កត្តា ៣ យ៉ាងធ្វើឲ្យតម្លៃប្រេងពិភពលោកប្រែប្រួល

ប្រេង ​ត្រូវ​បាន​គេ​ចាត់​ទុក​ថា​ជា​ “ឈាម​” នៃ​សេដ្ឋកិច្ច​អន្តរជាតិ ដែលប្រទេសនីមួយៗមិនអាចខ្វះបាន សម្រាប់ប្រើប្រាស់ក្នុងវិស័យឧស្សាហកម្មចម្រុះ ដូចជាការផលិតឥន្ធនៈប្រើប្រាស់ប្រចាំថ្ងៃ ។

បច្ចុប្បន្ន តម្លៃប្រេង គឺកំពុងតែប្រែប្រួលយ៉ាងខ្លាំង ដែលអាចនិយាយបានថា គឺកំពុងតែស្ថិតនៅក្នុងភាពចលាចល ដោយសារតែតម្លៃនៃប្រេងឡើងខ្ពស់ ក៏ដូចជាការផ្គត់ផ្គង់មិនគ្រប់គ្រាន់ទៅនឹងតម្រូវការប្រចាំថ្ងៃជាដើម ហើយនេះគឺជាកត្តាចំនួន ៣ ដែលធ្វើឲ្យមានការប៉ះពាល់ ក៏ដូចជាការប្រែប្រួលនៃតម្លៃប្រេង ៖

ការផ្គត់ផ្គង់

បើសិនជាការផ្គត់ផ្គង់កាន់តែធំ នោះតម្លៃកាន់តែទាប ។ នេះជាទ្រឹស្តីមូលដ្ឋាននៃសេដ្ឋកិច្ចរបស់អ្នកសេដ្ឋវិទូ Adam Smith ដែលមានន័យថា​ នៅពេលដែលការផ្គត់ផ្គង់​ទំនិញ ឬសេវាកម្មណាមួយដែលច្រើនលើសតម្រូវ​ការ នោះតម្លៃនៃទំនិញ និងមានការបញ្ចុះតម្លៃទាប ។

បច្ចុប្បន្នប្រទេសមួយចំនួនធំកំពុងខ្វះការផ្គត់ផ្គង់ប្រេង ដោយសារតែការដាក់ទណ្ឌកម្មលើរុស្ស៊ី ។ រុស្ស៊ីជាប្រទេសដែលផ្គត់ផ្គង់ប្រេង និងឧស្ម័ន​ដ៏ធំសម្រាប់ពិភពលោក ជាពិសេសតំបន់អឺរ៉ុប ។ ​រុស្ស៊ី កំពុងរងទណ្ឌកម្មជាច្រើនពីអឺរ៉ុប ខណៈអឺរ៉ុបវិញ​ក៏ទទួលទណ្ឌកម្ម​ពីរុស្ស៊ីដូចគ្នា តាមរយៈការឈប់លក់ប្រេង និងឧស្ម័នឲ្យ ។ ​ដូចនេះ នៅពេលដែលអ្នកផ្គត់ផ្គង់ដ៏ធំ ផ្អាក ឬកាត់បន្ថយការផ្គត់ផ្គង់ នោះទំនិញដែលមានបរិមាណតិច នឹងធ្វើឲ្យទំនិញនោះ កើនឡើងតម្លៃខ្ពស់ ។

តម្រូវការ​

នៅពេលតម្រូវការប្រេងច្រើនហួស​ នោះតម្លៃរបស់វាក៏កាន់តែខ្ពស់ផងដែរ ។ ប្រេង ជាទំនិញ​ដែលប្រជាពលរដ្ឋគ្រប់រូបត្រូវការជាចាំបាច់សម្រាប់ដំណើរការយាន្តជំនិះ ហើយទោះបីជាប្រេង​សាំង ឡើងថ្លៃដល់ប៉ុន្មានក៏ដោយ ក៏ប្រជាពលរដ្ឋនៅតែចាក់សម្រាប់ជិះទៅបំពេញការងារផ្សេងៗផងដែរ ។

ផ្ទុយមកវិញ បើសិនជាប្រេងនោះ លែងមានតម្រូវការ ឬក៏គេមានជម្រើសផ្សេង តម្លៃប្រេង​ ប្រាកដជាធ្លាក់ចុះមិនខាន ។ ​​​ដោយស្ថិតនៅក្នុងបរិបទកូវីដ ១៩ រីករាលដាលខ្លាំង ទីក្រុងជាច្រើនលើពិភពលោក ត្រូវបានបិទមួយរយៈ ដោយតម្រូវឲ្យប្រជាពលរដ្ឋគ្រប់រូបស្នាក់នៅក្នុងផ្ទះ ដោយមិនចេញទៅណាឡើយ ។ ត្រង់ចំណុចនេះ ការធ្វើដំណើរ​របស់ប្រជាពលរដ្ឋ គឺត្រូវបានផ្អាក​ ដូចនេះ តម្រូវការប្រេងសាំង ក៏លែងមានន័យទៀតដែរ​ ទោះបីជាតម្លៃចុះដល់​ប៉ុន្មានក៏ដោយ ក៏គ្មានអ្នកចាក់ដែរ ។

ភាពចលាចលនយោបាយ

តម្លៃ​ប្រេង​ គឺ​អាស្រ័យ​យ៉ាង​ខ្លាំង​ទៅ​លើ​ស្ថានភាព​នយោបាយ ។ នៅពេលមួយដែលលោក សាដាម ហ៊ូសេន ឈ្លានពានគុយវ៉ែតក្នុងឆ្នាំ ១៩៩០ តម្លៃប្រេងបានកើនឡើងជិត ២ ដងក្នុងរយៈពេលជាច្រើនខែ ។  

ចំណែកបច្ចុប្បន្ន ជុំវិញវិបត្តិអ៊ុយក្រែន ក៏បាននាំឲ្យមានការឡើងថ្លៃប្រេងផងដែរ បន្ទាប់ពីការដាក់ទណ្ឌកម្មជាបន្តបន្ទាប់ប្រឆាំងនឹងរុស្ស៊ី ប៉ុន្តែវាក៏ជាហេតុនាំឲ្យបណ្តាប្រទេសលោកខាងលិចឆ្ពោះទៅរកវិបត្តិថាមពលដែលមិនធ្លាប់មានពីមុនមក នៅក្នុងសហភាពអឺរ៉ុបផងដែរ និងបានរុញច្រានគ្រួសាររាប់លាននាក់ធ្លាកចូលវិបត្តិប្រេងឥន្ធនៈ ៕

ប្រែសម្រួលដោយ ៖ នាង រតនៈ

ប្រភព ៖ Sputnik

ចុចអាន ៖ ៧ ខែជាប់គ្នា ចិន នៅតែនាំចូលប្រេង និងឧស្ម័នពី រុស្ស៊ី