សេដ្ឋកិច្ច

គយបន្តរឹតបណ្តឹងវិធានការទប់ស្កាត់ការរត់ពន្ធខុសច្បាប់

បានផុស

១ ខែ មុន

នៅ

ថ្ងៃអង្គារ ២ មិថុនា ២០២៦

ដោយ

លោក គាំ ច័ន្ទកុសល អគ្គនាយករង នៃអគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី ២៧-២៨ ឧសភា ២០២៦ បានបន្ដចុះផ្សព្វផ្សាយ ណែនាំ និងជំរុញការអនុវត្តវិធានការ បង្ការ និងបង្ក្រាបការរត់គេចពន្ធខុសច្បាប់ ដល់មន្ដ្រីគយ និងរដ្ឋាករ អាជីវករនាំចូល ប្រតិបត្តិករដឹកជញ្ជូន និងជើងសាគយ នៅតាមបណ្ដាមាត់ច្រកនាំចូលនានាក្នុងភូមិសាស្ដ្រខេត្តស្វាយរៀង និងខេត្តព្រៃវែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិធានការនេះមាន ៣ ផ្នែកសំខាន់ៗ រួមមាន៖ ទី១. វិធានការទប់ស្កាត់អំពើរត់គេចពន្ធ និងបន្លំពន្ធ និងកិច្ចសម្រួលពាណិជ្ជកម្ម, ទី២. ការពង្រឹងអភិបាលកិច្ចក្នុងរដ្ឋបាលគយ និងទី៣. យន្តការតាម ដានការ អនុវត្ត ដែលមានសកម្មភាពលម្អិតសរុបចំនួន ៣១ សកម្មភាព។ កញ្ចប់វិធានការនេះ មានគោលបំណងបង្ការ និងបង្ក្រាបអំពើរត់គេចពន្ធគ្រប់ទម្រង់ ដើម្បីពង្រឹងអនុលោមភាពកាតព្វកិច្ចពន្ធ និងអាករ បង្កើនចំណូលជាតិ និងលើកស្ទួយបរិយាកាសប្រកួតប្រជែងដោយស្មើភាពក្នុងការធ្វើពាណិជ្ជកម្មនៅកម្ពុជា។

ទន្ទឹមនឹងការពង្រឹងអនុលោមភាពកាតព្វកិច្ចពន្ធ និងអាករ កញ្ចប់វិធានការនេះ បានផ្តោតលើការជំរុញកិច្ចសម្រួលពាណិជ្ជកម្មបន្ថែមទៀត តាមរយៈការលុបបំបាត់ទីតាំងឈរជើងត្រួតគ្នា, ការលុបបំបាត់កម្រៃត្រួតពិនិត្យកុងតឺន័រទំនិញដោយម៉ាស៊ីនស្គែនគ្រប់ប្រភេទ, ការត្រួតពិនិត្យចោះៗតែតាមព័ត៌មានហានិភ័យ, ការបង្កើនចំនួនធុរជនល្អ និងការអភិវឌ្ឍមុខងារបន្ថែមទៀតក្នុងប្រព័ន្ធស្វ័យប្រវត្តិកម្មគយ ជាដើម។

លោកអគ្គនាយករង ក៏បានរំលេចអំពីផលវិបាកនៃការអល់អែក ឬការរារាំង មិនអនុវត្តកញ្ចប់វិធានការនេះ ដែលជាកម្មវត្ថុនៃការដាក់ទោសទណ្ឌដោយគ្មានការលើកលែង និងអាចឈានដល់នីតិវិធីតុលាការក្នុងករណីចាំបាច់។

ទំហំពាណិជ្ជកម្មកម្ពុជា ជាមួយដៃគូអន្តរជាតិសម្រេចបាននូវទំហំទឹកប្រាក់ជាង ២៣,៣៨ ពាន់លានដុល្លារ នៅក្នុងរយៈពេល ៤ ខែ ២០២៦ កើនឡើង ១៩,៩% ប្រៀបធៀបនឹងរយៈពេលដូចគ្នា នៅឆ្នាំ ២០២៥៕