ក្រុមប្រទេស OPEC នៅតែប្រកាន់ជំហរផលិតប្រេង ៤០ ម៉ឺនបារ៉ែល ក្នុងមួយថ្ងៃ ដើម្បីជួយពិភពលោក

អង្គការនៃប្រទេសនាំចេញប្រេង (OPEC) និងសម្ព័ន្ធមិត្តរបស់ខ្លួនដែលគេស្គាល់ថា OPEC+ បានប្រកាសថា នឹងបន្តប្រកាន់ខ្ជាប់នូវផែនការដែលមានស្រាប់សម្រាប់ការដំឡើងទិន្នផលប្រេងក្នុងកម្រិតមធ្យមចំនួន ៤០ ម៉ឺនបារ៉ែលក្នុងមួយថ្ងៃសម្រាប់ខែមីនាខាងមុខ ទោះបីជាតម្លៃប្រេងកើនឡើងក៏ដោយ ។

ក្នុងប៉ុន្មានសប្តាហ៍ថ្មីៗនេះ តម្លៃប្រេងបាននិងកំពុងឡើងជិតដល់កម្រិតខ្ពស់មិនធ្លាប់មានក្នុងរយៈពេលជាច្រើនឆ្នាំ ដែលជំរុញដោយភាពតានតឹងភូមិសាស្ត្រនយោបាយនៅអឺរ៉ុបខាងកើត និងមជ្ឈិមបូព៌ា ។

ទន្ទឹមនោះក្រុមហ៊ុនប្រេងឆៅ West Texas Intermediate (WTI) និងក្រុមហ៊ុន Brent ទាំងពីរក៏កំពុងជួញដូរប្រេងលើសពី ៨៨ ដុល្លារអាមេរិកក្នុងមួយបារ៉ែលផងដែរ មុនពេលកិច្ចប្រជុំរបស់ OPEC+ នៅថ្ងៃពុធ ទី២ ខែមីនា ហើយកាលពីសប្តាហ៍មុនឃើញថា ការជួញដូរប្រេងរបស់ក្រុមហ៊ុនទាំងពីរបានឈានដល់តម្លៃខ្ពស់បំផុត ចាប់តាំងពីខែតុលា ២០១៤ ។

នៅខែកក្កដាឆ្នាំ ២០២១ ប្រទេស OPEC+ បានយល់ព្រមបង្កើនទិន្នផលប្រេងចំនួន ៤០ ម៉ឺនបារ៉ែលក្នុងមួយថ្ងៃជារៀងរាល់ខែ ដើម្បីផ្គត់ផ្គង់តម្រូវការពិភពលោក បន្ទាប់ពីការកាត់បន្ថយការផលិត អំឡុងជំងឺរាតត្បាតកូវីដ ១៩ ក្នុងឆ្នាំ ២០២០ ។

ចាប់តាំងពីពេលនោះមក ក្រុមហ៊ុនជួញដូរប្រេងបានប្រកាន់ខ្ជាប់នូវផែនការនេះ បើទោះបីជាមានការដាក់សម្ពាធពីប្រទេសប្រើប្រាស់ប្រេងធំៗ រួមទាំងសហរដ្ឋអាមេរិកក៏ដោយ ដើម្បីជំរុញការផ្គត់ផ្គង់បន្ថែមទៀត សម្រាប់ទប់ទល់នឹងការកើនឡើងនៃតម្លៃប្រេង ។

ស្របពេលជាមួយគ្នានេះ ប្រទេសសមាជិកមួយចំនួនរបស់អង្គការ OPEC បានព្យាយាមបូមប្រេងបន្ថែមទៀតស្របតាមកូតារបស់ពួកគេ ដោយសារការវិនិយោគមិនគ្រប់គ្រាន់ក្នុងរយៈពេលប៉ុន្មានឆ្នាំចុងក្រោយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ មកដឹង ប្រាក់ខែគ្រូបង្រៀនប្រទេសទាំង ១០ នៅ អាស៊ាន