​ក្រុមប្រឹក្សា​អភិវឌ្ឍន៍កម្ពុជា ​ពិនិត្យ​គម្រោងសួនឧស្សាហកម្មតំបន់សេដ្ឋកិច្ច​ពិសេស​ស្វាយចន្ទី​កំពង់ធំ​

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា នៅថ្ងៃទី ​២៤ ​មិថុនា ២០២៦ ​បាន​រៀបចំ «កិច្ចប្រជុំច្រកចេញ-ចូលតែមួយ» ​ដើម្បីពិនិត្យពិភាក្សា ​លើគម្រោងស្នើសុំ​បង្កើតតំបន់​សេដ្ឋកិច្ចពិសេសឯកទេសស្វាយចន្ទីរបស់ក្រុមហ៊ុន កំពង់ធំ ឧទ្យាន ឧស្សាហកម្ម ចន្ទី ឯ.ក។

​គម្រោងវិនិយោគបង្កើតតំបន់សេដ្ឋកិច្ចពិសេសនេះ នឹងក្លាយជាតំបន់សេដ្ឋកិច្ចពិសេស ឯកទេស គំរូមួយ សម្រាប់វិស័យឧស្សាហកម្មកែច្នៃស្វាយចន្ទី និងជាកម្លាំងចលករយ៉ាងសំខាន់ ក្នុងការស្រូប យក​គម្រោង​វិនិយោគ ដោយផ្តោតសំខាន់លើការកែច្នៃស្វាយចន្ទី។​

​លោក ​អួន ស៊ីឡុត ​ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីថា សួនឧស្សាហកម្មស្វាយ​ចន្ទី​នេះ ​នឹងផ្ដល់តម្លៃបន្ថែមដល់កសិករ និងការបង្កើតការងារនៅសហគមន៍ជនបទ ជាពិសេសពលករ​មកពីប្រទេសថៃ។​

​លោក ​អួន ស៊ីឡុត ប្រាប់ថា ​ខេត្តកំពង់ធំជាខេត្តដែលមានផ្ទៃដីដាំដុះ​ស្វាយចន្ទីច្រើន​ជាងគេដែល​មានជាង ១៥ ម៉ឺនហិកតា ដែលទទួលទិន្និផលប្រមាណ ៣០% នៃការប្រមូលផលទូទាំងប្រទេស។

​លោក ​អួន ស៊ីឡុត បន្ថែមថា ការមានសួនឧស្សាហកម្មស្វាយចន្ទីនេះ មិនត្រឹមតែផ្ដល់​ប្រយោជន៍​ដល់​ការកែច្នៃស្វាយចន្ទីទេ ប៉ុន្តែវាមានអនុផល ដូចជាសំបកគ្រាប់​ស្វាយចន្ទី និងផ្លែ ដែលយើងអាច​ផលិត​ជាសម្ភារ​ប្រើប្រាស់ក្នុងឧស្សាហកម្មបានដែរ។

យោងតាមរបាយការណ៍ក្រៅផ្លូវការរបស់សមាគមស្វាយចន្ទី នៅក្នុងរយៈពេល ៤ ខែ (មករា-មេសា) ២០២៦ កម្ពុជា​បាន​នាំចេញគ្រាប់ស្វាយចន្ទីឆៅ​សរុបជាង ៨៣ ម៉ឺនតោន ទៅកាន់ប្រទេស​វៀត​ណាម​ ដោយបង្កើតប្រាក់​ចំណូល​​ប្រមាណ ​១,៤៤ ​ពាន់លាន​ដុល្លារ ​​កើនឡើង ​២៤.១៧% ធៀបនឹង​រយៈ​ពេលដូចគ្នាកាលពីឆ្នាំមុន៕​

អត្ថបទ៖ ឡេង ដេត