សេដ្ឋកិច្ច

សភាពាណិជ្ជកម្មកម្ពុជាបានចុះបញ្ជីការិយាល័យតំណាងនូវែលហ្សេឡង់ជាផ្លូវការ

បានផុស

១ ខែ មុន

នៅ

ថ្ងៃសុក្រ ២៩ ឧសភា ២០២៦

ដោយ

រដ្ឋាភិបាលក្រុងអូក្លិន នៃប្រទេសនូវែលហ្សេឡង់ បានចុះបញ្ជីទទួលស្គាល់ការិយាល័យតំណាងសភាពាណិជ្ជកម្មកម្ពុជា អាណត្តិទី១ ជាលើកដំបូង ដែលនេះជាការបើកផ្លូវក្នុងការជំរុញទំនាក់ទំនងពាណិជ្ជកម្ម បរិយាកាសធុរកិច្ច និងវិនិយោគរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យតំណាងសភាពាណិជ្ជកម្មកម្ពុជា បានចុះបញ្ជីដោយជោគជ័យក្រោមច្បាប់ Incorporated Societies Act 2022 និងក្រោមក្រសួងធុរកិច្ច នវានុវត្តន៍ និងការងារ (MBIE) នៃប្រទេសនូវែលហ្សេឡង់ នៅថ្ងៃទី ០៥ ខែឧសភា ឆ្នាំ២០២៦។

លោក ឃួយ ម៉ៃខល ប្រធានការិយាល័យតំណាង សភាពាណិជ្ជកម្មកម្ពុជាប្រចាំនូវែលហ្សេឡង់ មានប្រសាសន៍ថា នេះជាសមិទ្ធផលថ្មីមួយទៀត ដែលបង្ហាញពីការពង្រីកទំនាក់ទំនងពាណិជ្ជកម្ម និងការទូតសេដ្ឋកិច្ចរបស់កម្ពុជា ទៅកាន់ ប្រទេសនូវែលហ្សេឡង់ ស្របតាមទិសដៅរបស់រាជរដ្ឋាភិបាលកម្ពុជា ក្នុងការជំរុញកំណើនសេដ្ឋកិច្ចជាតិ និងពង្រីកកិច្ចសហប្រតិបត្តិការអន្តរជាតិ។

ការិយាល័យតំណាងសភាពាណិជ្ជកម្មកម្ពុជានៅប្រទេសនូវែលហ្សេឡង់ នឹងដើរតួនាទីជាស្ពានសម្រាប់វិនិយោគិន និងម្ចាស់អាជីវកម្ម ដែលមានបំណងវិនិយោគ ឬធ្វើអាជីវកម្មរវាងកម្ពុជា និងប្រទេសនូវែលហ្សេឡង់។

លោក ឃួយ ម៉ៃខល បន្ថែមថា ប្រទេសទាំងពីរមានសក្តានុពលខ្ពស់ក្នុងការបង្កើតកិច្ចសហប្រតិបត្តិការ ជាពិសេសលើវិស័យកសិកម្ម ពាណិជ្ជកម្ម បច្ចេកវិទ្យា និងឧស្សាហកម្មផលិតកម្ម។

ការិយាល័យតំណាងសភាពាណិជ្ជកម្មកម្ពុជា នៅប្រទេសនូវែលហ្សេឡង់ បានត្រៀមខ្លួនរួចរាល់ក្នុងការផ្តល់ការគាំទ្រសម្របសម្រួល និងជួយជំរុញឱកាសធុរកិច្ច និងវិនិយោគរបស់វិនិយោគិន និងម្ចាស់អាជីវកម្មទាំងនៅកម្ពុជា និងប្រទេសនូវែលហ្សេឡង់៕