨៩% ​អង្ករបាក់គ្រប់ប្រភេទ​ ១៧.១៨% ​និងអង្ករផ្សេងៗចំនួន ០.២%។

​នៅក្នុងឆ្នាំ ២០២៥ កម្ពុជា​សម្រេច​បាន​ការ​នាំ​ចេញ​អង្ករ​ចំនួន​ជាង ៩៤ ម៉ឺន​តោន​ (៩៤០ ៣២១) គិត​ជា​ទឹក​ប្រាក់​ជាង ៦០០ លាន​ដុល្លារ៕

អត្ថបទ៖ ឡេង ដេត