កម្ពុជា រកចំណូលពីការនាំចេញស្រូវ​-អង្ករបាន​ជាង ៥៦០លានដុល្លារ ៥ខែឆ្នាំនេះ

កម្ពុជា បាននាំចេញស្រូវអង្ករ ទៅកាន់ទីផ្សារអន្តរជាតិ មានទឹកប្រាក់ចំនួន ៥៦៥លានដុល្លារអាមេរិក រយៈពេល៥ខែដំបូង​នៃឆ្នាំ២០២២ ក្នុងនោះការនាំចេញអង្ករមានចំនួន ២៨៣.៦៧៥តោន ទទួលបានទឹកប្រាក់ចំនួន១៧៣លានដុល្លារ កើនឡើងជិត២២ភាគរយ និងការនាំចេញស្រូវមានចំនួន១.៦៩៨.៩០៨តោន គិតជាទឹកប្រាក់​ចំនួន៣៩១លានដុល្លារ​អាមេរិក។

តាមរបាយការណ៍របស់សហព័ន្ធស្រូវអង្ករកម្ពុជា បានបង្ហាញថា ការនាំចេញទៅប្រទេសចិន និងតំបន់ស្វយ័តហុងកុង ម៉ាកាវមានចំនួន១៤៩.៤៤៧តោន ស្មើនឹង៥២,៦៨ភាគរយ នៃការនាំចេញសរុបមានកំណើន ២៣,៦៨ភាគរយ ។ ការនាំចេញទៅកាន់បណ្តាប្រទេសនានា នៅក្នុងទ្វីបអឺរ៉ុបចំនួន ២៣ប្រទេស បានចំនួន៨៨.១៦៧តោន ស្មើនឹង​៣១ភាគរយមានកំណើន ចំនួន៤៩,២៦ភាគរយ  ការនាំចេញទៅកាន់ប្រទេសតំបន់អាស៊ាន មានចំនួន២៥.៦៩១​តោនស្មើនឹង៩,០៦ភាគរយ និងមានកំណើន១៧,៥៩ភាគរយ ។

ចំណែកនៅក្នុងខែឧសភាឆ្នាំ ២០២២ ការនាំចេញអង្ករទៅកាន់ទីផ្សារអន្តរជាតិមាន ៦២.៥៣៧តោន មានកំណើនរហូតដល់៥៤.២៨ភាគរយធៀបនឹងខែឧសភា ២០២១ និងនាំចេញស្រូវបានចំនួន៥០.១៦១តោន។

លោកឧកញ៉ា សុង សារ៉ុន ប្រធានសហព័ន្ធស្រូវអង្ករកម្ពុជា បានអំពាវនាវដល់បងប្អូនកសិករ កម្ពុជា សូមចាប់ផ្តើធ្វើស្រែ​ដោយ​យកចិត្តទុកដាក់ខ្ពស់ និងស្វែងរកជម្រើសយន្តការប្រើប្រាស់ធាតុចូលដូចជាជីតាមលក្ខណៈ​ធម្មជាតិ ឬសរីរាង្គជា​ដើម ដើម្បីជំរុញតម្លៃស្រូវ ឱ្យមានការកើនឡើងបន្ថែមទៀត។

លោកឧកញ៉ា សុង សារ៉ន កត់សម្គាល់ឃើញថា វិបត្តិសង្រ្គាមរុស្ស៉ីអ៊ុយក្រែន បានធ្វើឱ្យពិភពលោកខ្វះស្បៀងអាហារ ព្រោះប្រទេសទាំងពីរនេះ ផលិតស្រូវសាលីសម្រាប់នាំចេញទៅទីផ្សារអឺរ៉ុបច្រើនជាងគេ និងប្រទេសមួយចំនួនទៀត នៅអាហ្វ្រិក ដែលបណ្តាលឱ្យស្រូវសាលីកើនឡើងខ្លាំងរហូតដល់ ៣០ភាគរយ។ ក្នុងពិភពលោកកំពុងខ្វះស្បៀង​អាហារនេះ ក៏ជាឱកាសល្អសម្រាប់កម្ពុជាក្នុងការនាំចេញផងដែរ៕ ទួន សុផល